ROMA 9

1Apo nan ka ambo katokan ko, adolah kabanaran, dek karano ambo miliak Isa Almasih. Ambo indak ka baduto doh. Ati ketek ambo nan dibimbiang dek Roh Allah, mayakinkan ambo pulo, baraso kato-kato ambo ko bana. 2Ambo sadiah sangaik, nan ati ambo sansaro pulo, 3dek karano di sudaro-sudaro ambo, nan sabanso jo ambo. Asakan layi untuak kasalamaiktan inyo tu kasadonyo, ambo sandiri rilah dikutuak dek Allah, sarato rilah pulo dipisahkan dari Isa Almasih. 4Inyo tu adolah umaik nan tapiliah, nan Allah ma-angkek inyo tu, manjadi anak-anak Baliau sandiri, sarato manyatokan kuwaso Baliau kabake inyo tu. Baliau mambuwek pajanjian jo inyo tu, sarato mambarikan paratuaran ugamo. Allah lah ma-agiah tawu kabake inyo tu, baa caro inyo musti ba-ibadaik, nan inyo tu lah manarimo pulo janji-janji Baliau. 5Inyo tu adolah katurunan dari niniak muyang kito. Isa Almasih sacaro manusia, barasa dari banso inyo tu. Baliau labiah tenggi dari kasadonyo. Tapujilah Allah untuak salamo-lamonyo! Amin. 6Ambo indak bamukasuik ma-ngatokan, baraso janji Allah indak balaku lai; tapi, indak doh kasadonyo umaik Israel, adolah umaik nan dipiliah dek Allah. 7Indak kasadonyo doh katurunan Ibrahim, adolah anak-anak Allah. Dek karano, Allah lah bakato kabake Ibrahim, ”Hanyo katurunan Ishak sajolah, nan ka dinamokan katurunan angkau.” 8Itu ba-arati, baraso katurunan Ibrahim nan manjadi anak-anak Allah, iyolah hanyo katurunannyo nan layie dek karano janji Allah; sarato indak doh kasadonyo katurunan inyo. 9Dek karano, janji Allah iyolah bakcando iko, ”Pado wakatu nan lah ditantukan, Aden ka babaliak, mako, Sarah ka mampunyoi surang anak laki-laki.” 10Tapi, indak hanyo itu sajo: Ribka malayiekan duwo urang anak lakilaki, dari surang bapak, iyolah Ishak niniak muyang kito. 11Sabalun kaduwo urang anak tu layie, Allah lah manantukan piliahan Baliau untuak salanjuiknyo. Piliahan Allah tu, indak bagantuang kabake apo nan dapek dipabuwekkan dek urang doh, tapi, tagantuang kabake panggielan Allah tu sandiri. Dek karano, pado wakatu kaduwo urang anak laki-laki Ribka tu, alun dapek lai mampabuwek sasuatu nan baiak, atau pun nan jahek, 12Allah lah mangatokan kabake Ribka, ”Anak nan gadang, ka manjadi pisuruah anak nan ketek.” 13Di Alkitauk ado tatulih, baraso Allah bakato bakcando iko, ”Aden mangasiahi Yakub, tapi mambanci-i Esau.” 14Jadi, apokoh kasimpualan kito kiniko? Indak adiekoh Allah tu? Tantu nan Allah tatauk adie! 15Dek karano, Allah lah bakato kabake Musa, ”Aden ka manyatokan rahmaik-Den, kabake urang nan Waden niyo manyatokan rahmaik, nan Aden ka manyatokan raso ibo-Den, kabake urang nan Waden niyo manyatokan raso ibo.” 16Jadi, kaputusan Allah tu indaklah bagantuang kabake karilahan manusia, atau kabake usawo manusia, tapi, hanyo kabake kabaiakkan ati Allah sajo, taradok urang nan Baliau piliah tu. 17Dek karano, di Alkitauk ado tatulih, ”Allah bakato kabake rajo Mesir, ’Aden manjadikan angkau rajo, hanyo untuak mukasuik nan ciyek ko sajo, iyolah, supayo malalui angkau, Aden dapek manyatokan kakuwasoan-Den, sarato mambuwek namo-Den tamusawua di muko bumi.’ ” 18Jadi, Allah ka maraso ibo kabake surang urang, jikok Allah ma-inginkan nan bakcando itu. Nan Allah bisa pulo mambuwek urang kareh kapalo, jikok Allah ma-inginkan nan bakcando itu. 19Nan kiniko, tantu sudaro ka bakato kabake ambo bakcando iko, ”Jikok baitu, baa mangko Allah niyo juwo lai manyalahkan manusia? Indakkoh bakcando nan lah dikatokan, baraso indak surang juwo doh urang, nan ka bisa managah ka-inginan Allah?” 20Tapi sudaro! Angkau hanyolah manusia. Angkau indak buliah doh barani mangecek bakcando itu kabake Allah! Buliahkoh balango batanyo kabake urang nan mambuweknyo, ”Baa mangko angkau mambuwek ambo bakcando iko?” 21Indakkoh urang nan mambuwek balango tu, ba-hak mampabuwek tanah liyek tu sakandak atinyo? Dari sagumpa tanah liyek, urang tu ba-hak mambuwek duwo macam balango: ciyek nan rancak, nan ciyek lai kurang rancak. 22Baitu pulolah nan dipabuwek dek Allah. Baliau baniyaik untuak malapehkan bangih Baliau, sarato mampaliyekkan kakuwasoan Baliau. Tapi, biyapun baitu, Baliau saba taradok urang-urang nan musti di-ukun, dek karano mampabuwek nan ka dibangihkan dek Baliau. 23Allah baniyaik pulo untuak manyatokan kabake kito, sukocito nan balimpah-limpah, nan Baliau curahkan kabake kito nan di-ibo-i dek Baliau. Kito lah dipasiyaukkan Baliau untuak manarimo sukocito tu. 24Kito nan lah dipanggie dek Baliau, indak doh hanyo dari banso Yahudi, tapi, ado pulo dari banso-banso lain. 25Dek karano, di kitauk Nabi Hosea, Allah lah bakato, ”Urang-urang nan indak umaik-Den, ka Den namokan ’Umaik-Den’. Banso nan indak Den kasiahi, ka Den namokan ’Urang nan Den kasiahi'. 26Baitu pulo, di tampaik dima ka dikatokan kabake urang, Angkau indak doh umaik-Den,’ mako, di sinan tu, urang-urang tu ka dinamokan, anak-anak Allah nan iduik.” 27Nabi Yesaya lah bakato jo sacaro nan jaleh sangaik, tantang banso Israel, ”Biyapun bilangan banso Israel sabanyak kasiek di lauik, tapi, hanyo saketek sajo nan lai ka salamaik; 28dek karano, Tuhan ka sacapeknyo manjatuahkan ukunan taradok sa-isi dunia.” 29Yesaya lah bakato pulo bakcando iko, ”Santano Allah Nan Mahakuwaso, indak maninggakan untuak kito katurunan, mako, lah musti kito kasadonyo, ka samo jo bakcando Sodom jo Gomora.” 30Jadi, kasimpualannyo iyolah bakcando iko: Banso-banso lain nan indak urang Yahudi, indak bi ba-usawo doh, supayo ubuangannyo jo Allah manjadi elok baliak. Tapi, dek karano inyo tu layi bi picayo, mako, Allah mambuwek ubuangan inyo tu, elok baliak jo Baliau. 31Baitu pulo sabaliaknyo, urang-urang Yahudi taruih ba-usawo mamatuahi paratuaran ugamo, supayo ubuangan inyo tu elok baliak jo Allah. Tapi, malah inyo tu indak bi barasil mampaelok-i ubuangan. 32Baa mangko inyo tu indak bi barasil? Dek karano, inyo tu mangarajokan paratuaran tu, indak malalui iman kabake Allah, tapi, malalui usawo inyo sandiri. Mako, inyo tu bi jatuah tataruang di ”Batu Sanduangan”. 33Tantang parkaro Batu Sanduangan tu, di Alkitauk lah tatulih bakcando iko, ”Paratikanlah nan iko: Di Sion lah Den latakkan sabuwah batu, nan ka mambuwek urang bi tataruang; iyolah sabuwah batu sanduangan, nan ka mambuwek urang bi tajarungkuik. Tapi, urang nan layi picayo kabake Inyo, indak ka kucawai.” ROMA

will be added

X\