2 Timoteo 3

1Baku sin man nani tanka bri kaia sma, tnata yua nani ra pyua karna nani balbia. 2Upla nani ba klauna ai dukiara baman luki kabia lalah ra latwan kaikbia, kakalwra kabia bara sin diara lalihkra kabia, Gâd mapara aisi kabia, ai aisika bila walras kabia, tingki kas kabia bara serts ra respek apu kabia. 3Ai uplika nani ra latwan bara umpira sin kaikbia apia, upla nina aisasara nani kabia, ai wîna brinka nani sip alki takaskras kabia, kupias nani bara diara pain nani waihla kabia. 4Upla nani ra kunin muni pât ra dingki kabia, ai kupia lukras diara dauki kabia, prautkira nani kabia; Gâd ra plikaia ba watlika ra, ai wîna brinka nani pliki kabia. 5Gâd ra lukaia laka ba pain talia kulki nani kabia, sakuna ai daukanka ba ni lika apia, kristian laka kasak karnika ba daukbia apia. Bahmuna uplika wal man diara apu bas. 6Kan naha nani upla wina upla nani bara sa, witin nani upla watla ra dimi, mairin sinskas nani, saurka man bangki bri nani bara, kunin munisa. Naha mairka nani ba brinka karna sat, sat mita taibi brisa, 7bara witin nani pyu sut lan takaia trai munisa, sakuna kasak laka tanka ba sip briras sa. 8Bara Jannes, Jambres, witinka nani sukia nani kan ba, Moses mapara buan ba baku, baha uplika nani sin kasak tanka mapara bui bangwisa. Baha uplika nani sinska ba, aihka saura takan sa, bara kasak lukan laka mapara, witin nani pain aingwa apia sa. 9Sakuna baha nani ban pyu wihka lika dauki kabia apia, kan upla sut kaikbia witin nani ba sins apu nani sa, sin baha uplika wal, Moses mapara buan nani ba baku. 10Sakuna man lika yang smalkanki nani ba pain nina blikram sa, nahki yang iwi kapri ba, yang dia daukaia want kapri ba sin; man ba yang kasak lukanki laka ba pain alki briram, wihka bila kaikisna laka ba, latwanki laka ba, bara ban bapi bui kaia laka ba sin. 11nini bliki rau ai sauhkan ba bara pât wauhwri ba sin. Man pain kaikisma diara nani yang ra takan ba Antiok taunka ra, Aikonium ra bara Listra ra sin, bara rau sauhkanka tara nani wauhwri ba sin; sakuna Dawan baha sut wina dakbi ai sakan. 12Bamna kasak pali sa, ani uplika nani Kraist Jisas wal asla hulikira iwaia want lukisa kaka, witin nani ba nina bliki rau sauhkan kabia; 13sakuna upla saura nani bara upla ra kunin mamunra nani ba, ban kau saura taki kabia, bara upla ra kunin muni nani kabia, bara panaura sin upla nani mita kunin muni kabia. 14Sakuna man lika dia lan takram ba bara baha kat kasak lukisma bara, ban bapi bui bas. Man pain kaikisma baha ya mita mai smalkan ba, 15kan tuktan lupia pyua wina man ba Ulbanka hulikira nani kakaira sma, bara baha nani mita sins maikaia sip sa, bara Kraist Jisas ra kasak lukan laka bri mita, baha nani sin swaki mai sakaia sip sa. 16Ulbanka aiska ba Gâd winka puhbra mita sika, bara baha ba yamni sa upla ra smalkaia bara laui daukaia, swakwanka nani ba wapni daukaia, bara kasakka laka mapara upla ra smalkanka yabaia dukyara, 17Gâd uplika ba pain lan kabia bara ridi sin pain daukan kabia, wark yamni satka nani sut daukaia dukyara.

will be added

X\