MATEO 2

1Quivi cha ni ndaca ñahan ra Herode cacu ra Jesuu ñuun Beleen cha iyo cuenda ñuhun Judea. Suvi ni quivi can queta ra sacuaha chi ri tiñu. Inca ñuhun chiyo nu cana nicandi quichi ra, ta queta ra ñuun Jerusaleen, 2ta quechaha nducu tuhun ra ti: ―¿Ndaa cuu nu ni cacu ra cua cundaca ñahan chi ñivi ñuun judiio? Nducu tuhun ndi, vati cha ni ndehe ndi cha ndaa tiñu ra iti chiyo cana nicandi, ta vachi ndi, vati cuni ndi sacahnu tahan ndi chi ra ―cati ra ta ra. 3Tuhun can chini ra Herode can, ta quechaha saxini xaan ra, ta yuhvi tahan ndihi ñivi iyo ñuun Jerusaleen can. 4Tacan cuu, ta sacuiti ra chi ndihi ra sutu chahnu chi ndihi ra sacuaha ley chahnu, ta quechaha nducu tuhun ra chi ra ta ra ndaa cuu nu cua cacu ra Cristo. 5Tacan cuu, ta cati ndico ra ta ra ti: ―Iti ñuun Beleen cha iyo cuenda ñuhun Judea cua cacu ra, vati tacan ni taa ra ni cahan cuenda ra Ndioo nu ni quichi quivi. Cha cati ra ti: 6Ndioho ñivi ñuun Beleen cha iyo cuenda ñuhun Judea, cahnu xaan cha cua coo ñuun ndo, vati iin rai cahnu xaan cua quee ñuun ndo, ta cua cundaca ñahan ra chi ñivi ra Ndioo ñivi Israeel, cati ra ―cati ra sutu chahnu can ta ra. 7Tacan cuu, ta cana xehe ra Herode chi ra sacuaha chi ri tiñu, ta nducu tuhun ra chi ra ta ra ndaa quivi ni quechaha ndehe ra ta ra chi ri tiñu can iti siqui andivi. 8Tacan cuu, ta cati ra ti: ―Cuahan ndo iti ñuun Beleen, ta cua nanducu ndo chi ve luhu can. Ta tu cua nanihin ndo chi ve, cua quichi cati ndo ndico chihin yu, ta cua cuhun tahin, ta cua sacahnu tahin chi ve ―cati ra. Cuhva can tava tiñu ra chi ra ta ra ta cuahan ra ta ra iti ñuun Beleen. 9Cha yaha cati tuhun ra Herode can, ta cuahan ra ta ra. Ta ndehe ndico tucu ra chi ri tiñu ndehe xihna cuii ra chiyo nu ni quichi ra, ta iti nuu ra ta ra cuahan ri nda cua nda ni queta ri xini vehe nu caa ve luhu can. 10Ndehe ra ta ra nu chacuiñi ri, ta sii xaan quechaha cuni ra ta ra. 11Tacan cuu, ta quihvi ra ta ra tichi vehe can, ta ndehe ra ta ra chi maan ve luhu can chi ña Mariia sihi ve. Tacan cuu, ta chahnu chiti ra, ta sacahnu ra ta ra chi ve. Nuna ra ta ra cha naan ra, ta samani ra ta ra chihin ve. Samani ra xuhun cuaan. Samani ra cutu. Samani ra suchan xico vixin chahan. 12Yaha chacan, ta cahan ra Ndioo chi ra ta ra tichi ñumahna ti ña cua yaha ca ra ta ra nuu ra Herode. Chacan cuu cha quihin ra ta ra inca iti, ta cuahan ndico ra iti ñuun ra. 13Cha ni yaha cuahan ra sacuaha chi ri tiñu, ta cahan tucu ra tatun Ndioo chi ra Cusee tichi ñumahna, ta cati ra chi ra ti: ―Ndoyo, ta cua quihun chi ve luhu sehun chi sihi ve, ta cua cuhu chinu ndo iti ñuhun Egipto. Cua ndoo ndo tican nda cua nda quivi cua cati ndique chihun, vati cua nanducu ra Herode chi ve, vati cuni run cahni run chi ve ―cati ra tatun Ndioo can. 14Tacan cuu, ta quihin ra Cusee chi ve chi sihi ve chacuaa can, ta cuahan ñi iti ñuhun Egipto. 15Ican ndoo ñi nda quivi ni chihi ra Herode can. Cuhva can ni chinu cuhva ni cati ra cahan cuenda ra Ndioo nu ni quichi quivi, vati cha cati ra ti ñuhun Egipto cana ra chi sehe ra, cati ra Ndioo ―cati racan ta ra. 16Tacan cuu, ta nihin ra Herode cuhva ti sandahyu ñahan ra sacuaha chi ri tiñu chi ra, ta xaan xaan quechaha cuni ra. Tacan cuu, ta tachi ra tiñu cha cua cuvi ndihi ra cuati ndihi cha ña ta queta uvi cuiya cha iyo ñuun Beleen chi ndihi ñuun cuati cha iyo yatin ñuun can, vati cuhva can cuiya ve luhu can saxini ra Herode cuhva cha ni cati ra sacuaha chi ri tiñu can. 17Chinu cuhva cha ni cati tuhun ra Jeremiia nu ni quichi quivi, vati cati ra ti: 18Chini ñivi cha ndahyu ñivi ñuun Ramaa. Cuihya xaan cuni anima ñi, ta ndahyu chaa ñi. Cuvaa ñivi cuu ñivi ña Raquel cuenda sehe ñi, ta ña cuni ñi cha cahan vii tiñu chihin ñi, vati cha ni chihi ve ta ve, cati ra Jeremiia can. 19Tacan cuu, ta queta quivi chihi tahan ra Herode can, ta queta ndico tucu tatun ra chahnu Ndioo nu iyo ra Cusee iti ñuhun Egipto, ta quechaha cahan tucu ra chi ra Cusee tichi ñumahna, 20ta cati ra chi ra ti: ―Ndoyo, ta cua quihun chi ve luhu sehun chi sihi ve, ta cua cuhun ndico ndo iti ñuhun Israeel, vati cha ni chihi ra nducu cahni chi ve ―cati ra. 21Chacan cuu cha ni ndoyo ra Cusee, ta quihin ra chi ve chi sihi ve, ta quee ñi cuahan ñi iti ñuhun Israeel. 22Tacan cuu, ta chini soho ra ti ra Arquelao cuu ra ndaca ñahan ñuun Judaa, tiñu nuun ra Herode sutu ra. Chacan cuu cha yuhvi ra Cusee cuhun ndico ra iti tican. Ta cahan ndico tucu ra Ndioo chi ra tichi ñumahna, ta cuahan ra Cusee chi ñi iti ñuhun Galilea. 23Cuahan ra tican, ta ni chacoo ra iin ñuun nani Nazaret. Cuhva can ni chinu cha cati tuhun ra ni cahan cuenda ra Ndioo, vati cati ra ti ra ñuun Nazaret cua cuu ra Jesuu.


Copyrighted Material
Learn More

will be added

X\