1 Juan 5

1Qa nqoksla'n qa a Jesus Krist, tk'wal Dyos qo'; exqa nqk'u'jla'n Manb'aj, ati tu'n qk'u'jlan kye tk'wal Manb'aj. 2Qa nqk'u'jla'n Qman Dyos ex nqb'incha'n tchaq'b'il, ex nel qnik' ti'j qa nche qk'u'jla'n tk'wal Dyos. 3Ate nqk'u'jla'n Dyosju' qa nche qb'incha'n tchaq'b'il; ex mya ch'uẍqe' tchaq'b'il, 4qu'n kykyaqilju' nche ok te tk'wal Dyos, nkub'ti'ju' myab'a'n twitz tx'otx' kyu'n. Tu'n qokslab'l nkub'a'ti'ju' myab'a'n qu'n. 5Alkye ntoksla'n qa a Jesus Tk'wal Dyos, nkub'ti'j myab'a'n twitz tx'otx' tu'n. 6Tej tul Jesukrist, jaw a' twi' ex el tchk'el; mya o'kx jaw a' twi', ex el tchk'el. Ex a Xewb'aj Xjan ntziyante, qu'n ax te Xewb'aj Xjan tyol. 7Oxe' q'olte tziyb'il ti'ju' lu: 8aju' T-xew Dyos, exju' a', tuk'i'lju' tchk'el Jesukrist; ex ax yolju' nkyma'n oxe' lu. 9In pena' xiqoksla'n kyol xjal, mitzunloyate' ttziyb'il Dyos nimxi'x toklen, qu'n ina' ttziya'n qe ti'ju' Tk'wal. 10Alkye nokslan teju' Tk'wal Dyos, ati tziyb'il lu toj tanmi; atzunju' min nokslan te Dyos, naku'j chajyolil te, qu'n min ntoksla'n ttziyb'il Dyos ti'ju' Tk'wal. 11A nttziya'n Dyosju' tu'n matzaj tq'o'n qchwinqlal tejumajx, ex ati qchwinqlal lu qama qokslaju' Tk'wal. 12Qa nqo anq'in tuk'i'lju' Tk'wal Dyos, ati qchwinqlal lu; altzunkyete min nanq'in tuk'i'l Tk'wal Dyos, mixti' tchwinqlal tejumajx. 13Nxi' ntz'ib'a'ne' kyeye' okslalqe'ye' te Tk'wal Dyos, tu'n kyb'inteye' qa ati kychwinqlale' tejumajx. 14Q'uqli qk'u'j ti'j Dyos, qu'n b'i'n qu'n qa titi' matxi qqani'n te kse'nju' tajb'il, nqo tzaj tb'i'n. 15Kse'nxtzu'n nqo tzaj tb'i'n Dyos ajttzaj qna'n, ex b'i'n qu'n qanqk'mo'n titi' matxi qqani'n te. 16Qama til jun okslal juntl okslal ntb'incha'n jun il mya te kamik, ati tu'n tna'n Dyos ti'j, ex ktzajel tq'o'n Dyos tchwinqlalju' okslal lu, qa mya jun il te kamik. Ati jun il te kamik, ex lay txinma'ne' tu'n kyna'n Dyose' tu'n tpaj. 17Tkyaqil taq'wix nb'inchet, il; ex atite il mya te kamik. 18B'i'ntl qu'n aye'kye' tk'wal Dyos qe'tl, min nche b'inchantl il, qu'n xq'uqi'nqe' tu'n Tk'wal Dyos, ex min nche oktzyu'n tu'n tajaw il. 19B'i'n qu'n te Dyos qo', ex kykyaqil xjal twitz tx'otx' te'qe' tjaq' tkawb'il tajaw il. 20Ex b'i'n qu'n oje tzulju' Tk'wal Dyos ex tzaj tq'o'n qnab'l tu'n telqnik' ti'ju' Dyos axxi'x. Nqo anq'in tuk'i'lju' ax, aju' Jesukrist Tk'wal Dyos. Ex ato' tuk'i'lju' Dyos axxi'x, ex ntzaj tq'o'n qchwinqlal tejumajx. 21Kyka'yinx kyib'e' tal nk'wal kyeju' witzleb'.

will be added

X\