1 Corintios 10

1E'ntzik ex e'witz'in, wajb'ile' tu'n kb'inteye', e'ten ojtxi' qyajilb'en tjaq'ju' muj, ex kkyaqil eb'jik'x toju' Kyeq Ninnjab'. 2Iktzu'n kmujb'akyib' kkyaqil tuk'i'l Moyses tej tjaw a' kwi' toju' muj ex toju' ninnjab'. 3Ex kykyaqil e'wan ti'jxju' wab'j tzaj tq'o'n Dyos 4ex e'k'wan ti'jxju' k'wab'j tzaj tq'o'n Dyos. Qu'n intoq che k'wan ti'ju' a' tzaj tq'o'n Dyos, aju' etz toj pik aku' Krist. 5Aye'tzunkye, kynimal myab'a'n e'ela' twitz Dyos, qu'mtzun eb'aj kyim ex e'kyaj woqonje toj chq'ajlaj. 6Tkyaqil ja'lu b'aj te jun yek'b'il qe, tu'n lalun pon qk'u'j ti'ju' myab'a'n kse'nkye. 7Qu'mtzun lalun che k'ulune' kye witzleb', kse'n kb'incha junjunkye, kse'n ntma'n toj Tu'jil: E'kub' qe xjal wal ex k'wal, ex e'jawe' tzalajeb'el, chiju' tz'ib'a'n. 8Lalun txiqq'o'nqib' toju' ajpaji'n, kse'n kb'incha junjunkye, tu'n tpaj ja'lu e'kyim kab'mutx' wuqlajk'al lajnaq (23,000) xjal tojun q'ijx. 9Ex lalun kub' qq'o'n Krist toj joyb'ilti'j, se'n kb'incha junjunkye, ex tu'nju' lu e'kyim tej kyb'aj tx'a'n kyu'n kan. 10Ex lalun che wulje' ti'j Dyos, se'nqe' junjunkye e'jaw wulj ti'j Dyos, tu'ntzunju' e'kub' b'yo'n tu'n anjl te kamik. 11Tkyaqil ja'lu b'aj kyi'ju' ojtxi' qchman te jun yek'b'il qe, ex kyej tz'ib'a'n toj Tu'jil te jun oqxenb'il qe ayo' itz'qo'x kyoju' b'ajsb'il tq'ijlalil ja'lo. 12Qu'mtzun, alkye nkub' t-xima'n qa wa'l toj tokslab'l, ka'yinxtib' tu'n lalun kub' tz'aq. 13B'ajx tzaja'xi' junkye' joyb'ilkyi'j aju' lay tzik'xtu'n jun xjal. Ex b'a'n tu'n tqe kk'u'je' ti'j Dyos, lay taq' anb'il tu'n ttzaj jun yajb'il kyi'je' kuwxi'x kyetwitzju' k'ik'ex kyu'ne'. Ape'te Dyos ktzajel q'onte tu'me'l tu'n kyexe' toj ajttzaj jun joyb'ilkyi'je' kuwxi'x, tu'ntzun tik'xkyu'ne'. 14Qu'mtzun e'ntzik ex e'witz'in, kypa'mil kyib'e' ti'ju' witzleb'i'n. 15Nchin yoline' kyeye' kse'n nchin yoline' kyuk'i'l xjal nkane toj kwitz. 16Ajqk'wan ti'ju' xjan k'wab'j, ju' nxiqq'o'n chjonte ti'j, nqo ok junx ti'ju' tchk'el Krist; ajqwan ti'ju' wab'j nkub' aq'pet, nqo ok junx ti'ju' t-xmilal Krist. 17Maskye nim qb'aj, qkyaqil nqo wan ti'j junx wab'j, tu'ntzunju' junx xmilqo'. 18Che ximanqepe'ye' kyi'ju' aj Israel: aye' nche ch'yon chib'j kyi'ju' alu'mj nche kub' te chojb'il, nche aq'unan junx toju' ajb'eb'l ti'j q'olb'eb'l. 19Mya inwt xinma'ne' qa ati toklenju' witzleb', exqa atixi'xwit toklenju' chib'j kub'ni q'o'n twitz tilb'ilal kyetwitz juntl chib'j. 20A nxinma'ne' aju' ajtkub' kq'o'n mya okslal jun chojb'il, kye tajaw il nxa'kyq'o'n, mya te Dyos, ex min wajb'ile' tu'n tten kyoklene' kyuk'i'l tajaw il. 21Lay b'ent kk'wane' ti'ju' k'wab'j te Qajaw exwit nche k'wantle' ti'j k'wab'j kye tajaw il; ex lay b'ent kyoke' ti'ju' tmes Qajaw, exwit nche oktle' ti'j kmes tajaw il. 22¿Maqajb'iltzun tu'n t-xky'aqlin Dyos qi'j toj kwitze'? ¿Makuw qoxi'x tzunqe kyetwitz Dyos toj kywitze'? 23Ate' junjunkye' nche q'mante: Tzaqpi'n qo'qe' tu'n qb'inchanteju' qajb'il, chechi. Axte', naq a mya tkyaqil b'a'n nela'. Tzaqpi'nqote' tu'n qb'inchante qajb'il, naq aju' mya tkyaqil nnonin kye tnam. 24Lalun kjoyju'ye' b'a'n kyexe', akyjyomju'ye' b'a'n kye txqantl. 25Kch'yonx kyeye' tkyaqil chib'j nk'ayinjtz toj k'a'yb'ilte, lalun che xjelune' ti'j tu'n tpaju' nkyxima'n xjal; 26qu'n tete' Qajaw tkyaqil twitz tx'otx', ex tkyaqilju' ati twitz. 27Qama che txkonjtze' wal tu'n jun mya okslal, ex kyajb'ile' tu'n kyxi'ye', kukyxi'ye', che wanqe'ye' ti'j tkyaqilju' makub' q'o'n kwitze', lalun che xjelune' ti'j tu'n tpaju' nkxima'n xjal. 28Qatzun ati jun xq'mante kyeye' kjalu: Kub'ni q'o'nte' chib'j lu te chojb'il, qachi, lantzun txikywantze', tu'n tpaju' xq'mante kyeye' ex tu'nju' nt-xima'n. 29Nchin yoline' ti'ju' nt-xima'n juntl, myaju' nt-xima'na. Lay tz'okju' tzaqpib'l weye' tu'nwt tq'manjtz qa myab'a'n nb'incha'ne' tu'nju' nt-xima'n juntl. 30Qa nchin q'o'nwe' chjonte te Dyos ti'ju' nxinwane', mya tu'n kyolin txqantl myab'a'n ti'ju' nxinq'o'n chjonteye' te Dyos tib'aj. 31Ikxtzunju', qama che kych'yone', qama che k'wane', qama kb'incha juntl ti'xti'ye', kb'inchame' te ajwalb'ilte Qman Dyos. 32Lalun kub' kq'o'n jun myab'a'n yek'b'ile' te juntl; kye aj Juda, mo kye mya aj Juda, mo kye ate' kxol okslal te Dyos. 33Awe' in oktilil wu'ne' tu'n telb'a'nju' nb'incha'ne' kwitz kykyaqil, minti' njyo'ne' b'a'n wexe', a njyo'ju'ye' b'a'n kye txqantl, tu'n kkanb'ante kolb'il.

will be added

X\