1 Juan 2

1E'tal nk'wal, nb'ajx ntz'ib'a'n jaye'lu kyeye' tu'n lalun che b'inchan ile'. Qatzun ati jun mab'inchan il, ati jun kolol qi'j twitz Manb'aj, aju' Jesukrist, ex tz'aqlixi'x. 2Taq'tib' Jesukrist te chojb'il tu'n kynajset qil; ex mya o'kx qil, ex kyil kykyaqil xjal twitz tx'otx'. 3Qama che'x qb'i'n tchaq'b'il Dyos, matxitzun tz'el qnik'tz te Dyos. 4Qatzun ati maq'mante: Wojtzqi'nwe', qa chi, ex min nche'x tb'i'n tchaq'b'il, min nyolin ax. 5Atzunte' qa nxiqb'i'n tyol, atzuntzu' ntena'xi'x tk'u'jlalil kse'nte Dyos nqo tk'u'jla'n. 6Alkye inq'mante qa juna'ntib' tuk'i'l Dyos, ati tu'n tanq'in kse'n anq'ina' Jesukrist. 7E'ntzik ex e'witz'in, mya ak'a'jte' chaq'b'il nxi' ntz'ib'a'ne' kyeye' lu: axte chaq'b'ilju' kyk'ame' tzajx t-xetnejel. Ate' ojtxi' chaq'b'il a b'i'ntlju' kyu'ne'. 8Atzu'n ja'lo, nxi' ntz'ib'a'ne' jun ak'a'j chaq'b'il kyeye', axxi'x te Krist ex kyeye', qu'n xi'tkub'aju' qlolj ex xi'tqoptzajxi'xju' spik'un axxi'x. 9Qama tma jun qa ati toj spik'un, extzun neltik'o'n ttzik mo titz'in, atix toj qlolj. 10Aju' ntk'u'jla'n ttzik mo titz'in, nnanq'in toj t-spik'umal Dyos, ex minti' takpuje'n toj tanmi. 11Atzunte' neltik'o'n ttzik mo tiz'in, inanq'in toj qlolj ex inx takajla toj qlolj, ex min neltnik' jatu'n t-xa', qu'n moẍ tu'nju' qlolj. 12E'tal nk'wal, nxi' ntz'ib'a'ne' lu kyeye', qu'n matxi' kub' najsa'n kyile' tu'n Dyos tu'nel Jesukrist. 13E'manb'aj, nxi' ntz'ib'a'ne' lu kyeye', qu'n matxi' tz'el kynik'e' teju' atitl ttzajlenx t-xetnejel. E'ku'xun, nxi' ntz'ib'a'ne' lu kyeye' qu'n matxi' kub'ti'ju' tajaw il kyu'ne'. 14Mab'ajx ntz'ib'a'ne' kyeye' tal nk'wal, qu'n matxi' tz'el kynik'e' teju' Manb'aj. Mab'ajx ntz'ib'a'ne' kyeye' manb'aj, qu'n matxi' tz'el kynik'e' teju' atitltoq atxi'x t-xetnejel. Ex mab'ajx ntz'ib'a'ne' kyeye' ku'xun, qu'n kuwqe'ye' ex matxi' kyk'ame' tyol Dyos toj kyanmiye', ex matxi' kub'ti'ju' tajaw il kyu'ne'. 15Lalun kyk'u'jlaye' twitz tx'otx', exju' nb'aj twitz tx'otx'. Alqe nk'u'jlante te twitz tx'otx', min ntk'u'jla'n Dyos; 16qu'n tkyaqilju' ti'xti' twitz tx'otx' myatzu' ntzaja' tk'etz Dyos, te twitz tx'otx'xte', aye' ja'lu: e'tajb'il qchib'jil, achb'il kyi'ju' nche qka'yi'n ex nimjtib'il toj qchwinqlal. 17Atzunte' twitz tx'otx' xi' tb'aj kyuk'i'l tkyaqilju' achb'il myab'a'n twitz: atzunte' ntb'incha'n tajb'il Dyos ktenb'el kukxju'. 18E'tal nk'wal, a b'ajsb'il tq'ijlalilju' ja'lo. B'i'ntl kyu'ne' qa tzul neju' ajq'oj ti'j Krist; matxitzun che jawb'ent txqan ajq'oj ja'lo ti'j Krist. Qu'mtzun nel qnik' ti'j qa toj b'ajsb'il tq'ijlalil ta'qo' ja'lo. 19Mache b'je'x qxol; axxi'x myatoq quk'i'lqe', naqwit quk'i'l qe'xi'xtoq, ma'wtlo che kyejten qxol. Ma'tzun b'aj ikyju' tu'n tel q'ancha'lin qa mya kykyaqil quk'i'lqe'. 20Matxi' tz'ok q'o'n kyoklene' tu'n Xewb'aj Xjan, ex matxi' tz'el kynik'e' kykyaqile' teju' ax. 21Nxi' ntz'ib'a'ne' kyeye' qu'n kyojtzqi'ntle' ax; ex b'i'n kyu'ne' lay chan yolju' nyolin ax. 22¿Alkyetzu'n chalyol? Aju' inq'mante qa myate Jesusju' Krist. Atzunte ajq'oju' ti'j Krist, qu'n neltik'o'n Qman Dyos tuk'i'l Jesus ju' Tk'wal. 23Alkyexku' matz'el ik'onte Tk'wal Dyos, ex neltik'o'n Dyos Manb'aj; alkyetzun mak'monte K'walb'aj, ex ntk'mo'n Manb'aj. 24Qu'mtzun kyajxwit tenju' yol toj kyanmiye' aju' kyb'iye' atxi'x kyokslane'; qatzun ati toj kyanmiye' kukxju', ex che tenb'ele' juna'n kyib'e' tuk'i'l K'walb'aj ex tuk'i'l Manb'aj. 25Ate oje tzaj ttziya'n Jesukrist qe, aju' chwinqlal tejumajx. 26Nxi' ntz'ib'a'ne' kyeye' kyi'ju' kyajb'il tu'n kysb'un kyi'je'. 27Aye'tzunkye' ati Xewb'aj Xjan kyuk'i'le', tu'n Xewb'aj Xjan soka' tq'o'n Jesukrist kyoklene', ex min nojqelan alkye kxnaq'tzal kyeye', qu'n aju' Xewb'aj Xjan tzajni tq'o'n Dyos kyuk'i'le' kxnaq'tzal kyeye' ti'j tkyaqil ti'xti', ex ax t-xnaq'tzb'il, mya chajyolil. Kyjunam kyib'e' kukxju' tuk'i'l Krist kse'nx matxi' t-xnaq'tza Xewb'aj Xjan kyeye'. 28Ja'lotzun e'tal nk'wal, kymujb'am kyib'e' kukxju' tuk'i'l Krist, tu'ntzun q'uqli qk'u'j ajtul jumajtl ex tu'n lalun qokub' ch'ixwi twitz ajtul. 29Loq'tzun b'i'ntl kyu'ne' tnik'alti'j Jesukrist, tz'elx kynik'e' qa kykyaqilju' nche b'inchante tnik'alilti'j tk'wal Dyos qe'.

will be added

X\