ROMA 7

1Oih sudaro-sudaro ambo! Angkau kasadonyo lah bi tawu jo paratuaran. Jadi, angkau lah bi tawu, baraso paratuaran bakuwaso taradok surang urang, hanyo balaku salamo urang tu layi iduik juwo lai. 2Umpamonyo, ado surang padusi nan balaki, inyo ta-ikek dek paratuaran kabake lakinyo, hanyo salamo lakinyo layi iduik juwo lai. Jikok lakinyo lah mati, mako, padusi tu lah lapeh dari paratuaran nan ma-ikek inyo jo lakinyo. 3Jikok padusi tu balaki jo laki-laki nan lain, sadangkan kutiko itu, nan lakinyo layi iduik juwo lai, mako, padusi tu di-anggauk bajina. Tapi, jikok lakinyo lah mati, mako, sacaro jo paratuaran, nan padusi tu lah talapeh ikek jo lakinyo. Jikok inyo balaki jo laki-laki nan lain, nan inyo indak dikatokan bajina doh. 4Oih sanak-sanak ambo, baitu pulo ka-adaannyo jo diri angkau. Taradok paratuaran ugamo Yahudi, angkau lah mati, dek karano angkau lah dipasatukan jo tubuah Isa Almasih, sarato lah manjadi miliak Baliau nan lah di-iduikkan baliak sasudah mati. Baliau di-iduikkan baliak sasudah mati, supayo kito manjadi umaik nan baguno dek Allah, di dalam iduik kito. 5Dek karano, dulu kito iduik mampaturuikkan kandak tubuah kito. Di kutiko itu ado pangana-pangana buruak di diri kito, nan timbua dek karano adonyo paratuaran ugamo, itulah nan manjadi kamudi di diri kito. Itulah sabauknyo, mangko kito suko mampabuwek doso-doso nan mambawok mauik. 6Tapi nan kiniko, kito indak takabek lai dek paratuaran ugamo Yahudi. Kito lah mati taradok paratuaran tu, nan dawulunyo lah manguwasoi diri kito. Kito indak lai ba-ibadaik jo caro nan lamo, manuruik paratuaran nan tatulih. Kiniko kito ba-ibadaik manuruik caro nan baru, nan lah ditunjuakkan dek Roh Allah kabake kito. 7Jikok baitu, apokoh nan dapek kito katokan? Kito katokan paratuaran ugamo Yahudi tu doso? Tantu indak! Tapi, dek karano di paratuaran tu lah, mangkonyo ambo tawu tantang doso. Ambo indak ka tawu doh apo tu cangok, jikok paratuaran ugamo indak mangatokan, ”Janlah cangok.” 8Malalui paratuaran ugamo, doso mandapek jalan, untuak manimbuakan sagalo rupo ka-inginan nan cangok di ati ambo; dek karano, jikok paratuaran ugamo indak ado, mako, doso pun mati. 9Dawulu ambo iduik indak baparatuaran ugamo doh. Tapi, kutiko paratuaran ugamo lah tibo, mako, pangaruah doso muloi iduik, 10nan ambo mati. Mako, paratuaran ugamo tu, nan pado mulonyo, dimukasuikkan untuak mambawok kabake iduik nan sajati, tapi, malah mambawok mauik kabake ambo. 11Dek karano, malalui paratuaran ugamo tu, doso mandapek jalan untuak mangicuah, sarato jo mambunuah ambo. 12Paratuaran ugamo barasa dari Allah, sarato satiyok parentah nan di dalam paratuaran tu, datangnyo dari Allah, jadi, kasadonyo tu adie, sarato jo elok. 13Jikok baitu, apokoh itu ba-arati nan elok tu mandatangkan mauik ka diri ambo? Tantu indak! Dosolah nan mandatangkan mauik tu. Jo sacaro mamakai nan elok, doso mandatangkan mauik ka diri ambo, supayo sipaik-sipaik doso jaleh kaliyatannyo. Malalui sagalo parentah Allah, mako tabuktilah bara ka jaheknyo doso. 14Kito tawu, baraso paratuaran ugamo Yahudi barasa dari Roh Allah; tapi nan ambo ko manusia lamah. Ambo lah tajuwa untuak manjadi budak doso. 15Dek karano, ambo sandiri indak mangarati pabuatan ambo. Sagalo parkaro nan niyo nak ambo pabuwek, tapi, indak itu doh nan ambo pabuwek; sagalo parkaro nan ambo banci-i, malah itu nan ambo pabuwek. 16Jadi, jikok ambo mampabuwek sagalo parkaro nan batantangan jo ka-inginan ati ambo, itu ba-arati ambo ma-akui baraso paratuaran ugamo Yahudi tu elok. 17Jadi, nan sabananyo, indak ambo doh lai nan mampabuwek kasadonyo tu, tapi, adolah doso nan manguwasoi diri ambo. 18Ambo tawu, baraso indak ciyek juwo doh nan elok di dalam diri ambo; iyolah di dalam tabiyaik ambo sabagai manusia. Dek karano, ado ka-inginan dek ambo untuak babuwek baiak, tapi, indak talok doh dek ambo mangarajokannyo. 19Ambo indak mampabuwek nan elok, nan niyo nak ambo pabuwek; tapi, malah sabaliaknyo, ambo mampabuwek sagalo parkaro nan jahek, nan ambo indak niyo doh nak mampabuweknyo. 20Jikok ambo mampabuwek sagalo parkaro nan ambo indak niyo doh nak mampabuweknyo, itu ba-arati, indak ambo doh tu nan mampabuwek sagalo parkaro tu, tapi, adolah doso nan manguwasoi diri ambo. 21Jadi, ambo ma-ambiak kasimpualan, baraso paratuaran ikolah nan mamacik kamudi: iyolah, jikok ambo nak mampabuwek nan elok, mako, hanyo nan jahek sajo nan timbua di diri ambo. 22Batin ambo suko kabake paratua-ran Allah, 23tapi, ambo manyadari, baraso dalam diri ambo, ado pulo paratuaran lain, nan mamacik kamudi - iyolah paratuaran, nan balawanan jo paratuaran nan di-akui dek aka budi ambo. Itulah sabauknyo, mangko ambo ta-ikek ka paratuaran doso, nan mamacik kamudi di dalam diri ambo. 24- 25jadi, bakcando ikolah ka-adaan ambo: ambo mamatuahi paratuaran Allah jo aka budi ambo, tapi, jo tabiyaik manusia ambo, ambo tunduak kabake doso. Baralah ka cilakonyo diri ambo ko! Siyakoh urang nan lai ka namuah manyalamaikkan ambo, dari tubuah nan mambawok ambo kabake mauik? Ambo basyukur kabake Allah! Baliau namuah manyalamaikkan ambo malalui Isa Almasih. ROMA

will be added

X\