ROMA 8

1Kiniko indak ado lai ukunan taradok urang-urang nan iduiknyo lah basatu jo Isa Almasih. 2Dek karano, paratuaran Roh Allah nan manjadikan kito iduik basatu jo Isa Almasih, nan lah malapehkan ambo dari paratuaran nan manyabaukkan doso, sarato jo mauik. 3Apo nan indak mungkin dikarajokan tantang paratuaran ugamo, dek karano kito ko manusia lamah, mako, itu lah dikarajokan dek Allah. Allah mangalahkan kuwaso doso dalam tabiyaik manusia, jo sacaro ma-utuih Anak-Nyo sandiri, nan datang dalam ka-adaan samo jo manusia nan badoso, untuak ma-apuihkan doso. 4Allah mampabuwek nan baitu, supayo kahandak Baliau nan dinyatokan dalam paratuaran ugamo Yahudi tu, dapek dijalankan dalam diri kito nan iduik manuruik Roh Allah, sarato indak doh manuruik tabiyaik manusia. 5Urang-urang nan iduik manuruik tabiyaik manusia, taruih mamikiekan, apo nan di-inginkan dek tabiyaik manusia. Tapi, urang-urang nan iduik manuruik Roh Allah, taruih mamikiekan apo nan di-inginkan dek Roh Allah. 6Jikok pikieran angkau dikuwasoi dek tabiyaik manusia, mako, akibaiknyo mauik. Tapi, jikok pikieran angkau dikuwasoi dek Roh Allah, mako, angkau ka mandapek iduik nan sajati, sarato kadamaian jo Allah. 7Urang nan pikierannyo dikuwasoi dek tabiyaik manusia, ba-arati urang tu bamusuahan jo Allah; dek karano urang tu indak tunduak kabake paratuaran Allah; nan inyo iyo indak bisa tunduak kabake paratuaran Allah. 8Urang-urang nan iduiknyo manuruik tabiyaik manusia, indak ka bisa doh manyanangkan ati Allah. 9Tapi, angkau iduik indak manuruik tabiyaik manusia doh. Tantu manuruik Roh Allah, - jikok iyo Roh Allah sabana-bana mamacik kamudi di diri angkau. Urang nan indak mampunyoi Roh Isa Almasih, urang tu indak doh miliak Isa Almasih. 10Tapi, jikok Isa Almasih iduik di dalam diri angkau, mako, biyapun tubuah angkau ka mati dek karano di doso, tapi, Roh Allah mambarikan iduik nan sajati kabake angkau, dek karano, ubuangan angkau jo Allah lah elok. 11Jikok Roh Allah nan lah ma-iduikkan Isa Almasih sasu-dah mati, iduik di dalam diri angkau, mako, Baliau nan lah ma-iduikkan Isa Almasih sasudah mati tu, ka ma-iduikkan pulo baliak tubuah angkau nan bisa mati tu. Baliau mampabuwek tu jo Roh Baliau nan iduik di dalam diri angkau. 12Itulah sabauknyo sudaro-sudaro, kito mampunyoi tangguang jawauk; tapi, indak doh tangguang jawauk kabake tabiyaik manusia; kito jan iduik manuruik tabiyaik manusia. 13Dek karano, jikok angkau iduik manuruik tabiyaik manusia, mako, angkau ka mati; tapi, jikok jo kuwaso Roh Allah, angkau taruih mamatikan sagalo pabuatan angkau nan badoso, mako, angkau ka mandapek iduik nan sajati. 14Urang-urang nan iduik dibimbiang dek Roh Allah, adolah anak-anak Allah. 15Dek karano, Roh nan dibarikan dek Allah kabake angkau, indaklah mampabuwek angkau manjadi budak, sainggo angkau iduik dalam katakuik-an. Tapi, sabaliaknyo, Roh Allah tu nan manjadikan angkau anak-anak Allah. Sarato jo kuwaso Roh Allah tu kito ba-imbau kabake Allah tu, ”Oih Abak, oih Abak ambo!” 16Roh Allah samo-samo jo roh kito manyatokan, baraso kito adolah anak-anak Allah. 17Nan jikok kito adolah anak-anak Baliau, mako, kito pun adolah suwarih Baliau, nan ka manarimo barakaik-barakaik nan lah disadiyokan dek Allah untuak anak-anak-Nyo. Kito ka manarimo samo-samo jo Isa Almasih, apo nan lah disadiyokan dek Allah untuak Baliau; dek karano, jikok kito layi sato samo-samo sansaro jo Isa Almasih, mako, kito ka dimuliekan pulo samo-samo jo Baliau. 18Manuruik pandapek ambo, sagalo sansaro nan kito tangguangkan kiniko, indak ado doh aratinyo, jikok dibandiangkan jo kamuliyaan, nan ka dinyatokan kabake kito isuak. 19Kaciyek-annyo alam nangko, sabana taragak sangaik, pabilokoh masonyo Allah ka manyatokan anak-anak-Nyo. 20Dek karano, alam ko lah dipadiyakan manjadi rapuah, indak doh dek karano kahandak inyo sandiri, tapi, dek karano Allah mampadiyakannyo bakcando itu. Tapi, biyapun baitu, layi ado juwo arapan nan bakcando iko: 21baraso pado suatu kutiko, alam ko ka dilapehkan dari kuwaso nan mambinasokannyo, sarato ka sato pulo dimardekakan, sarato jo dimuliekan samo-samo jo anak-anak Allah. 22Kito lah tawu, baraso sampai kiniko, kaciyek-annyo alam nangko mangaluah dek karano kasakik-an, nan ibaraik surang mandeh, nan maraso kasakik-an di kutiko ka malayiekan anak. 23Sarato indak doh kaciyek-annyo alam ko sajo nan mangaluah; kito sandiri pun bi mangaluah pulo di batin kito. Kito lah manarimo Roh Allah, sabagai pambarian Allah nan partamu, tapi, kito sadang mananti juwo lai, pabilokoh Allah ka malapehkan diri kito kaciyek-annyo, sarato ka manyatokan kito jadi anak-anak-Nyo. 24Dek karano kito ma-arokkan, itu mangkonyo kito disalamaikkan. Tapi, jikok apo nan kito arokkan tu, lah kito liyek, mako, itu indak nan di-arokkan lai tu namonyo. Dek karano, siyakoh urang nan ma-arokkan juwo lai, sasuatu nan lah inyo liyek? 25Tapi, jikok kito ma-arokkan sasuatu nan alun kito liyek, mako, kito saba manantinyo. 26Baitu pulo, Roh Allah tibo manolong kito jikok kito lamah. Dek karano kito indak tawu doh, baa samustinyo caro kito badowa; Roh tu sandirilah nan mangadauk kabake Allah, nan mamohonkan untuak kito, jo raso taragak nan sangaik dalam, sainggo indak dapek lai dikatokan. 27Mako, Allah nan mangatawui isi ati manusia, mangarati ka-inginan Roh tu; dek karano Roh tu mamohon kabake Allah, untuak umaik Allah, nan sasuwai jo kahandak Allah. 28Kito tawu, baraso Allah ma-atur sagalo parkaro, sainggo ma-asiekan nan baiak untuak urang-urang nan mangasiahi Baliau, sarato nan dipanggie Baliau sasuwai jo rancana Baliau. 29Urang-urang nan lah dipiliah dek Allah, nan lah ditantukan pulo sajak dari samulo, untuak manjadi sarupo jo Anak Baliau, iyolah Isa Almasih. Jo caro nan baitu, Anak Baliau tu manjadi nan partamu di antaro banyak sudaro-sudaro. 30Baitulah caronyo Allah mamanggie urang-urang tu, nan lah ditantukan dek Baliau labiah dulu; nan urang-urang nan dipanggie dek Baliau tu, dimungkinkan Baliau ba-elok baliak jo Baliau. Nan urang-urang nan dimungkinkan Baliau ba-elok baliak jo Allah, ma-ambiak bagian dalam iduik Allah sandiri. 31Apokoh nan dapek dikatokan kiniko, tantang kasadonyo tu? Jikok Allah dipiyak kito, siyakoh urang nan ka dapek malawan kito? 32Anak Baliau sandiri, indak Baliau sayangkan, malah Baliau sarahkan untuak kaparaluan kasadonyo kito; masokan Baliau indak ka mambarikan kabake kito, sagalo sasuatu nan lainnyo? 33Siapokoh urang nan ka bisa mangadukan kito umaik piliahan Allah, jikok Allah sandiri lah manyatokan, baraso kito indak basalah? 34Apokoh ado urang nan niyo manyalahkan kito? Isa Almasih isuak, nan ka mambela kito! Baliau-lah nan lah mati, atau malah Baliau nan lah di-iduikkan baliak sasudah mati, sarato barado pado Allah di tampaik nan bakuwaso. 35Apokoh ado nan ka bisa mamisahkan kito dari kasiah Isa Almasih? Bisakoh kasusahan mamisahkan, atau kasuliktan, atau dek di-aniayo, atau paruik lapa, atau bansaik iduik, atau bahayo, atau pun mauik? 36Di Alkitauk ado tatulih nan bakcando iko, ”Sapanjang ari, iduik kami dalam bahayo mauik dek karano di Angkau. Kami dipabuwek bakcando domba nan ka didabiah.” 37Tapi, nan sabananyo indak! Malah dalam kasadonyo tu, kito mandapek kamanangan nan samparono, dari Baliau nan mangasiahi kito! 38Dek karano, ambo sabana yakin, baraso di muko bumi ko, biya mauik atau pun iduik, biya malekaik atau pun panguwaso, biya sagalo ancaman di maso kiniko, atau pun sagalo ancaman di maso nan ka tibo, atau kakuatan-kakuatan lainnyo; 39biya sagalo parkaro nan di langik, atau pun sagalo parkaro nan ado di bumi, atau apo sajo nan lainnyo, kasadonyo tu, indak ka bisa doh mamisahkan kito dari kasiah Allah, bakcando nan lah Baliau nyatokan malalui Isa Almasih, Tuhan kito. ROMA

will be added

X\