1 Corintios 6

1¿Tiqu'n nche'xa'ye' kywitz ajkawil mya okslal se'n ati jun q'oj kxole', ex mya kwitz okslal nche'xa'ye' nk'ulte? 2¿Ma mixtzunti' b'i'n kyu'ne' qa aye' okslal che xjelul kyeju' mya okslal? Qatzun aye'ye' che xjelul kyeju' mya okslal, ¿tiqu'ntzun min nb'ant kynk'unteju'ye' ti'xti' mya nim twitz lu? 3¿Ma min b'i'n kyu'ne' qa ikyqe'xju' anjl che okyel toj xjel qu'n? ¡Tu'me'lxi'xte' tu'n kynk'etju' ti'xti' lu toju' qchwinqlal qu'n! 4Qama tzaj kyq'oje tu'n tpaj ti'xti' toju' chwinqlal ja'lo, ¿tiqu'n aye' xjal mixti' kyoklen kyxol okslal nche okkyq'o'ne' te k-ajkawile'? 5Nxinma'ne' lu tu'n kkub' ch'ixwiye': ¿Mamixtzun alo' jun kb'antel tkawin kyi'ju' ti'xti' nb'aj kxol okslal? 6¡Myanaq o'kx nche q'ojin junjun okslal kyi'j junjuntl, ex nche'xtle' q'malte kq'oje' kwitz ajkawil mya okslal! 7A myab'a'nju' tu'n nche q'ojine' kxolxe'. ¿Tiqu'n min nik'xju' mya tnik'alti'j nb'inchanjtz kyu'ne'? ¿Tiqu'n min nkyjo'ne', maswitlo b'a'n tu'n kyalq'anjtze'? 8¡Aye'pekye' nche b'inchante mya tnik'alti'j expe' nche alq'ane' kyi'jxju' okslal kxole'! 9- 10¿Ma min b'i'n kyu'ne' qa aye' b'inchalte mya tnik'alti'j lay che ok toj tkawb'il Dyos? Lan kyaq' sb'u'kyib'e', qu'n kkyaqilkye' ajpajil mo yaẍil, e'witzleb'il, pa'l mjeb'le'n, exqe' ichan nok kyq'o'n kyib' te qya, e'ichan npon kyk'u'j kyi'j ichan, exqe' nche alq'an, exqe' nche jamjon, e'tx'ujtenil, e'txkol il, exqe' eleq', lay che ok toj tkawb'il Dyos. 11Aye'toq junkye' kxol ja'lu tnejel; atzu'n ja'lo matxi' kk'ame' ẍtilsab'lkyeye', e'xjansete' ex mache k'monjtze' tu'n Dyos toj tb'i Qajaw Jesukrist ex tu'n T-xew Qman Dyos. 12Axte' se'n nq'umli kjalu: Tzaqpi'n qinwe' tu'n nb'inchante titi' wajb'il, chij, naq a mya tkyaqil b'a'n tu'n tb'inchet. Tzaqpi'n qinwe' tu'n nb'inchanteju' wajb'il, ex lay waq' anb'ile' tu'n nkawinjtze'. 13Ex nq'umli kjalu: Te qk'u'jte' wab'j, ex tex wab'ju' qk'u'j. Axte', atzunte' Dyos b'inchalte tten te kykab'il. Atzunte' qxmilal mya te ajpajil, te Qajawte', ex qeju' Qajaw. 14Kse'n jaw anq'in Qajaw tu'n Dyos, ex ikxqe qo jawil anq'in tu'n tipumal. 15¿Ma mixtzunti' b'i'n kyu'ne' qa ex t-xmilal Krist kxmilale'? ¿Ma oktzun k'okyel nq'o'ne' ch'i'n t-xmilal Krist lu te t-xmilal ajpajil? ¡Lay! 16¿Ma min b'i'n kyu'ne' ajtmje jun ichan tuk'i'l jun qya ajpajil, nche ok junx wnaqqe'? Intma'n toj Tu'jil: Kykab'il che okyel naku'j jun wnaqqe', chiju' tz'ib'a'n. 17Ajtzun tok muje jun tuk'i'l Qajaw, inok te naqjun tuk'i'l toj xewb'aj. 18Kpa'miltzun kyib'e' ti'ju' ajpaji'n. Alkyexku' juntl il matb'incha jun xjal, min nyajun te t-xmilal; qatzun matxi tq'o'ntib' jun xjal toj ajpaji'n, nb'inchan il ti'jxju' t-xmilal. 19¿Ma min b'i'n kyu'ne' qa tja Xewb'aj Xjan kyxmilale', ex najli Xewb'aj Xjan saj tq'o'n Dyos kyeye' toj kyanmiye'? Myaye'xkye' kyajawe', 20qu'n lq'o'n qe'tle' tu'n Dyos. Qu'mtzun ati tu'n kynimanteye' Dyos toj kxmilale'.

will be added

X\