ROMA 5

1Kiniko kito lah ba-elok baliak jo Allah, dek karano kito ba-iman. Nan dek karano itu, kito iduik dalam kadamaian jo Allah, malalui Tuhan kito Isa Almasih. 2Dek karano kito ba-iman kabake Isa Almasih, mako, Baliau mamungkinkan kito untuak dapek marasokan kasiah Allah, sarato jo kasiah tu lah kito iduik kiniko. Dek karano itu kito basukocito, sabauk kito mampunyoi nan di-arokkan, baraso kito ka marasokan sukocito nan dibarikan dek Allah! 3Nan labiah daripado itu, kito pun basukocito dalam kasansaroan, dek karano kito tawu, baraso kasansaroan manimbuakan katakunan, 4nan katakunan tu ka mambuwek urang tahan bantiang; ikolah nan manimbuakan pangarapan. 5Arapan nan bakcando iko, indak ka mangucawaikan kito, dek karano Allah lah ma-isi ati kito jo kasiah-Nyo. Allah mampabuwek itu jo parantaroan Roh-Nyo, nan lah dibarikan kabake kito. 6Kutiko kito dalam ka-adaan indak badayo, Isa Almasih lah mati untuak kito pado wakatu nan tapek, nan lah ditantukan dek Allah; padohal kito adolah urang-urang nan durako kabake Allah. 7Untuak surang urang nan adie pun, sulik urang nan namuah mati. Tapi, mungkin untuak surang urang nan elok, ado juwo urang nan barani mati. 8Tapi, Allah manyatokan kasiah-Nyo kabake kito, kutiko Isa Almasih mati untuak kito, pado wakatu kito sadang dikuwasoi juwo lai dek doso. 9Kiniko kito lah ba-elok baliak jo Allah, malalui kamatian Isa Almasih; dek karano itu, lah musti kito ka disalamaikkan pulo dari ukunan Allah, dek Isa Almasih. 10Jikok pado maso kito mandurako kabake Allah, kito dipadamaikan jo Baliau malalui kamatian Anak Baliau, apo lai kiniko, sasudah ubuangan kito lah elok baliak jo Allah, tantu kito ka disalamaikkan pulo malalui iduik Isa Almasih. 11Nan labiah daripado itu, kito pun basukocito pulo taradok kabaiakkan Allah, malalui Tuhan kito Isa Almasih. Dek karano, malalui Isa Almasih kiniko kito lah marasokan ubuangan kito nan lah elok tu jo Allah. 12Doso masuak ka dalam dunia malalui urang surang, nan dari doso tu timbualah mauik. Akibaiknyo, mauik manjala kabake sadonyo umaik manusia, dek karano itu, kasadonyo urang lah bi badoso. 13Sabalun paratuaran ugamo Yahudi diturunkan, nan doso lah ado di dalam dunia. Tapi, doso tu indak dituntuik, dek karano, alun ado paratuaran nan dilangga. 14Tapi, biyapun baitu, dari jaman Adam sampai ka jaman Musa, mauik lah manguwasoi kasadonyo umaik manusia. Malahan, urang-urang nan indak mampabuwek palanggaran, bakcando nan dipabuwek dek Adam, urang-urang tu pun lah sato pulo dikuwasoi dek mauik. Adam adolah gambaran, dari Baliau nan datang kamudian. 15Tapi, kaduwonyo tu indak samo doh; dek karano, pambarian Allah jauah labiah gadang, jikok dibandiangkan jo palanggaran nan dipabuwek dek Adam. Palanggaran nan dipabuwek dek surang urang, manyabaukkan kasadonyo urang dikuwasoi dek mauik. Jauah labiah gadang lai rahmaik Allah, sarato jo pambarian kasalamaiktan, nan dibarikan dek Allah kabake urang nan lai namuah manarimo, malalui kabaiakkan ati surang Urang, iyolah Isa Almasih. 16Pambarian Allah jauah pulo labiah gadang, daripado doso urang nan surang tu. Dek karano, sasudah surang urang mambuwek palanggaran, mako, kaluwalah kaputusan, ”Angkau badoso”. Tapi, sasudah lah sambuah urang nan bi badoso, mako, tibolah pambarian dari Allah, nan manyatokan, ”Doso kalian lah di-ampuni”. 17Dek karano palanggaran di urang surang, mako, mauik lah manjala kian kumari, malalui urang nan surang tu. Nan talabiah gadang lai, adolah arago dari apo nan dipabuwek dek Urang nan surang lai, iyolah Isa Almasih. Malalui Baliau, Allah malimpahkan rahmaik-Nyo, kabake urang nan layi namuah manarimo jo sacaro indak mambayie, sarato mambukak jalan dek urang-urang tu, untuak ba-elok baliak jo Allah; mako, inyo tu ka bi bakuwaso di dunia ko, malalui Isa Almasih. 18Jadi, samo jo bakcando palanggaran dek urang surang, nan ma-akibaikkan kasadonyo umaik manusia di-ukun, baitu pulo, dek pabuatan Urang surang, nan sabana patuah kabake Allah, mako, barakaiknyo adolah, kasadonyo urang dilapehkan dari doso, sarato dibari iduik nan sajati. 19Jadi, dek karano surang urang nan indak patuah, mako, kasadonyo urang lah manjadi urang badoso, baitu pulo sabaliaknyo, dek pabuatan surang Urang nan sabana patuah kabake Allah, mako, kasadonyo urang dimungkinkan ba-elok baliak jo Allah. 20Nan mambarikan paratuaran ugamo Yahudi, adolah Allah sandiri. Tapi, samakin ba-usawo manusia mamatuahi paratuaran tu, mako, samakin inyo tu bi malangga paratuaran tu, sarato badoso taradok Allah. Tapi, samakin manusia babuwek doso, Allah samakin maraso ibo pulo kabake inyo tu. 21Jadi, kito musti mati dek karano kito babuwek doso. Tapi, Allah mangasiahi kito, sarato mambukak jalan kabake kito, untuak ba-elok baliak jo Baliau. Nan dek karano ubuangan kito lah elok baliak jo Allah, mako, Baliau mambarikan pulo iduik sajati nan kaka kabake kito, malalui Isa Almasih, Tuhan kito. ROMA

will be added

X\