Galatas 3

1Galesha, uplika tanis nani! Ani sukika pali ba kupiam yabaki alkan? Yang nani smalkanki ba ni man nani namkra kat, Jisas Kraist dus prihni ra saban ba mamrikatna ba. 2Bamna naha na man nani ai wis: Moses laka bila wali daukan ba mita Gâd Spiritka Hulikira ba briram ki, apia kaka, sturi yamni wali kasak lukram mita ki? 3Nahki man nani ba ban sinskas sma ki? Dia trai kaikisma, Spirit mita diara nani ta krikan ba, nanara karnikam ni daukaia plikisma? 4Pât nani wauhram ba, sut bahki pali sa ki? Baha nani sut ba man nani helpkam kata pain lukaina! 5Ani pyua Gâd ai Spiritka Hulikira ba, man nani ra maiki wark aihka nani sin dauki bara, diakan baku daukisa ki? Baha ba daukras sa, man nani lâ bila wali daukisma ba mita, sakuna dia, dia walram ba kasak luki sma ba dukyara sa. 6Bamna Ebraham Gâd ra kasak lukan, bara Gâd aitani lukan witin ba kasakkira kulkaia. 7Baha mita man nani kaiki kaia sma, kasak luki uplika nani ba sika, Ebraham kyamka nani. 8Bamna kan pyua wina ulban sa, Gâd lika Ju apia nani ba, kasak lukan taka mita kasakkira kulkan kabia, bara kan pyua wina naha sturka painkira na, Ebraham ra maisapahki win: "Man tamka mita, nisan nani sut ba yamni munan kabia." 9Baku bamna, ya Ebraham kasak lukan ba baku kasak lukisa kaka, yamni munan sa. 10Bamna ya Moses laka bila wali daukaia luki, ba lika, saura pali kulkan laka munuhnta ra sa. Kan Ulbanka wisa: "Lâ wauhkataya ra dia ulban ba aiska daukras uplika nani ba lika, saura pali kulkan laka munuhnta ra sa." 11Baha lika param pali sa, upla kumi sin apu sa, lâ dia wi ba kat dauki bamna, Gâd mita kasakkira kulki ba; kan Ulbanka ba wisa: "Gâd mita kasakkira kulki uplika ba, kasak lukan laka mita raya kabia." 12Bamna Moses laka ba lika kasak lukan lâka tanka apia sa, kuna dia aisi ba wals: "Ya naha diara nani na sut daukisa kaka, witin baha dukya nani ba mita raya kabia." 13Lâ mita saura pali wan kulkan ba wina Kraist mita pri wan sakan sa, kan yawan wan tawan witin lika upla saura kum baku takan; kan Ulbanka ba wisa: "Saura pali sa baha nani dus ra paman prui ba." 14Naha na baku takan, Gâd mita Ebraham ra yamni munaia pramis munan ba, Kraist Jisas bak Ju apia uplika nani ra yaia; bara baku yawan sut bribia kasak lukan laka ba mita, baha Spiritka Hulikira Gâd mita pramis munan ba. 15Muihki nani, yang mai aisisni sampla kum baku: Upla kum upla wala wal lâ kum dauki swin ba, upla kumi sin apu sa baha lâka krikaia apia kaka kau pura prakaia. 16Bamna nanara, Gâd mita Ebraham ra bara ai kyamka ra sin pramis daukan. Ulbanka ra wiras sa: "kyamka nani ra", upla ailal dukyara aisaras, kuna nan wisa: "man kyamkam ra"; bara naha wiaia want sa upla kumi ra baman aisisa, baha ba Kraist. 17Bamna aisisna ba lika naha sa: Gâd Ebraham wal lâ kum dauki pramis munan. Baha mita, Moses laka 430 mani ningkara balan ba, sip apia sa Gâd lâ dauki pramis munan ba bahki sakaia. 18Baku bara, Gâd yabi dukya ba Moses laka ba wina ai helpka brisa kaka, baha lika pramis munan ba dukya apia sa; sakuna Gâd mita Ebraham ra baha ba prisant yaia wisi pramis munan. 19Baku sa kaka, Moses lâka ba dia mapara help sa ki? Baha lâka lika ningkara yaban, lâ bila wali daukras kan ba marikaia. Lâ ba lika yan kan baha "kyamka" aisubi takbia ba kat baman, witin kara pramis daukan kan ba. Bamna lâ ba insal nani mita aisin, bara Moses lika baha laka ba upla ra aisi kaia kan. 20Kuna upla kumi baman aisisa kaka, tawan aisasara ba lika want apia sa; kan Gâd ba kumi baman sa bamna. 21Bamna naha tanka na mita, Moses laka ba Gâd pramiska nani ba mapara sa wisa ki? Apia pali. Kan lâ kum yan ba upla nani ra raya kaia laka yabi kata kaka, lâ dia wi ba kat dauki mita Gâd pain kaikaia kan. 22Sakuna Ulbanka ba wisa, sut lika saurka mita priski silak ra brisa; naha na naku sa, ya Jisas Kraist ra kasak lukbia ba, sip sa Gâd dia pramis munan ba briaia. 23Kau naha kasak lukanka laka na balras kan bara, lâ ba priski wan brikan, kasak lukan laka ba param sakan kabia ba kat. 24Lâ ba tuktan main kakaira baku kan; bahamna tuktan baku wan tapaki kan Kraist balan ba kat, bara baku mika yawan witin ra kat kasak lukbia kaka, Gâd mita kasakkira wan kulkbia. 25Bara nana ra Kraist ra kasak lukaia pyua balan nara, kli tuktan main kakaira mihta ra apia sa. 26Kan kasak lukan laka ba mita man nani sut lika Gâd luhpia nani sma, Kraist Jisas wal asla takram ba mita. 27Man nani sut Kraist wal asla kaia wisi tahbi mai daukan ba, witin ka mita puram praka baku mai brisa. 28Bamna nana ra lika, Ju kaia apia kaka Grîk kaia, alba pri kaia, apia waitna kaia, mairin kaia tanka ba apu sa; kan Kraist Jisas wal asla kaia laka ba mita, man nani sut asla kumi sma. 29Bamna Kraist dukya sma kaka, man nani lika Ebraham kyamka, bara Gâd diara pramis munan ba brima.

will be added

X\