1 Corintios 14

1Kq'onktzun tilile' tu'n tten kk'u'jlalile', ex tu'n ttzaj q'o'n kyoklene' tu'n Xewb'aj Xjan, axi'xpe' tu'n t-xikypakb'a'ne' ntma'n Dyos 2Aju' nyolin kyoj junxi'tl yol, nyolin te Dyos ex mya kye xjal, qu'n mix-a'lo' nkane toj twitz titi' ntma'n. Nche tma'n ti'xti' toj tanmi, ex mix-a'lo' nkane ti'j. 3Atzunte' nq'manteju' ntma'n Dyos, ntchik'b'a'n tu'n tch'iyju' ttanam Dyos, nche tkuwsa'n ex ntq'uqb'a'n kk'u'j. 4Aju' nyolin toj juntl yol, ntb'incha'n te jun b'a'n tex; atzunte' npakb'anteju' ntma'n Dyos, nche ch'iyju' okslal tu'n. 5Wajb'ilwe' naqwit kkyaqile' che yoline' toj junxi'tl yol; naq aju' a wajb'ilxi'xe' tu'n kypakb'anteye' ntma'n Dyos; atzunte b'a'nju' kyetwitz tu'n kyoline' kyoj junxi'tl yol, extzun b'a'n qama pjetju' tnab'l tu'n kych'iyju' okslal tu'n. 6E'ntzik ex e'witz'in, layx tz'ajb'en kyeye' qama chin pone' xb'etzalkyeye' extzun nchin yoline' kyeye' toj junxi'tl yol, nya ape'wt nxinma'ne' kyeye' aju' ntzaj tyek'u'n Dyos, mujqa aju' ojtzqib'l ti'ju' ax, mujqa inwt xinma'ne' ntma'n Dyos kyeye' mujqa jun xnaq'tzb'il. 7Qa min nyek'un kq'ojq'ojelju' chnab' kse'n xux mujqa arpa, lay tz'el tnik'tzil titi' chnab'ilju' nkq'o'n junjun. 8Exqa min xb'ent tq'ajtzetju' chun b'a'nxi'x tojun q'oj, mix-a'lo'xte kb'inchalte tib' tu'n txi' toj q'oj. 9Ikxtzun nb'aju' kyuk'i'le': qa min sajb'enju' yol chik'li tu'n tkaneju' tyol Dyos, ¿se'n taq'wi ajtb'iyet titi' nkma'ne'? ¡Naq nche yolintzuntze' toj kq'iq'! 10Nimte' yol nche yolinjtz twitz tx'otx', ex kykyaqil atiyile knab'l. 11Qatzun min wojtzqi'ne' knab'lju' nyolinjtz, najchaq xjal chin elela'ye' teju' nyolin weye', ex ikxte jun najchaq xjal k'elela' weye'. 12Ikytzu'n, kyajb'il xi'xna'ye' tu'n tten kyoklene' tu'n Xewb'aj, kq'onk tilile' tu'n kytenxi'xju' nche onin tu'n kych'iy okslal. 13Tu'ntzunju', alkye nyolin toj junxi'tl yol, qaninx te Dyos tu'n tb'ent tpjet tu'n. 14Qama chin na'n Dyose' toj junxi'tl yol, nchin na'nwe' Dyos toj wanmi, atzu'n nnab'le' mixti'x ntq'o'n twitz. 15¿Ti'tzu'n tu'n nb'inchantetze'? Ati tu'n nna'n Dyose' toj wanmiye', ex ikx tuk'i'l nnab'le'. Ati tu'n nb'itzane' toj wanmiye', ex ikx tuk'i'l nnab'le'. 16Qatzun majaw tajwali'na Dyos o'kx toj tanmiya, extzun nb'in jun xjalxi' teya, lay b'ent tq'on chjonte tuk'i'la, qu'n lay kane toj twitz titi' ntma'na. 17Qapelo b'a'nte' aq'b'il chjonte tu'na, atzu'n te juntl min najb'en. 18Nchin q'on chjonteye' te Dyos qu'n mas nchin yoline' kyoj junxi'tl yol kyekywitze'; 19atzu'n toj k'u'lb'il wajb'ile' tu'n t-xinma'n jwe' yole' che kaneb'el, tu'n kxnaq'tzet txqantl, kyetwitz junmutx' jok'al (10,000) yol toj junxi'tl yol. 20E'ntzik ex e'witz'in, lalun tz'oku' kynab'le' naku'j k'wal. Che okxe' naku'j k'wal ti'ju' myab'a'n, ex che okxe' tij ichan tuk'i'l che ximane'. 21Intma'n toj Tu'jil: Chin yolile' kyoj junxi'tl yol ex toj kytzi najchaq xjal teju' nintnam lu, ex layx chinx kb'i'ne', chi Qman Dyos, chiju' tz'ib'a'n. 22Qu'mtzun jun techalte' kye mya okslal tu'n qyolina' toj junxi'tl yol, mya kyeju' ati kyokslab'l. Atzu'n tu'n tpakb'etju' ntma'n Dyos, jun techal kyeju' ati kyokslab'l, mya kyeju' mya okslal. 23Qu'n ajkyb'uyinte kyib'ju' okslal, qa kykyaqil nche yolin kyoj junxi'tl yol, exqa matz'okx jun xjalxi' mujqa mya okslal kxole', k'okyel tq'o'n qama tz'ok toj kwitze'. 24Atzunte' qa kkyaqile' nche q'manteju' ntma'n Dyos, qama tz'okx jun mya okslal mujqa jun xjalxi' kxole', kkaneb'el toj twitz ex kxel t-xima'n se'nta' twitz Dyos ajtb'inteju' nkma'ne'. 25Ikytzu'n kjel q'ancha'lixju' e'wa'n toj tanmi, kb'el meje ex kk'ulul te Qman Dyos, ex k'elel tnik' qa axxi'x ati Dyos kxole'. 26Ja'lotzun e'ntzik ex e'witz'in, ajkyb'uyinte kyib'e', junjun b'a'n tu'n kb'itzan b'itz, junjuntel b'a'n tu'n kxnaq'tzan, mujqa tu'n kpakb'anteju' ntzaj tyek'u'n Dyos kye, junjuntl tu'n kyolin kyoj junxi'tl yol, mujqa tu'n kpjetju' yol. Naq aju' kb'inchame' tkyaqil toj ttxolil. 27Ex ajkyoline' kyoj junxi'tl yol, tu'n kb'inchante kab'e' mujqa oxe' qa b'a'npunxi'x, ex toj junjunali'n; expe' ati tu'n tten jun pjulkyeju' yol lu. 28Qatzun mix-a'lo' tu'n tpjunte, lalun che yolin kyoj junxi'tl yol toju' b'u'yb'il kyib'e', che yolin kjunalx ex te Dyos. 29Ex ikx qa ate' pakb'alte ntma'n Dyos, b'a'n tu'n kyolin kab'e' mo oxe', aye'tzu'n txqantl tu'n kb'inte b'a'nxi'x tu'n telkynik' ti'j qa a Dyos inq'mante mujqa mya. 30Qatzun matzaj tyek'u'n Dyos tyol te juntl q'uqli atzu', ati tu'n tkyaj ttenb'a'n tyolinju' nyolin nejtl. 31Tu'ntzun kkyaqil, teyile junjun ajtpon kmoj te, kxel tpakb'a'nju' ntzaj tma'n Dyos, tu'ntzun kxnaq'tzet kkyaqil ex tu'n kkuwset. 32Aju' t-sanjelal Dyos kka'yilteju' oklenj tu'n tpakb'etju' ntma'n Dyos, 33Qu'n ate Dyos tajb'il aju' nak'b'il ex myaju' xitb'il. Tu'n tb'inchet axju' nb'inchet kxol okslal, 34ati tu'n kkub' numeju' qya toj kk'u'lb'ile', qu'n min q'o'n kye tu'n kyolin. Ati tu'n kq'a' kawi'kyib' te kychmil kse'n ntma'n toj kawb'il. 35Qa kyajb'il tu'n telkynik' ti'j jun ojtzqib'l, b'a'n tu'n kxjelun te kychmil kja; qu'n myab'a'n tu'n tyolin jun qya toj k'u'lb'il mo toj kb'uyb'il kyib' okslal. 36Kna'ku'ye' mya kyuk'i'le' tzaja' qe tyol Dyos, ex mya oqe'kxe' matxi' che k'monte. 37Qa ati jun t-sanjelal Dyos toj twitz, mujqa xewsa'n tu'n Xewb'aj Xjan toj twitz, k'elel tnik' qa tchaq'b'il Dyos nxi' ntz'ib'a'ne' kyeye' lu. 38Qatzun min sel tnik' ti'j, ex min ojtzqi'n tu'n Qman Dyos. 39Qu'mtzun e'ntzik ex e'witz'in, kq'onk tilile' tu'n tten kyoklene' q'malte ntma'n Dyos, ex lalun kmaqe' tu'n kyolinjtz junxi'tl yol; 40naq aju' kb'inchame' tkyaqil toj ttxolilti'j ex tuk'i'l me'sb'il.

will be added

X\