1 Corintios 1

1- 2Ayine' Pawl, txko'nqine' tu'n Dyos tu'n woke' te Apostl te Jesukrist, nche'x qq'olb'e'ne' tuk'i'l qtzik mo qitz'in Sostenes, aye'ye' okslal ate'ye' toj Korint, xjansa'n qe'ye' toj tb'i Krist Jesus ex txko'nqe'ye' te ttanam, junx kyuk'i'lju' ttanam Dyos xjan nche na'nte tb'i Qajaw Jesukrist toj tkyaqil plaj. 3Awt Qman Dyos ex Qajaw Jesukrist che tzaj q'onte xtalb'il ex nak'b'il kyeye'. 4Inchin q'on chjonteye' te Dyos kyi'je' kukxju', tu'nju' matxi' tzaj tq'o'n Dyos xtalb'il kyib'aje' tu'nel Jesukrist. 5Qu'n tu'n Krist ẍe q'inumaxa'ye' toj tkyaqil, maten kyojtzqib'le' ex mab'ent kpakb'ane' ti'j tyol Dyos. 6Matxi' tz'awetju' tpakb'al b'a'n ti'j Qajaw Krist axxi'x kxole'. 7Iktzu'n ma kk'ame' kyoklene' tu'n Dyos, mixti'tl nojqelan kyeye', akxku' npon tq'ijlalil tu'n tul Qajaw Jesukrist. 8Che kuwsanjtzele' tu'n Dyos toj kyokslab'le', mix-a'lo' kb'antel tpoqon kyi'je' ajtultl Qajaw Jesukrist. 9Njapunte Dyos tyol kukxju', ex ate txkonkyeye' tu'n kyanq'ine' mujb'a'n kyib'e' tuk'i'l Jesukrist Tk'wal Dyos ex Qajaw. 10E'ntzik ex e'witz'in, nchin kub'sane' kyeye' toj tb'i Qajaw Jesukrist tu'n kytene' toj mujb'ab'l ex tu'n lalun ten pa'jtib'il kyxole'. Che anq'inqe'ye' toj mujb'ab'l, junx kyxime' ex junx kynab'le'. 11Inxi' nma'ne' lu kyeye' e'ntzik ex e'witz'in, qu'n manb'iye' kye toj tja Kloe qa ati ik'b'il kyxole'. 12Ate' junjun kyxole' nkyma'n: T-xnaq'tzb'en Pawl qinwe', chechij; junjuntl nkyma'n: T-xnaq'tzb'en Apolo qinwe', chechij; junjuntl nkyma'n: T-xnaq'tzb'en Sepas qinwe', chechij; ex junjuntl nkyma'n: T-xnaq'tzb'en Krist qinwe', chechij. 13¿Mapa'ntzun tib'u' Krist? ¿Majawtzun Pawl twitz krus tu'n kpaje'? ¿Mujqa toj tb'i Pawl jawa' a' kywi'ye'? 14¡Chjonte te Dyos mix-a'lo' junkye' jaw nq'o'ne' a' twi', naq o'kx Krispo ex Kayo! 15Ikytzu'n mix-a'lo'te tu'n tmante qa jaw a' twi' toj nb'iye'. 16Ex jaw nq'o'ne' a' kwi' toj tja Estepana, ex min na'n wu'ne' qa jaw nq'o'ne' a' twi' juntl. 17Mya chq'o'n qinwe' jawsal a' kwi' xjal tu'n Krist, pakb'alte tpakb'al b'a'n chq'o'na' qinwe', ex min xinma'ne' tuk'i'l nimaq nab'l mo nimaq yol, tu'n lalun tz'el wiq'i'naye' toklen tkamik Krist twitz krus. 18Aju' tpakb'alil tkyimlen Krist twitz krus naku'j tontil kyeju' nche'x toj naje'n; atzunte' pakb'ab'l lu tipumal Dyos te' qe ayo' matxi' qoklet. 19Kse'n ntma'n toj Tu'jil kjalu: Knb'incha'ye' tu'n tkub' naj knab'lju' ati knab'l ex tu'n tkub' naj kk'atzilju' k'atz knab'l, chij. 20¿Se'ntzun ẍeoka' ati knab'l exqe' nimaqxnaq'tzal, exju' majx tajb'il tu'n tyolin kyi'ju' ti'xti' te twitz tx'otx'? ¡Matxi' tyek'ute' Dyos naq nok toj kwitz!. 21Myana' tu'n knab'l xjal sela' kynik' xjal te Dyos, ate Dyos xyek'unte tnab'l toj juntl tu'me'l, tu'nte t-xtalb'il saja' tq'o'n tu'me'l tu'n kkletju' maten kyokslab'l tu'nelju' tpakb'al b'a'n, maskye naku'j mixti' tnab'l toj kwitz xjal. 22Kyajb'il aj Juda tu'n kka'yinte b'a'nq'ob'aj, aye'tzu'n aj Kryek nkjyo'n nab'l; 23ayo'tzunqe nxi' qpakb'a'n tb'i Krist jawq'o'n twitz krus. Myab'a'n nela' kye aj Juda, aye'tzu'n mya aj Juda xnakyil toj kwitz; 24atzu'n kyeju' matxi' che txkonjtz tu'n Dyos, aj Juda mo mya aj Juda, tipumal Dyos ex tnab'l Dyoste' Krist lu. 25Ku'xi'xtzunj mixti' tnab'lju' te Dyos t-xim, atixi'xtzunte' tnab'l kyetwitz tkyaqil kynab'l xjal; ex naku'j mixti' tipumalju'te Dyos, atixi'xtzunte' tipumal kyetwitz tkyaqil kyipumal xjal. 26E'ntzik ex e'witz'in, kaneku' toj kwitze' mache txkonjtze' tu'n Dyos, tu'npetzu'n naqjte'x ati kynab'l kyxole' kse'n kynab'l xjal, ex naqjte'x ati kyoklen mujqa e'toj kyja nimaq kyoklen kyxole'. 27Mache jaw t-sk'o'n Dyos tal mixti'x knab'l toj kwitz xjal, tu'n tel kych'ixawju' ati knab'l; ex mache jaw t-sk'o'n Dyos mixti' kyipumal toj kwitz xjal, tu'n tel kych'ixawju' ati kyipumal. 28Mache jaw t-sk'o'n Dyos tal xjal ik'o'nqe' ex mixti'x kyoklen toj kywitz xjal, aye' mixti'x kyajb'en, tu'n kyel ik'etju' ati kyoklen toj kwitz xjal. 29Mixtzun a'lote tu'n tjaw tnima'ntib' twitz Dyos. 30Axtzunte Dyos xmujb'ankyeye' tuk'i'l Krist Jesus, tu'ntzunju' maqo ok ati qnab'l, maqo tk'am Dyos te ttanam, nqo t-xjansa'n ex maqo ttzaqpi. 31Qu'mtzun kse'n ntma'n toj Tu'jil kjalu: Qa ati jun tajb'il tu'n tnimantetib', tzalajx ex nimanktzju' Qajaw, chij.

will be added

X\