1 Corintios 2

1E'ntzik ex e'witz'in, tej npone' q'malteju' t-xim Dyos e'wa'n kyeye', mya kyuk'i'l nimaq yol mo nimaq nab'l xa'nma'ne' kyeye'. 2Ex tej ntene' kxole', mya wajb'ile' tu'n tb'iyet juntl ti'xti', o'kx tu'n kb'inteye' Krist, ex axi'xju' tu'n kb'inteye' Krist jawq'o'n twitz krus. 3Mixti'toq wipumale' ex intoq chin lu'lune' tu'n xob'el tej npone' kwitze', 4ex tej nyoline', mya kyuk'i'l yol te nimaq nab'l xa'npakb'a'ne' tpakb'al b'a'n tu'n tkub'ti'j knab'le'. Ana' tel kyeju'ye' kynik' tej kylonteye' Xewb'aj Xjan ex tipumal Dyos, 5tu'ntzun tokten kyokslab'le' ti'ju' tipumal Dyos ex mya ti'j knab'l xjal. 6Intzun che ajb'enkye' yol nimaq kynab'l kyxolju' matxi' che kuwix toj kyokslab'l. Myaju' kynab'l xjal ex mya kynab'lju' nche kawin twitz tx'otx', qu'n xi' tb'aj kye'lu kyipumal. 7Tnab'l Dyos te'lu min b'i'n kyu'n xjal, t-xim Dyos e'wa'n ttzajlenx na'mxtoq tb'inchante kya'j ex tx'otx', tu'n qlonte tajwalil Dyos. 8Min nelkynik'ju' nche kawin toj tq'ijlalil ja'lo ti'ju' lu, naqwit elkynik' ti'j, miwtlojun jawkyq'o'n Qajaw ati toj tajwalil twitz krus. 9Ikytzu'n se'n ntma'n toj Tu'jil: Ate' ti'xti' b'incha'nqe' tu'n Dyos tu'n txitq'o'n kyeju' nche k'u'jlante mixa'lo'xi' oje ka'yinte mo b'inte, tk'i'xpe'wt jun xjal oje kub' ximante, chiju' tz'ib'a'n. 10Aye'tzun ti'xti' ja'lu oje tb'incha Dyos tu'n telqnik' ti'j tu'nel Xewb'aj Xjan, qu'n atzunte nka'yinteju' tkyaqil, expe' ntka'yi'n tkyaqilju' tojtzqib'l Dyos min nel qnik' ti'j. 11¿Mix-a'lo' jun xjal kb'antel teltnik' ti'j titi' ati toj tanmi jun xjal, axte xjal b'ilte na'n tu'n toj tanmi? Ikyxtzu'n, o'kxte Xewb'aj Xjanb'ilte titi' xima'n tu'n Dyos. 12Ayo'tzunqe mya jun xewb'aj te twitz tx'otx' xqk'am, aku' T-xew Dyos xqk'am, tu'n telqnik' ti'ju' matxi' tb'incha Dyos tu'n t-xtalb'il qi'j. 13Nche'x qma'ne' lu kyu'n yol saj tyek'u'n Xewb'aj Xjan qeye', mya kyu'nwt yol xb'aj qkno'ne' tu'nx qnab'le'. Nche'x qchik'b'a'ne' te xewb'aj lu kyu'nx yol te xewb'aj. 14Aju' xjal mixti' T-xew Dyos tuk'i'l min ntk'mo'nju' ntzaj tq'o'n T-xew Dyos, qu'n naku'j mixti' tnab'l toj twitz. Ex lay kane toj twitz, qu'n o'kx tu'n T-xew Dyos che kaneb'ela'. 15Atzunte' ati T-xew Dyos tuk'i'l, in ik'twitz ti'j tkyaqil alkye b'a'n ex alkye myab'a'n, ex mix-a'lo' juntl q'malte qa myab'a'nju' ntma'n. 16Ina' tma'n toj Tu'jil kjalu: ¿Alkye ojtzqilte titi' nt-xima'n Qajaw? ¿Alkye kq'ol xnaq'tzb'il te? chij. Atzunqe atiju' tnab'l Krist quk'i'l.

will be added

X\