1 Pedro 3

1Ex ikxkye' xu'jilb'aj, che b'inqe'ye' kye kychmile', tu'ntzun qa min nche okslan junjun teju' tpakb'al b'a'n, kb'elti'j kynab'l tu'nju' che anq'ine' maskye min xikyma'ne' tyol Dyos kye, 2ajtokkyka'yi'n b'a'n kynab'le' twitz Dyos ex nche nimane' kye. 3Myawt kyb'anilju'ye' kyka'yinke' kyu'n ti'xti' te'k kyi'je': kse'n b'inchb'ente kywi'ye', e'toj kyẍkyine', e'kyuye' mo kyxmilq'ob'e' q'anpwaq mo tb'anil kyxb'alune', 4ate' toj kyanmiye' lay kub'o'lj, xa'wanqeku'ye' tu'n tzalajb'il ex nak'b'il toj kyanmiye'. Atzunte nim toklenju' twitz Dyos. 5Ikyqe'toqtzun qya nimal Dyos qe' ojtxi' tb'anilqexi'x; okqe kyk'u'j ti'j Dyos ex e'niman kye kychmil. 6Kse'nte Sara, niman te Ab'raam ju' tchmil ex oktq'o'n tb'i taw. Che okyele' ikyju' qama kyb'inchaye' b'a'n ex min nche xob'e'. 7Ex ikxkye' chmilb'aj, che kanexe' tekyib'e' kyuk'i'l kyxu'jile', qu'n ikyqe' qya kse'n k'wab'l paxaxan. Kyq'ome' ninb'ilkye b'a'n, qu'n ax kychwinqlalju' tejumajx tzaj ttziya'n Dyos se'nkye'. Che anq'ine' b'a'n kyuk'i'l, tu'n lalun ten maqb'il toju' kyna'j Dyose'. 8Ikytzu'n, che anq'inqe'ye' junx kynab'le', kyk'u'jlam kyib'e' kyitz'in kuxi'x kyib'e'. Che okxe' b'a'nwnaq ex me's. 9Qama tb'incha jun xjal myab'a'n kyeye', lalun kyaq'e' t-xel tuk'i'l myab'a'n, exqa mache ok i'li'ne', lalun txikymojtza'ne' tu'n i'li'n. Kyqaninx pekye' ky'i'wb'il tib'aj, qu'n mache txkonjtze' tu'n Dyos tu'n kyk'monteye' ky'i'wb'il. 10Qu'n intma'n toj tu'jil: Alkye tajb'il tu'n tk'u'jlante tchwinqlal ex tu'n ttzalaj, jk'um taq' tu'n lalun yolin myab'a'n ex tu'n lalun chanyol; 11lalun b'inchantl taq'wix ex b'inchanxju' b'a'n, q'onk tilil tu'n tten toj nak'b'il kukxju'. 12Qu'n xq'uqi'n qekye' tnik'alkyi'j tu'n Qajaw ex nche tzajtb'in toj kyna'j Dyos, aye'tzu'n b'inchal taq'wix nq'ojin kyi'j, chiju' tz'ib'a'n. 13¿Alkye kb'inchal taq'wix kyi'je' qa nkyb'incha'ne' b'a'n kukxju'? 14Qatzun ex nche yajtiye' tu'n tpaj nkyb'incha'ne' tnik'alilti'j, ¡k'i'wla'n qexi'xe'! Mix-aloqe tu'n kyxob'a'ye', ex lalun che sak'puje', 15Kynimame' Qajaw Krist toj kyanmiye'. B'antnix kytene' kukxju' tu'n txi' kychik'b'a'ne' kye kykyaqilju' mache qaninte kyeye' tiqu'n q'uqli kyk'u'je' ti'j Krist, 16naq o'kx kyb'inchame' toj me'sb'il ex ninb'il. Che anq'inqe'ye' toj tu'me'l kse'n ntma'n kyanmiye', tu'ntzun kykub' ch'ixwiju' nche yolin myab'a'n kyi'je' tu'n nche anq'ine' b'a'n. 17Ate b'a'n tu'n qyajti tu'n tpaj nqb'incha'n b'a'n, qa a tajb'il Dyosju', kyetwitz tu'n tpaj nqb'incha'n myab'a'n. 18Qu'n jumajx kyim Krist tu'n tpaj qil. Min b'inchante il, yajtitzun tu'nqpaj b'inchal myab'a'nqo', tu'n qxitiq'i'n tk'etz Dyos. Kyimju' t-xmilal twitz tx'otx'; ex jaw anq'intl tu'n tipumal Xewb'aj Xjan. 19Ikytzu'n xa'ya' pakb'alteju' kub'sb'ilti'j kamik tu'n kyeju' anmi jpu'nqetoq, 20aye' min e'niman te Dyos ojtxi', tej intoq ayon Dyos tu'n tanjtzti'j kyanmi toj tq'ijlalil Noe, tej tb'inchetju' b'ark, naq wajxaq xjal e'klet toju' a'. 21Atzu'n a' lu intoq techla'n ti'ju' jawsb'il a', ju' xqo klet tu'n ja'lo. Aju' jawsb'il a' lu mya tx'ajb'ilte qxmilal, ate' lu tu'n txiqqani'n te Dyos tu'n t-ẍtilset qnab'l; ex maqo klet tu'n tjawlen anq'in Jesukrist. 22Oje japun Jesukrist toj kya'j, q'uqli toj tb'a'nq'ob' Dyos Manb'aj, nkawin kyib'aju' anjl, ex kyib'aju' txqantl xewb'aj ati kyoklen ex ati kyipumal.

will be added

X\