1 Corintios 7

1Atzun ja'lo che xe'l nq'o'ne' tzaq'web'l kyeju' kxjele' e'tzaj kyqanine' toju' kyuje'. Awtlo b'a'nju' lay che mjeye'; 2naq aju' jaku' che'xe' toj ajpaji'n, teyile junjun tu'n tten t-xu'jilkuxi'x, ex teyile junjun qya tu'n tten tchmilku'xi'x. 3Mixti' tu'n tkub' t-xk'a'yi'n tib' chmilb'aj teju' t-xu'jil ex ikxju' xu'jilb'aj teju' tchmil. 4Mya axwitte' qya tajaw t-xmilal, qu'n aju' tchmil ati toklen ti'j, ex mya axwit chmilb'aj tajaw t-xmilal, qu'n aju' t-xu'jil ati toklen ti'j. 5Qu'mtzun lalun kub' txk'a'yu'n tib'ju' chmilb'aj teju' t-xu'jil exju' xu'jilb'aj teju' tchmil, o'kxtzun qama kyej b'entti'j kyu'ne' tu'n lalun kymojb'a jte' q'ij kyib'e' tu'n kytene' toj na'j Dyos. Tb'ajlenxi'tzun kyna'j Dyose' b'a'n tu'n kmujb'antetl kyib'e'; qu'n qa nimxi'x toj jaku' che kub' tz'aqe' tu'n tajaw il. 6Tkyaqil ja'lu jun nab'l nxinma'ne' kyeye', mya jun chaq'b'il. 7Aju' toj nwitze' awtlo b'a'nju' tu'n kkyaje' kse'nwe'; naq aju' teyile junjun tzajni q'o'n toklen tu'n Dyos, chukchaq toklen junjun. 8Nxi' nma'ne' kye qpoj ex kyeju' kyimni kychmil, a b'a'nju' tu'n kkyajten lay che mje, kse'nwe'. 9Qatzun lay b'ent t-xikyka'yi'n kyib', b'a'n tu'n kmje, qu'n a b'a'nju' tu'n kmje kyetwitz naq npon kk'u'j. 10Aye'tzu'n mjeb'niqe'tl, kxe'l nma'ne' jun chaq'b'il kye, mya nchaq'b'ile', tchaq'b'il Qajawte': lalun tz'el tpa'ntib'ju' qya ti'j tchmil. 11Qatzun matz'el tpa'ntib'ju' qya ti'j tchmil, tu'n lalun mjetl mujqa tu'n kb'antl tuk'i'l tchmil. Ex ikxju' ichan tu'n lalun kub' tpa'ntib' tuk'i'l t-xu'jil. 12Atzu'n kye txqantl, kxe'l nma'n junwe' kynab'l, mya Qajaw inq'mante, qa mya okslal t-xu'jil jun okslal ex b'a'n toj twitz tu'n tanq'in tuk'i'l tchmil, aju' okslal lalun tz'ex t-xla'ja'n t-xu'jil. 13Qatzun jun qya okslal mjeb'ni tuk'i'l jun mya okslal ex b'a'n toj twitz tu'n tanq'in tuk'i'l t-xu'jil, lalun kub' tpa'ntib' tuk'i'l. 14Qu'n inxjansetju' ichan mya okslal tu'nju' okslal t-xu'jil mojli tuk'i'l; exju' qya mya okslal inxjanset tu'n okslalju' tchmil mojli tuk'i'l. Naqwit min, tz'il qe'wtlo' kk'wale'; atzunte' ja'lo aye'jun kxolju' ttanam Dyos xjan. 15Qatzun ilxi'xti'j tu'n chmilb'aj mujqa xu'jilb'aj mya okslal tu'n tkub' kypa'n kyib', kypa'nkukib'. Tojtzu'n ja'lu tzaqpi'nte' okslal, qu'n mache txkonjtze' tu'n Dyos tu'n ktene' toj nak'b'il. 16¿Makanlitzun twitza xu'jilb'aj qa kb'antel tkletju' tchmila tu'na? ¿Ma b'i'ntzun tu'na chmilb'aj, qa kb'antel tkletju' t-xu'jila tu'na? 17Se'nku'x ktene', teyile junjun ati tu'n tanq'in se'nx toklen tzajni tq'o'n Qajaw te, kse'nx tten tej ttxkonjtz tu'n Dyos. Atzun nuk'b'ilju' nxinq'o'ne' kye kykyaqil okslal. 18Qa toktl techel jun okslal ti'j tchib'jil tej ttxkonjtz tu'n Dyos, lalun kub' tewa'n; qatzun min tok techel juntl ti'j tchib'jil tej ttxkonjtz tu'n Qajaw, lalun tz'oktq'o'n techel ti'j tchib'jil. 19Qu'n myate nojqelanju' qa tok techel mujqa min tok techel ti'j tchib'jil, ate nojqelanju' tu'n kyxitb'i'n tchaq'b'il Dyos. 20Teyile junjun tu'n tkyejten se'nx tten tej ttxkonjtz tu'n Dyos. 21Qa lq'o'n majintoqa tej ttxkonjtza tu'n Qajaw, lalun b'isuna; exna' atita tu'me'l tu'n ttzaqpeta, b'a'n tu'n toktilil tu'na. 22Atej lq'o'n majintoq tej ttxkonjtz tu'n tokslan, tzaqpi'ntlte' tu'n tajb'en te Qman Dyos; ex ikxju' tzaqpi'ntoq tej ttxkonjtz tu'n Dyos, lq'o'n majinte' ja'lo te Krist. 23Lq'o'n qe'tlkye' ja'lo tu'n Dyos; lalun kyaje' tu'n kyoke' te lq'o'n majin te juntl xjal. 24Ikytzu'n e'ntzik ex e'witz'in, teyilex junjun tu'n tkyejten se'nx tej ttxkonjtz tu'n Dyos. 25Aye'tzu'n qya min mjeb'niqe', mixti' jun tchaq'b'il Dyos ti'jkuxi'x ja'lu tu'n txinma'ne' kyeye', kxe'l nma'ne' aju' nkane toj nwitze', kse'n q'uqli kk'u'j okslal wi'je' naq tu'n tlaqb'il tk'u'j Qajaw. 26A b'a'nju' toj nwitze' tu'n tkyejten junjun kse'nx tten, tu'n tpaj ch'uẍju' tq'ijlalil nqo anq'ina'. 27Qa ati t-xu'jila, lalun kyej ttzaqpi'na; qatzun mixti', lalun tjoya. 28Qama mjeya, min nb'inchan ila; qatzun jun qya qpoj mamje, ex min nb'inchan il. Naq aye' nche mje che yajtel kse'nx nb'aj toju' qchwinqlal xjalqo', awtlo wajb'ilju'ye' tu'n lalun che okye' toj. 29E'ntzik ex e'witz'in, awajb'ilju'ye' tu'n txinma'ne' kyeye': Naq jte' q'ijxtl qu'n. Qu'mtzun aye' mjeb'niqe' tu'n kyanq'in ku'wtloj mya mjeb'niqe'; 30aye' nche b'isun ku'xwitloj toj tzalajb'il ta'qe', aye'tzu'n nche tzalaj ku'xwitloj ate' toj b'is; aye' nche lq'on ti'xti' ku'xwitloj mixti' ati kye; 31aye' nche kanb'an toju' tq'ijlalil ja'lo tu'n kyanq'in ku'xwitloj mixti'xte nkykanb'a'n, qu'n kb'ajelte' nqka'yi'n ja'lo twitz tx'otx'. 32Wajb'ilwe' tu'n lalun b'ajx kyk'u'je'. Aju' mya mjeb'ni nb'ajx tk'u'j ti'ju' tajb'il Dyos ex tu'n tajb'en te Dyos; 33atzunte' mjeb'ni nb'ajx tk'u'j kyi'ju' ti'xti' tzalu tu'n ttzalaju' t-xu'jil ti'j, 34ikytzu'n pa'na'tib'. Ex ikxju' qya mixti'tl tchmil exju' txin mya mjeb'ni, nb'ajx tk'u'j ti'ju' tajb'il Qajaw, tu'nju' xjansa'n t-xmilal ex tanmi; atzu'n qya mjeb'ni nb'ajx tk'u'j kyi'ju' ti'xti' tzalu ex tu'n ttzalaj tchmil ti'j. 35Nxinma'ne' lu kyeye' te jun b'a'n kyeye' ex tu'n kyanq'ine' toj b'a'n, tu'n kyajb'ene' te Qajaw mixti' maqb'il kyeye', myanaqwit tu'n kkub' nmyo'ne', 36Qa ati jun b'a'n toj twitz tu'n tmje tuk'i'lju' jyo'n tu'n, qa matxi' pon tab'q'i tu'n tmje, ex nt-xima'n qa a b'a'nju' toj twitz, b'inchamju' b'a'n toj twitz; b'a'n tu'n tmje, qu'n mya il te'. 37Qatzun ati juntl min nojqelan toj twitz, ati tzaqpib'lte tu'n tb'inchanteju' b'a'n toj twitz, qama kub' t-xima'n toj tanmi b'a'nxi'x tu'n lalun mje, b'a'n ktb'incha'. 38Ikytzu'n, qama mje tuk'i'lju' b'antnitl kyol tuk'i'l, b'a'n ktb'incha'; qatzun min xmje, b'a'nxi'x ktb'incha'. 39Aju' qya mjeb'ni, tojtkwent tchmil ta' akx itz'ju' tchmil; qatzun ma kyimju' tchmil, kjelju' qya lu tzaqpi'n tu'n tmje tuk'i'l juntl b'a'n toj twitz, o'kx qa jun okslal. 40Ape'we' nkane toj nwitz jaku' tzalajb'ilxi'x qa min xmjetl. Aweju'ye' nkane toj nnab'l, ex nkane toj nnab'le' ati T-xew Dyos toj wanmiye'.

will be added

X\