1 Kanex toj kynab'le' qa naq onil qo'ye' ti'j Krist, tzaj q'o'n qoklene' tu'n txiqma'ne' t-xim Dyos e'wa'ntoq nejtl. 2 Atzunte' matk'am jun toklen, ati tu'n tyek'u'nte qa kb'entel tqe tk'u'jlalil. 3 Min nchin ximanxi'xe' qama chin okye' toj xjel kyu'ne' mujqa kyu'n ati kyoklen toj kawb'il twitz tx'otx'. Expe' lay chin xjelune' tewib'e'. 4 Min na'n wu'ne' qa ati jun myab'a'n oje nb'inchaye', myatzun tu'n ja'lu okwit nma'ye' qa mixti' wile'. Ate Dyos q'malte qa ati wile' mujqa mixti'. 5 Qu'mtzun lalun kmanaj jun kyole' ti'j juntl: che ayone' ajtul Qajaw, ate kb'el chik'b'a'nteju' e'wa'n toj qlolj exju' kxim xjal toj kyanmi. Teyiletzun junjun ktk'ma' ninb'ilte tu'n Dyos. 6 E'ntzik ex e'witz'in, nxinma'ne' lu te jun b'a'n kyeye' ex nkub' nq'o'ne' Apolo ex ayinku'ye' te yek'b'il. Nxinma'ne' tu'n tel kykno'ne' qi'je' tu'n lalun che exe' ti'jxi' tz'ib'a'n, ex tu'n mix-a'lo' jaw tnima'ntib', ex tu'n lalun kmaye' qa b'a'nxi'x jun tmajin Dyos kyetwitz juntl. 7 ¿Alkyetzun sok q'onte toklena kyib'aj txqantl? ¿Titi'tzunta ati te mya Dyos saj q'onte teya? Qatzun a Dyos saj q'onte teya, ¿tiqu'ntzun ntnima'na' tib'a, kuxi'xtej axa xkanb'ante? 8 Toj kynab'le' naku'j q'inun qe'ye', ex ati tkyaqilju' kyajb'ile', ex naku'j nimaqkawil qe'tle' mixti'tl nojqelan qonb'ile' kyeye'. ¡Naqwit nimaqkawil qe'xi'xe', tu'nwtlo qok ch'inqe' toju' kkawb'ile'! 9 Inela' toj nwitze' naku'j ayo'qe' apostlqo'ye', maqo kub' q'o'ne' tu'n Dyos toj mankb'il tenb'el, naku'j maq'manjtz tu'n qkub'yo'ne'. Maqo oke' te kyka'y xjal, te kyka'y anjl ex te kyka'y ichan. 10 Naq tu'nel Krist maqo oke' naku'j mixti' qnab'le'; aye'tzunkye' mache oke' te k'atz kwi'ye' tu'n Krist. Mixti'qe' qipumal, aye'tzunkye' kuwqe'ye'. Ik'o'n qo'ye', aye'tzunkye' nima'nqe'ye'. 11 Ljo'nx tik'xqe' we'yaj qu'n, k'waj ex mixti' qxb'alune'; nqo ilinjtze' kyu'n xjal, mixti' qjaye' qeku'ye' 12 ex nqo siktiye' nqo aq'unane' tu'n qq'ob'e'. Nxi' qqani'ne' b'a'n kyib'aju' nche qanin taq'wix qib'aje'; ljo'n toj qq'ije' ex nik'x qu'ne'. 13 Nqo yoline' b'a'n toj me'sb'il kyeju' nche ilin qi'je'. Naku'j tz'is qo'ye' kye xjal, maqo oke' mixti'x qajb'ene' kye. Ikxtzun nqo senjtzju'ye' ja'lo. 14 Nxi' ntz'ib'a'ne' lu te q'ob'l knab'le', naku'j nk'wal qeku'xi'xe', mya tu'n tel kych'ixawe', qu'n nche nk'u'jla'ne'. 15 Se'n ktene' okslalqe'ye', maskye ate' jumutx' jok'al xnaq'tzalkyeye' (10,000), mya b'a'npunkye' kyman. Ayinwe' kmane', e'okslane' te Krist Jesus tej txinma'ne' tpakb'al b'a'n kyeye'. 16 Ikytzu'n nxi' nkub'sa'ne' kyeye' tu'n kb'inchanteye' kse'nwe'. 17 Qu'mtzun xinchq'o'ne' Timotey, ju' nk'wale' nchin tzalaje' ti'j ex b'a'n k'wal toj Qajaw. A kxe'l na'nte kyeye' se'nqine' okslalqine' te Jesukrist, kse'nx nxinxnaq'tza'ne' kxol kkyaqil okslal jachaq nchinik'a'ye'. 18 Ate' junjunkye' matxi' qe kk'u'je', toj kynab'le' qa lay chin pontle' ka'yilkyeye'; 19 qatzun tajb'il Qajaw, wajb'ile' tu'n npone' lwiy xb'etzalkyeye'. Knla'tzuntze' qa nkb'incha'nju' nknima'n kyib', qa myanaq o'kx nel kma'n. 20 Qu'n mya naqx tu'n qyolin ti'jte' tkawb'il Dyos, ex ikx tu'n tb'inchet. 21 ¿Ti'tzunkye' kyajb'il: ma tu'n npone' tu'n ttz'e'yset kwitze', mujqa tu'n npone' ka'yilkyeye' toj tzalajb'il ex toj tk'u'jlalil?
