1 Corintios 3

1E'ntzik ex e'witz'in, min b'ent nyoline' kyuk'ile' kse'n nchin yoline' kye okslal atitl Xewb'aj Xjan kyuk'i'l, nyoline' kyeye' kse'n nchin yoline' kye xjal na'mx telxi'x kynik' te Qajaw, naku'j k'wal qe'ye' na'mx kykuwixe' toj kyokslab'le'. 2Mya ch'uẍju' xnaq'tzb'il xinq'o'ne' kyeye', ikyqe'ye' se'n ne'ẍ tzma nch'u'n, na'mx tb'ent txi' twa, qu'n na'mx tb'ent kywanteye' wab'j kuw. ¡Na'mxpe' tb'ent kywanteye' ja'lo, 3kukx kytenju'ye' se'nqe' xjal na'mx kyokslan! Inx tx'a'lti'j kyk'u'je' ex nkyik'o'n kyib'e', na'mx kykuwixe' ex axnkyb'incha'ne' kse'nkye xjal na'mx kyokslan. 4Qu'n junjun inq'mante: T-xnaq'tzb'en Pawl qinwe', chij, junjuntl inq'mante: T-xnaq'tzb'en Apolo qinwe', chij, axnkyb'incha'ne' kse'nkye xjal na'mx kyokslan. 5¿Alkyetzu'n Apolo? ¿Alkyetzu'n Pawl? Naq ajb'el qo'ye', tu'n qaq'unb'ene' ẍeokslana'ye'. Teyile junjunqe' maqb'inchaye' qaq'une' tzaj tma'n Qajaw: 6ayine' ẍin awan, atzun Apolo x-a'linte awal, atzunte Dyos nch'isanteju' awa'n. 7Myaxi'xte nch'isanteju' awtju' nawan ex myaju' na'linte, ate Dyos nb'inchante tkyaqil, qu'n ate nch'isanteju' nku'x awet. 8Junqe'xkye' nche awan kyuk'i'lju' nche a'lin, okpe' che chjonjtzelkye' tu'n Dyos teyile junjun se'nxju' taq'un xb'ant. 9Qwitz aq'unal qib'e' toju' qajb'eb'le' te Dyos, aye'tzunkye' tawal Dyos ex tja Dyos qe'ye' ljo'n tjaw b'inchet. 10Ayine' b'inchal ja ati wojtzqib'le', tzaj tma'n Dyos tu'n tk'u'j weye' tu'n kykub' nb'incha'ne' tq'uqlil ja, aye'tzun txqantl njaw kyb'incha'n ja kyib'aj. Teyiletzun junjun ati tu'n t-xitka'yi'n se'n tu'n tjawa' tb'incha'n, 11mix-a'lo'tlte kb'antel tkub' tq'o'n juntl tq'uqlil ja ti'jxi' matxi' kub', aku' Jesukrist. 12Junjuntzun jaku' jawtb'incha'n q'anpwaq, saqpwaq, ex tb'anil ab'j, mo tze, mo ch'um, mo tqan kjo'n tib'aju' tq'uqlil lu; 13teyiletzun junjun kq'ancha'lixel taq'unb'en toju' tq'ijlalil ajkyok xjal toj xjel; qu'n tzulju' tq'ijlalil lu tuk'i'l q'aq', atzu'n q'aq' kyek'ulte se'nchaq taq'unb'en junjun matxi' b'aj tb'incha'n. 14Qama tzik'xtu'n taq'unb'en junjun ex min xb'aj tu'n q'aq', ktzajel q'o'n twitk'u'j; 15qatzun mab'aj tz'e'yju' taq'unb'en, kb'el naju' taq'unb'en, atzunte ikyk'okyela' se'n jun xjal matzaqpaj toj q'aq'. 16¿Ma mitzun jun b'i'n kyu'ne' qa tja Dyos qe'ye', ex ati T-xew Dyos toj kyanmiye'? 17Alkye makub' xitunte tja Dyos, a Dyos kb'el xitunte, qu'n xjante' tja Dyos, atzu'n tja Dyos lu aye'ye'. 18Lalun ksb'u kyib'e': qa ati junkye' atixi'x tnab'l toj twitz kse'n kynab'l xjal toju' tq'ijlalil ja'lo, q'onktib' mixti' b'a'n tu'n, tu'ntzun tten tnab'l axxi'x. 19Anate' tete' Dyos, naq toj kywitz kye xjal nok tu'nju' kynab'l toju' tq'ijlalil ja'lo. Ti'jtzu'n lu ntma'n toj Tu'jil: Inche t-xpatxab'i'n Dyos ati kynab'l tojxju' nb'ajkub' kyxima'n, chij. 20Ex ikx intma'n: Tojtzqi'n Qman Dyos kximju' ati knab'l naqx toj kywitz nok, chiju' tz'ib'a'n. 21Qu'mtzun mix-a'lo'te tu'n tjaw tnima'ntib' ti'ju' kyex xjal; tkyaqilte' ti'xti' lu kyeye': 22Aju' Pawl, Apolo, Sepas, ju' ati twitz tx'otx', chwinqlal, kamik, aju' ati ja'lo exju' tzul; kyeye' tkyaqil, 23ex te Krist qe'ye', atzunte Krist te Dyos.

will be added

X\