1 Corintios 16

1Atzun ti'ju' oyaj kjawil b'uyet tu'n txi' kye okslal, kb'inchame' kse'nx xinxnaq'tza'ne' kye okslal toj tx'otx' Kalasya. 2Teyile junjunkye' k'elel tpa'n toyaj kb'eltq'o'n toj q'ij domink, kse'nx matkanb'a, ex tu'n t-xik'uyet, tu'ntzun min nojqelan tu'n tjaw b'uyetl ajnpone'. 3Ksk'onqe'ktze' okslal b'a'nqe' toj kwitze', tu'n kxinchq'o'ne' Jerusalen q'olte oyaj b'u'yi'ntl kyu'ne' ajnpone', ex che kxe'l nsma'ne' u'j kyi'j tu'n kk'monjtz b'a'n kyu'n okslal. 4Ex qa b'a'n toj kywitze' tu'n nxi'ye', che kxe'ltzuntz wuk'i'le'. 5Ajnxi'ye' kyuk'i'le', ati tu'n wik'e' toj tx'otx' Masedon; wik'lenxi'tzune' Masedon, chin pomele' Korint. 6Qajlo chin kjel jte' q'ije' kyuk'i'le' mujqa k'elexju' jb'alil wu'ne' kyxole'; b'a'ntzun kyonintze' wi'je' toju' nb'eye' ja ma chinxa'tle'. 7Min wajb'ile' naq tu'n wik'e' ka'yilkyeye' ja'lo, wajb'ile' qa axtajb'il Dyosju' tu'n nten jte' q'ije' kyuk'i'le'; 8oktzun chin kjeltene' Epeso tzmax ajtul tq'ij Kab'naqlajoj q'ij, 9qu'n matxi' q'onjtz anb'il weye' tu'n waq'unane', tu'npetzu'n nim nche q'ojin wi'je'. 10Qama pon Timotey kxole', kq'onk tilile' tu'n ttzalaj kxole', in aq'unan toj taq'un Dyos kse'nxwe'. 11Qu'mtzun mix-a'lo' junkye' tu'nwt tel ik'onte; ape' kb'inchamju'ye', kyoninxe' tu'n tljonte tb'e toj nak'b'il, tu'n tul ka'yilweye', qu'n nqo ayone' te kyuk'i'l txqantl okslal. 12Xinkub'sa'ne' te qtzik mo qitz'in Apolo tu'n txi' kyuk'i'l qtzik mo qitz'in ka'yilkyeye', ex mixti' xtaj tu'n txi' ja'lo. Kxe'l ajxi' tten kmuj te. 13Kxq'uqim kyib'e' ex che we'ku'ye' toj kyokslab'le'. Tenx kyipumale' b'a'nxi'x. 14Ex tkyaqilju' makb'inchaye', kb'inchame' tuk'i'l tk'u'jlalil. 15E'ntzik ex e'witz'in, b'i'n kyu'ne' aye' toj tja Estepana e'okslan nejtl toj tx'otx' Akaya, ex aye' matxi' kyaq'kyib' ajb'el kxol okslal. 16Nxi' nkub'sa'ne' tu'n tkub' kb'i'ne' kkawb'ilju' nche ajb'en kse'nte, ex kykawb'il kkyaqilju' nche onin ex nche aq'unan toj taq'un Dyos. 17Nchin tzalaje' tu'n mache ul Estepana, Portunat ex Akayko, tu'nju' mix-a'lo' qe'ye' nk'etze' 18maqe nk'u'je' kyu'n, kse'nxkye. Tz'elx kynik'e' ti'j qa ati kyoklenju' okslal kse'nkye. 19Nxikq'o'n okslal toju' tx'otx' Asya q'olb'eb'l kyeye'. Ex Akyila ex Priska, exqe' okslal nkyb'u'yi'nkyib' toju' tja, nxikyq'o'n nim q'olb'eb'l kyeye' toj tb'i Qajaw. 20Kk'mome' q'olb'eb'l kyu'n kykyaqil okslal. Kyq'olb'em kyib'e' kyxolxe' tu'n xjan ma'tz. 21Ayine' Pawl, nxi' ntz'ib'a'ne' q'olb'eb'l lu kyeye' tu'n nq'ob'e'. 22Qa ati jun min ntk'u'jla'n Qajaw, ¡Tzajxwit taq'wix tib'aj! ¡Kutzaja, Nman Dyos! 23Awt Qajaw Jesus tzaj q'onte t-xtalb'il kyib'aje'. 24Ati nk'u'jlalile' kukxju' kyi'je' toj Qajaw Jesukrist.

will be added

X\