ROMA 6

1Jikok baitu, apokoh nan dapek kito katokan? Apokoh kito musti juwo mampabuwek doso, supayo Allah samakin maraso ibo kabake kito? 2Tantu indak! Doso indak lai bakuwaso taradok kito, jadi, dima pulo bisa kito taruih manaruih iduik mampabuwek doso? 3Layi tawukoh angkau, baraso di kutiko kito dipamandikan, kito dipasatukan jo Isa Almasih? Itu ba-arati kito lah dipasatukan jo kamatian Baliau. 4Jo sacaro kito dipamandikan tu, kito lah dikubuakan samo-samo jo Isa Almasih, sarato lah sato pulo mati samo-samo jo Baliau, supayo, bakcando Isa Almasih di-iduikkan baliak sasudah mati, jo kuwaso Bapak nan mulie, baitu pulolah kito manjalani suatu iduik nan baru. 5Dek karano, jikok kito lah manjadi satu jo apo nan samo jo kamatian Isa Almasih, mako, kito ka manjadi satu pulo, jo apo nan samo jo Baliau nan lah iduik baliak sasudah mati. 6Kito mangatawui, baraso tabiyaik kito nan lamo sabagai manusia, lah dimatikan samo-samo jo Isa Almasih di kayu salib, supayo pangaruah tabiyaik kito nan badoso tu dibinasokan; jo caro nan baitu, kito indak lai dipabudak dek doso. 7Dek karano, jikok surang urang lah mati, mako, urang tu lah lapeh dari pangaruah doso. 8Jikok kito lah sabana-bana mati samo-samo jo Isa Almasih, mako kito yakin, baraso kito pun ka iduik pulo samo-samo jo Baliau. 9Dek karano kito tawu, baraso Isa Almasih lah di-iduikkan baliak sasudah mati, nan Baliau indak ka mati-mati lai; mauik indak lai bakuwaso taradok diri Baliau. 10Mauik nan lah di-alami dek Isa Almasih, adolah mauik dek karano doso. Itu hanyo tajadi sakali sajo untuak salamo-lamonyo. Iduik nan Baliau jalani kiniko, adolah iduik untuak Allah. 11Angkau musti pulo bi ma-anggauk diri angkau lah mati taradok doso, tapi, iduik dalam ubuangan nan arek jo Allah malalui Isa Almasih. 12Jan dipadiyakan juwo lai doso manguwasoi iduik angkau, nan indak ka bara lamo ko, supayo angkau jan mampaturuikkan juwo kandak ati angkau nan jahek. 13Jan pulolah angkau manyarahkan angguato tubuah angkau, kabake pangaruah doso, nan dipagunokan untuak mukasuik-mukasuik nan jahek. Tapi, sarahkanlah diri angkau kabake Allah, sabagai urang nan lah dipindahkan dari mauik kabake iduik. Sarahkanlah diri angkau kaciyek-annyo kabake Allah, supayo dipakai untuak mangarajokan kahandak Allah. 14Doso indak buliah doh manguwasoi angkau, dek karano, angkau indak lai iduik di bawah paratuaran ugamo Yahudi, tapi, di bawah rahmaik Allah. 15Kiniko, apo kasimpualannyo? Buliahkoh kito babuwek doso, dek karano kito indak lai di bawah kuwaso paratuaran ugamo Yahudi, tapi, di bawah kakuwasoan rahmaik Allah? Tantu, sabana-bana indak buliah! 16Layi tawukoh angkau, jikok angkau manyarahkan diri kabake surang urang, untuak mangarajokan kahandak inyo, mako, angkau adolah pisuruah dari urang nan angkau patuahi tu-antah kok iyo angkau budak doso, nan ka mambawok angkau kabake mauik, atau pisuruah nan patuah kabake Allah, jo caro nan baitu, ba-elok baliak jo Allah. 17Tapi, batarimo kasihlah kabake Allah! Dek karano, dulu angkau adolah budak doso, tapi, nan kiniko angkau jo sapanuah ati, mamatuahi pangajaran nan bana, nan lah di-ajakan kabake angkau. 18Angkau lah dilapehkan dari kabek doso, nan kiniko angkau adolah budak untuak mangarajokan kahandak Allah. 19Dek karano pikieran angkau kurang manangkok, itu mangkonyo ambo mamakai ibaraik pabudakkan, supayo angkau labiah mudah untuak mangarati. Dawulu angkau manyarah-kan diri angkau kaciyek-annyo, jadi budak untuak mangarajokan sagalo parkaro nan kumuah, sarato jo nan jahek, untuak mukasuik-mukasuik nan jahek. Baitu pulo kiniko, andaklah angkau manyarahkan diri angkau kaciyek-annyo, sabagai budak untuak mangarajokan kahandak Allah, untuak mukasuik-mukasuik Allah nan tasandiri. 20Di kutiko angkau dipabudak dek doso, angkau jauah dari apo nan kahandak dek Allah. 21Pado wakatu itu, ka-untuangan apokoh nan angkau padapek, dari sagalo parkaro nan kiniko angkau lah malu mampabuweknyo? Pabuatan-pabuatan tu, hanyo mambawok kabake mauik! 22Tapi nan kiniko, angkau lah dilapehkan dari kabek doso, sarato lah manjadi pisuruah Allah. Ka-untuangan angkau iyolah, baraso angkau iduik sangajo untuak Allah, nan parkaro itu ka ma-asiekan iduik sajati nan kaka. 23Dek karano, upah doso adolah mauik; tapi, iduik sajati nan kaka, nan samo-samo jo Isa Almasih Tuhan kito, adolah pambarian nan dibarikan dek Allah, jo sacaro nan indak mambayie. ROMA

will be added

X\