1 Corintios 13

1Qama chin yoline' kyoj kyol xjal, qajpe' toj kyol anjl, exqa mixti' nk'u'jlalile', naq jun k'uxb'il qine' nk'ojinjtz mujqa txijtxij ntowob'ti. 2Ex qa ati woklene' tu'n txinma'ne' ntma'n Dyos, ex nkane' tkyaqilju' t-xim Dyos toj nwitze', ex b'i'n tkyaqil ti'xti' wu'ne', exqa ati wokslab'le' tu'n kyukchiju' witz, extzun mixti' nk'u'jlalile', mixti'x tajb'en. 3Exqa mab'ajx waq'pu'ne' tkyaqilju' ati weye' kxol prow, expe' qama waq'wib'e' tu'n wonine' kyi'j txqantl, extzun mixti'x nk'u'jlalile', mixti'x tajb'en. 4Ate ati tk'u'jlalilju' qama tzik'xtu'n; b'a'nwnaq; min ntx'a'lti'j tk'u'j, ex min nok tq'o'ntib' te b'a'n, ex min njaw tnima'ntib', 5mya xja'ja' ex mya o'kxwit nb'ajxa' tk'u'j ti'jx, min ntzaj tq'oj ex min nku'xten q'oj toj tanmi; 6min ntzalaj ti'ju' mixya tnik'alti'j, ti'ju' ax ntzalaja'. 7Ate ati tk'u'jlalilju' nik'x tkyaqil tu'n, ntoksla'n tkyaqil, ayo'n tu'n toj tkyaqil, inik'x tkyaqil tu'n. 8Lay b'ajte' tk'u'jlalil. Jun q'ij kb'ajelju' oklenj tu'n tq'metju' ntma'n Dyos, ex lay yoletl kyoj junxi'tl yol, ex lay che ojqelantlju' ojtzqib'l. 9Qu'n mya tz'aqli qekye' ojtzqib'l ja'lo exju' pakb'ab'lte ntma'n Dyos, 10kb'ajel ktxa'n ajtulju' tz'aqlixi'x. 11Tej k'wal qintoqwe', intoq chin yoline' ex nchin ximane' se'n jun k'wal, ex atoq tu'me'lju' toj nwitze' se'n jun k'wal; tetzunj ẍin okye' te ichan, kyej nkoli'ne' se'ntoq tten jun k'wal. 12Ja'lo nqka'yi'n kse'n nxiqka'yi'n toj jun lispej, myaxi'x q'ancha'l; tojtzun jun q'ij k'okyel qka'yi'nkuxi'x. Min tz'aqli wojtzqib'le' ja'lo, tojtzun jun q'ij kwojtzqi'ye' Dyos se'nx ojtzqi'n qina'ye' tu'n. 13Oxe' ti'xti' majx ate'qe', aye': okslab'l, tu'n qayon ex tk'u'jlalil; atzun tk'u'jlalilju' nimxi'x toklen kxolju' oxe'.

will be added

X\