1 Juan 4

1E'ntzik ex e'witz'in, lalun che'x kyoksla'ne' kykyaqilju' pakb'al nche q'mante qa ati T-xew Dyos kyuk'i'l, tz'elx kynik'e' kyi'j qa T-xew Dyos ati kyuk'i'l mujqa mya. Qu'n nim pakb'al chalyolqe' ate' twitz tx'otx'. 2K'elel kyniky'e' alkye ati T-xew Dyos tuk'i'l kjalu: kykyaqil pakb'al nche q'mante qa axxi'x ul Jesukrist kse'n jun ichan, ati T-xew Dyos kyuk'i'l. 3Alkyetzunte inq'mante qa min ul te Jesukrist kse'n jun ichan, mixti' T-xew Dyos tuk'i'l; aju' t-xew ajq'oj ti'j Krist ati tuk'i'l. B'i'ntl kyu'ne' ati tulelju' xewb'aj lu; atitlte' ja'lu kyxol xjal. 4E'tal nk'wal, te Dyos qe'ye' ex makub' kyi'ju' chalyol na'j kyu'ne', qu'n nimxi'x tipumalju' ati kyuk'i'le' kyetwitzju' ati twitz tx'otx'. 5Te twitz tx'otx'qe'; qu'mtzun nche yolin kyi'j ti'xti' twitz tx'otx', aye'xtzu'n te twitz tx'otx' nche kub' b'inkye. 6Ayo'tzunqe te Dyos qo'. Aju' ojtzqi'n Dyos tu'n nkub' tb'in qyol, atzunju' mya te Dyos min nqokub' tb'i'n. Atzuntzu' nela' qnik' alkye ati Xewb'aj te ax tuk'i'l ex alkye ati xewb'aj te sb'ub'l tuk'i'l. 7Atixi'x nk'u'je' kyi'je' e'ntzik ex e'witz'in, ati tu'n qk'u'jlante qib' qxolilex, qu'n tuk'i'l Dyos ntzaja' tk'u'jlalil. Kykyaqilju' nche k'u'jlan tk'wal Dyos qe' ex kyojtzqi'n Dyos. 8Alkyete min nk'u'jlan, na'mx teltnik' te Dyos, qu'n nk'u'jlante Dyos. 9Tzaj tyek'u'n Dyos tk'u'jlalil qe tej ttzaj tchq'o'n o'kxku' jun Tk'wal twitz tx'otx' tu'n tten qchwinqlal tu'n. 10A tk'u'jlaliju' kjalu: mya ma'wt qk'u'jla Dyos, ate Dyos xk'u'jlanqe ex matzaj tchq'o'n Tk'wal, tu'ntzun ajtkub' te chojb'il, che najsetel qil tu'n. 11Ati nk'u'je' kyi'je' tal nk'wal, qa ikyxqo tk'u'jlaya' Dyosju', ex ikxqe tu'n qk'u'jlante qib' qxolilex. 12Mix-a'lo'te oje tz'ok ka'yinte Dyos; qatzun maqk'u'jla qib' qxolilex, ati Qman Dyos quk'i'l ex nq'ancha'lix tk'u'jalil qoj. 13Anela' tnik'tzilju' qa nqo anq'in tuk'i'l Dyos exqa ati Dyos quk'i'l, tu'nju' matxi' tzaj tq'o'n T-xew qe. 14Ex ayo'ku'ye' matxi' qolonte ex nxiqma'ne' qa tzaj tchq'o'n Qman Dyos Tk'wal klol kye kykyaqil xjal. 15Alkyexku' matz'el tnik' qa ate Jesus Tk'wal Dyos, nanq'in tuk'i'l Dyos ex ati Dyos tuk'i'l. 16Ikytzu'n nel qnik' ti'j tk'u'jalil Dyos qi'j ex maqoksla. Atite Dyos tk'u'jalil, ex aju' nk'u'jlan, nanq'in tuk'i'l Dyos ex ati Dyos tuk'i'l. 17Ikytzu'n ntena'xi'x qk'u'jlalil, tu'ntzun tqe qk'u'j toju' q'ij ajqok toj xjel; qu'n ikyqo' kse'n Jesukrist twitz tx'otx'. 18Qa ati qk'u'jlalil, lay qoxob'. A pena' axxi'x tk'u'jalil nex xla'jante xob'ajil, qu'n tu'nju' xob'el ati tz'e'ysb'il witzb'aj. Qu'mtzun alkye nxob', na'mx tten tk'u'jlalil axxi'x toj tnami. 19In qo k'u'jlanqe, qu'n nejtl xqo tk'u'jla Dyos. 20Qa ati jun inq'mante kjalu: Ink'u'jla'ne' Dyos, qa chi, extzun neltik'o'n ttzik mo titz'in, chalyol. Qa min ntk'u'jla'n jun xjal ttzik mo tiz'in, nokku' tka'yi'n, ex lay b'ent tk'u'jlante Dyosju' min nok tka'yi'n. 21A oje tchaq' Jesukristju' qe kjalu: alkye ntk'u'jla'n Dyos, ikx k'u'jlam ttzik mo titz'in.

will be added

X\