San Juan 1

1Tasba na kau paskras kan bara, Bila ba pat bara kan. Bila ba Gâd wal kan bara witin sika Gâd kan ba. 2Ta palira, bamna Bila ba Gâd wal kan. 3Witin bak Gâd mita diara sut paskan, witin apu kira diara nani bara ba, kumi sin paskras kata. 4Witin ra raya kaia laka ba bara kan, bara naha rayaka na sika, upla nani ingnika kan. 5Naha ingnika na, tihmu tara tilara ban ingwisa, bara tihmu tara ba mita sin sip daskras, ban ingwisa. 6Waitna kum bara kan nina ba Jan, witin ra Gâd mita blikan, 7naha ingnika dukyara witnis aisaia, bara baha aisanka ra upla sut kasak lukbia. 8Jan ba naha ingnika apia kan; sakuna Gâd mita witin ba blikan, naha ingnika dukyara aisaia. 9Ingnika kasak pali upla sut ra ingwi ba, naha tasba ra aula sa. 10Baha Bila ba, naha tasba ra kan; Gâd mita witinka bak, naha tasba na paskan, sakuna naha tasba ra iwi nani ba mita, witin ra kaikras kan. 11Balan ai tasbaia palira; sakuna ai uplika nani mita, witin ba briras kan. 12Sakuna, ya nani witin ra brin; bara kasak sin lukan; nani ra, witin mita naha uplika nani ra, Gâd luhpia takaia karnika ba yan. 13Witin nani Gâd luhpia sa, diara nani paskanka ba wina lika apia, baku sin upla brinka bak sin apia, sakuna Gâd mita ai karnika wal mangkan bamna. 14Baha Bila ba, upla takan bara yang nani tilira iwan. Bamna yang nani ai prana ba kaikri, baha prana Aisa Luhpia kumi baku Gâd wina brin ba. 15Jan, witinka dukyara witnis aisi, naku win: "Naha sika baha yang witin dukiara aisi katna ba nani aisi; witinka nini ra aula ba lika, yang wal kau tara sa; kan yang apu kapri bara, witin pat bara kan." 16Yang nani sut, witin ai yuyaka tara nani ba wina, yamnika sât, sât nani bri bangri sa. 17Gâd mita lâ ba Moses bak yan kata; sakuna latwan laka bara kasak tanka ba lika, Jisas Kraist bak baman lika sip kata. 18Upla kumi sin Gâd ba kaikras pali sa, sakuna ai Luhpia kumi baman, witin sika Gâd, Aisa lama pali kat wal asla iwi ba witin mita sika, Gâd tanka ba wan marikan. 19Ju nani Jerusalem wina, prîst bara Libait nani saki Jan ra blikan, makabi walaia, witin ba ya sapa. 20Bara Jan lika, ai tanka yukukras param pali saki, win: --Yang lika Misaia apia. 21Kli prîst bara Libait nani bui makabi walan: --Ban kaka, man ba ya? Man ba dahra aisasara Ilaidya? Pana Jan win: --Yang baha apia sni. Witin nani kli, kli makabi wali kan: --Bamna, man ba baha dahra aisasara balaia kata ba ki? Bara Jan, witin nani ra win: --Apia. 22Kli aisi win: --Ban kaka, man ba ya? Yang nani ra ai blikan uplika nani ra, bila brih waia sna. Bamna man pali dukyamra dia wan wiaia sip sma ki? 23Jan pana win: --Yang sika upla iwras tasbaia ra bila baikra kum wini ba: "Dawan kainara yabal wapni kum dauks", dahra aisasara Aiseya aisin ba baku. 24Parisi nani mita Jan wal aisaia blikan uplika nani ba, 25makabi walan: --Bamna man ba apia, Ilaidya sin apia, bara baha dahra aisasara ba sin apia, baku kaka diakan upla nani ra tahbi daukisma? 26Jan pana win: --Yang lika li ni upla tahbi daukisna, sakuna man nani tilamra kum bara sa, man nani witin ba kaikras sma. 27Witinka yang nini ra aula. Yang witin suska awa pan sin langkaia aitani apia sni. 28Naha diara sut na, Jordan awala lalmika tanira takan, plis kumi nina Betania wi bara; bahara lika Jan upla nani tahbi dauki kan. 29Yaprika wala, Jan kaikan Jisas witin ra aula kan, bamna upla nani ra nan win: "Kais man nani, naha waitnika aula na sika, Gâd Syîpka Luhpia, naha tasba saurka bri saki ba. 30Yang witin na dukyara sika aisi, nan wisatna ba: 'Yang nini ra upla kum aula ba sika, yang wal kau tara sa, kan witin lika yang apu kapri wina ban bara sa.' 31Yang sin, witin ba ya sapa kaikras katna, kuna upla nani ra lî ni tahbi dauki balri, Israel uplika nani mita witin ba kakaira takbia dukyara." 32Bara Jan naha sin win: "Yang kaikri Spirit Hulikira butku baku, kasbrika pura wina bal iwi witinka pura kat takaskan ba. 33Baha kat sin yang witin ba ya sapa kau kaikras katna; sakuna witinka lî ni tahbi daukaia ai blikan ba mita ai wisata: 'Ani waitnika pura ra Spirit Hulikira ba bal iwi takaskan kaikma ba, baha mita sika, Spirit Hulikira ni tahbi dauki ba.' 34Pat yang mita kaikri, bara baha witniska sin aimakisna: witin sika Gâd Luhpia ba." 35Yaprika wala, kli Jan bara kan, ai nina blablikra wal ba kira. 36Jisas bal luya kan kaiki, Jan mita naku win: --Kais man nani, witin sika Gâd Syîpka Luhpia ba. 37Jan nina blablikra wal ba mita, naha aisin walan bara, mahka Jisas nina blikan. 38Bamna Jisas ai nina ra taui kaikan, baha nani ai nina bliki kan, bara naku wisata: --Dia pliki bangwisma ki? Witin nani bila: --Smasmalkra. Anira takaskisma ki? 39Jisas pana win: --Man nani bal kaiks. Bamna witin nani wih kaikan, Jisas anira takaski kan pliska ba; bara baha yua kau taka ba, witin nani Jisas wal takaskan; kan pat tutni 4 aklak kan bamna. 40Jan aisin wali, waitna wal taki Jisas nina blikan ba wina, kumi ba nina Andru maki kata, witinka ba Saiman Pita muihnika kan. 41Andru ai muihni Saiman pliki saki, naku win: --Yang nani Mesaia ba sakri (baha tanka lika Kraist). 42Ningkara Andru mita Saiman ba brih wan, Jisas bara kan ba kat, bamna Jisas kaiki, naku win: --Man ba Saiman, Jan luhpia, sakuna Sipas mai makan kabia (baha tanka ba: Pita). 43Yu wala Jisas Galili tasbaia ra waia luki kan bara, witin Pilip wal prawan, bara witin ra naku win: --Nini bliks. 44Pilip lika Bitsaida taunka wina kata, Andru bara Pita taunka ba. 45Bamna Pilip lika wan Nitanîl pliki, bara naku win: --Yang nani waitna kum kaikri, witinka dukyara Moses bara dahra aisasara nani mita ulban kan ba. Baha ba lika Jisas Nasaret wina, Josep luhpia ba. 46Nitanîl bila: --Nasaret ba wina ban diara pain bal takbia ki? Pilip mita win: --Bal kaiki, tankam bris. 47Jisas kaikan Nitanîl ai lamara aula kan, bara witin dukyara naku win: --Kais Israel waitnika pali kum aula ba, witinka ra kunin apu ba. 48Nitanîl makabi walan: --Nahki ai kaikisma ki? Pana Jisas bila: --Pilip kau mai winras kan bara, yang pat mai kaikri kan, kwah damni dusa munuhnta ra katma bara. 49Bamna Nitanîl bila: --Smasmalkra, man ba Gâd Luhpia bara Israel Kingka sma. 50Jisas pana win: --Kasak ai lukisma, kwah damni dusa munuhnta ra kapram wisi mai wiri bamna? Sakuna naha nani wal kau diara tara nani man kaikma. 51Bara Jisas naha sin win: --Kasak mai wisni, man nani kasbrika pura ba kwawan kaikma, bara Gâd insalka nani bal iwi uli kabia, Upla Luhpika waitna purara.

will be added

X\