1 Pedro 1

1Ayine' Luch, apostl qine' te Jesukrist, nche'x nq'olb'e'ne' b'je'xniqe'ye' ti'jxi' qtx'otx', xiniqe' sputje' najal kyoj tx'otx' Ponto, Kalasya, Kapadosya, Asya ex B'itinya, 2sk'o'nqe'tle' tu'n Qman Dyos t-xetnejel kse'nxju' tb'is tk'u'j. Xjansa'n qe'ye' tu'n Xewb'aj Xjan tu'n kynimane' te Dyos ex tu'n kytx'jete' tu'n tchk'el Jesukrist. Kyk'amxwite' nin t-xtalb'il Dyos ex tnak'b'il. 3Qajwalinktz Qman Dyos Manb'aj te Qajaw Jesukrist, ma'xi'x tzaj laqj tk'u'j qi'j, maqo tch'exb'e tu'nelju' jawtz anq'in Jesukrist. Matzaj tq'uqb'a'n qk'u'j kukxju', 4ex ktzajel tq'o'n Dyos tziya'ntl tu'n qe, k'u'n tu'n toj kya'j, aju' lay kub' xitj, lay b'aj txa'j, ex lay kub' tzqij. 5Tu'nju' ati kyokslab'le' ti'j Dyos, klo'n qe'ye' tu'n tipumal tu'n kykanb'anteye' kolb'il atitl tu'n Dyos, aju' ktzajel tyek'u'n toj b'ajsb'il q'ij. 6Qu'mtzun inxi'x che tzalaje', maskye mache ik'e' toj ninyajb'il toj jte' q'ij qa nnojqelan. 7Qu'n iky kyokslab'l ju'ye' kse'n q'anpwaq: k'ik'el twitzlalil toj q'aq' qa tb'anil. Tb'anilxi'xte' kyokslab'le' kyetwitz q'anpwaq qama tzik'xkyu'ne' toj yajb'il, qu'n okpe' b'ajelte' q'anpwaq. Ajtik' twitzlalil kyokslab'le', kjawil ajwali'n, knimanjtzel ex k'okyel q'o'n toklen ajtul Jesukrist. 8Maskye na'mx tok kyka'yi'ne' Jesukrist, in kyk'u'jla'ne' ex inkyoksla'ne' ja'lo, atixi'x kytzalajb'ile' ti'j tb'anilxi'x min nb'ent kymanteye', 9qu'n xi' tkanb'etju' kolb'il tu'n kyokslab'le'. 10B'aj kyxnaq'tza'n t-sanjelal Dyos ojtxi' ex b'aj kyjyo'nxi'x tnab'lju' kolb'il lu, ex e'yolin ti'ju' ktzajel tq'o'n Dyos kyeye' tu'n t-xtalb'il. 11Intoq tzaj tyek'u'npun Xewb'aj Xjan kye t-sanjelal Dyos ojtxi' qa ati tu'n tyajti Krist exju' tajwalil tzultoq yajxi'tl; intoq oktilil kyu'n tu'n telkynik' ti'j alkyetoq Krist ex jtoj tu'n tul. 12Atzunte Dyos tzaj tyek'u'n kye qa aju' ntoq kypakb'a'n myatoq kye, te jun b'a'nte' kyeye'. Atzunte matxi' q'manjtzju' kyeye' ja'lo kyu'nxju' e'pakb'ante tpakb'al b'a'n tu'n tipumal Xewb'aj Xjan tzaj chq'o'n toj kya'j. ¡Ex kyajb'ilju' anjl tu'n tok kyka'yi'n ti'xti' lu! 13Qu'mtzun, b'a'nqe'xe' ex che ximane' b'a'nxi'x titi' kxel kyb'incha'ne'. Qek kyk'u'je' axxi'x qa ktzajel tq'o'n Dyos tu'n t-xtalb'il kyeye' ajtul Jesukrist. 14Che oke' se'n k'walb'aj b'a'n b'in, lalun che anq'ine' kse'nx kyajb'ile' tej na'mxtoq telkynik'e' te Dyos. 15Majxpe' kypa'milkye' kyib' ti'j il ex lalun txikyb'incha'ntle', qu'n xjante' Dyos xtxkonkyeye', 16qu'n intma'n toj Tu'jil kjalu: Che okkye' xjan, qu'n xjan qinwe', chij. 17Qankyma'ne': Taye te Dyos, ju' nche ok kykyaqil xjal toj xjel tu'n, ati tu'n kyyek'u'nteye' ninb'ilte toj tkyaqil kychwinqlale' twitz tx'otx'. 18Matxi' che kolpete' tu'n Dyos toju' kychwinqlale' mixti'x tajb'en kyk'ame' kye ojtxi' kychmane'; mya kyu'n ti'xti' nche b'aj, kse'n q'anpwaq mo saqpwaq, 19tu'nte' tchk'el Krist xa'wanku'xi'x, kub' q'o'n te chojb'il kse'n jun qpoj tman rit mixti' ttzakajil ex ẍtilun. 20Xima'ntltoq tu'n Dyos atxi'x na'mxtoq tkub' tb'incha'n twitz tx'otx' tu'n tyajti Krist, ex matzul toju' mankb'il tq'ijlalil ja'lo te jun b'a'n kyeye'. 21Mache okslane' te Dyos tu'nel Krist, aju' jaw anq'in tu'n Dyos ex jaw tajwali'n; qu'mtzun tok kyokslab'le' ti'j Dyos ja'lo ex q'uqli kyk'u'je' ti'j. 22Tu'ntzu'n nxi' kynima'ne' tpakb'al b'a'n axxi'x, ma ẍtilset toj kyanmiye' tu'ntzun axxi'x nche kyk'u'jla'ne' okslal. Kyk'u'jlamtzun kyib'e' kyxolilexe' tuk'i'l kyanmiye' ẍtilun ex tu'n tkyaqil kyk'u'je'. 23Mache itz'jiye' tkamaji'n, mya kyi'j kymane' te twitz tx'otx', ti'jku' tyol Dyos, itz'xi'x ex ati tejumajx. 24Qu'n intma'n toj Tu'jil kjalu: Kykyaqil xjal ikyqe' kse'n itzaj, extzu'n kyoklen ikyse'n tb'echal itzaj. Nkub' tzqiju' itzaj ex nkub' tz'aq tb'echal. 25atzunte' tyol Qajaw ati tejumajx, chiju' tz'ib'a'n. Atzu'n yol lu aju' tpakb'al b'a'n matxi' b'ajx pakb'a'n kyeye'.

will be added

X\