1 Corintios 11

1Kljonxe' yek'b'il wu'ne', se'nwe' ljo'n yek'b'il tu'n Krist wu'ne'. 2Nchin tzalaje' kyi'je' qu'n nchin tzajkyna'ne' kukxju' ex q'i'nqe'xju' xnaq'tzb'il b'ajx nq'o'ne' kyeye' kyu'ne'. 3Wajb'iltzune' tu'n tkane toj kwitze' qa a Krist wi'yj te junjun ichan, ex aju' chmilb'aj wi'yj teju' xu'jilb'aj, kse'nte Dyos wi'yj te Krist. 4Qama jax tktxu'n jun ichan twi' ajtna'n Dyos mujqa ajt-xitma'nju' ntma'n Dyos, ch'ixb'ilx teju' twi'. 5Qatzun min xjax tktxu'n jun qya twi' ajtna'n Dyos mujqa ajt-xitma'nju' ntma'n Dyos, ch'ixb'ilx teju' twi'. Ikx tz'ela' naqwit matz'el t-sk'o'ji'n twi'. 6Qu'n qa min xjax tktxu'n jun qya twi', masb'a'n majx tu'n tel t-sk'o'ji'n. Qatzun ch'ixb'ilx teju' qya tu'n tel joyet t-xya'mal twi', ktxunkx twi'. 7Mixti' tu'n tjawx tktxu'nte ichan twi', qu'n tilb'ilal Dyos ex q'ancha'l tajwalil Dyos ti'j. Atzunte qya q'ancha'l tajwalil ichan ti'j, 8myanate' ichan elq'i'n ti'ju' qya, ate qyaju' elq'i'n ti'ju' ichan. 9Ex mya tu'n tpaju' qya kub'a' b'incha'n ichan, ate qyaju' kub' b'incha'n te tuk'i'lju' ichan. 10Tu'ntzun tpaju', ati tu'n tjax tktxu'n qya twi' tu'n tyek'u'nte toklen tchmil ti'j exqa nniman kye anjl. 11Atzun toju' qchwinqlal okslalqo' ti'j Qajaw, tu'n qya atiya' ichan, ex tu'n ichan atiya' qya. 12Axte', ti'ju' ichan b'inchanjtza' qya, ex ti'ju' qya nnitz'ja' ichan; ex kykyaqil tzajniqe' ti'j Dyos. 13Aye'ye' che q'malte qa b'a'n lay jax tktxu'n qya twi' ajtna'n Dyos. 14Tu'nxju' qo anq'in nela' tnik'tzil qa ch'ixb'ilx teju' ichan qama kub' tch'isa'n t-xya'mal twi'; 15Atzunte' qya, a ninb'ilteju' tu'n nkub' tch'isa'n t-xya'mal twi'; qu'n aju' t-xya'mal twi' tzaj q'o'n te kutxb'ilte twi'. 16Qatzun ati jun tajb'il tu'n twulin ti'ju' lu, ati tu'n teltnik' ti'j qa ayo'ye' exqe' okslal te Dyos, min qojtzqi'ne' juntl naq'la'qe' xjal. 17Kxel ntz'ib'a'n jte'tl yole' kyeye', lay txinma'ne' qa b'a'n b'u'yb'il kyib'e', qu'n nok te xitb'il kyeye' ex mya te jun b'a'n. 18Tnejelxi'x oje nb'iye' ajkyb'uyinte kyib'e', ati pa'jtib'il kxole'; ex nxi' woksla'ne' qa ax. 19¡Atixlo tu'n tb'aj kypa'n kyib'e', tu'n tel tnik'tzil alkyeqe' okslal qe'xi'x kxole'! 20Tu'ntzu'n pa'jtib'il lu, myatl wab'j te Qajawte' nkywane' toju' b'u'yb'il kyib'e'. 21Qu'n teylex junjun nxinej walte twa; ate' junjun nche q'aq'an mixti' kwa, e'tzun junjuntl majxpe' nche tx'ojti. 22¿Ma mixtzunti' kyjaye' tu'n kywane' ex tu'n kyk'wane'? ¿Tiqu'n nche elkyik'o'ne' ttanam Dyos ex nel kych'ixawju' prow kyu'ne'? ¿Ma oktzun che xe'lntzalajsa'ne' ikyju'? ¡Lay, qu'n myab'a'nte' nkyb'incha'ne' lu! 23Qu'n nk'am weju'ye' kyej tq'o'n Qajaw lu, ex xinxnaq'tza'ne' kyeye': Axju' qonik'an tej t-xik'a'yi'n Qajaw Jesus tojkyqob' xjal, jaw ttzyu'n wab'j 24ex tb'ajlenxi' tq'o'n chjonte te Dyos ti'j, xitaq'pu'n ex tma: A nxmilal ju'ye' lu, kkyimel tu'n kpaje'. Kyb'incham juye' lu te nab'ab'lweye', chij. 25Ex ikx tb'ajlen wan, jaw ttzyu'n k'wab'l ex tma: Aju' k'wab'l lu a ak'a'j yolju' kjel kuwset tu'nju' nchk'ele'. Atl junjun maj ajkyk'wane' ti'j, kyb'inchame' te nab'ab'lweye', chij. 26Qu'mtzun aju' tkamik Qajaw nxikypakb'a'ne' atl junjun maj ajkywane' ti'ju' wab'j lu ex ajkyk'wane' ti'ju' k'wab'j lu. 27Alkyexku'tzun mawan ti'ju' wab'j lu ex ti'ju' k'wab'j te Qajaw ex mya b'incha'ntib' twitz Qman Dyos, il ntb'incha'n ti'ju' t-xmilal Qajaw ex ti'ju' tchk'el Qajaw. 28Tu'ntzunju', teyile junjun ati tu'n tkub' t-xima'n b'a'nxi'x na'mxtoq tok ti'ju' wab'j ex ti'ju' k'wab'j te Qajaw. 29Qu'n qama wan ti'ju' wab'j ex mak'wan ti'ju' k'wab'j te Qajaw extzun min nximan ti'ju' toklen t-xmilal Qajaw, tex tz'e'ysb'il twitz nwana' ex nk'wana'. 30Qu'mtzun nim yab'qe' ex mixti' kyipumal kxole', ex ate'qe' oje che kyim. 31Naqwit inxi' qxima'n qchwinqlal titi' nqb'incha'n, lay kub' ttz'e'ysa'n Qajaw qwitz, 32apete' qama kub' ttz'e'ysa'n Qajaw qwitz, tu'n tkane toj qwitz tu'n lalun qo'x toj tz'e'ysb'il witzb'aj kyuk'i'l mya okslal. 33Qu'mtzun e'ntzik ex e'witz'in, ajkyb'uyinte kyib'e' tu'n kwane', kyonku' kyib'e'. 34Qatzun ati jun nq'aq'an, wan tja, tu'ntzun lalun kub' ttz'e'ysa'n Dyos twitz tu'n tpaju' nkb'incha'ne' toju' kb'u'yb'il kyib'e'. Atzu'n txqantl ti'xti' kxe'l nnk'u'ne' ajnpone' ka'yilkyeye'.

will be added

X\