1 Ja'lo chin yolile' kyi'ju' alu'mj nche kub' q'o'n kwitz witzleb'. Axte' nq'umli: qa qkyaqil qojtzqi'n ax; atzu'n ojtzqib'l nok te nimjtib'il, atzunte' tk'u'jlalil nonin tu'n tch'iyju' tnam. 2 Qa ati jun toj tnab'l qa ati tojtzqib'l, na'mx telte' tnik' ti'ju' ntma'n qa tojtzqi'n. 3 Qatzun ati jun ntk'u'jla'n Dyos, ojtzqi'n tu'n Dyos. 4 Atzunte' tu'n qch'yonte kychib'jil alu'mj kub'ni q'o'nqe' kwitz witzleb', kanli qwitz mixti'te jun witzleb' toklen twitz tx'otx', naq o'kxte' jun Dyos ati. 5 Maskye ate'kye' nche okq'o'n te dyos twitz kya'j ex twitz tx'otx' (ex kse'n na'j txqan dyos ex txqan manb'aj ati), 6 atzunqe naq jun te Dyos ati, aju' Manb'aj, jatzajna'qe' tkyaqilju' ati tu'nju' ato'qo'. Ex naqjun Qajaw, Jesukrist, tu'nte ate' tkyaqilju' ti'xti', ex tu'nte ato'qo'. 7 Mitzunya kykyaqil kyojtzqi'nju' ax. Ate' junjun naq'lqe'toq tu'n kk'ulun kye witzleb', inx che'x kych'yo'n chib'j nkyxima'nxi' qa kub' q'o'n kwitz tilb'ilal; ex mixti' tipumal knab'l, nkxima'n qama che tz'ilix kyu'n witzleb'. 8 Ate' ajqk'monjtz tu'n Dyos mya tu'nju' nxi' qwan; mya majxwit b'a'n qoxi'xqe tu'nju' nxi' qwan, ex mya taq'wixqo' tu'nju' min nxi' qwan. 9 Laluntzun tz'ajb'enju' tzaqpib'l lu kyu'ne' tu'n kykub' tz'aqju' mya kuwqe' toj kyokslab'l toj il. 10 Qa kanliqe' ti'xti' lu twitza, makub' qeya wal janche nimeta' witzleb', ex matz'ok ka'yi'na tu'n jun ak'a'j okslal, jaku' ajunte txi' ch'yonteju' chib'j kub'ni q'o'n twitz jun witzleb'. 11 Qatzun tu'nju' ati tojtzqib'la, nkub' tz'aqju' na'mxi'x tkuwix toj tokslab'l tu'na, aju' kyim Krist tu'n tpaj. 12 Ajtok tq'o'na ttx'u'jilju' na'mxi'x tkuwix toj tokslab'l, axju' Krist nok tq'o'na ttx'u'jil. 13 Qu'mtzun, qa tu'n tpaj nwaye' makub' tz'aq jun okslal wu'ne', mixti' tu'n nch'yon chib'je' tu'n lalun b'inchan il juntl tu'npaje'.
