ROMA 4

1Jikok baitu, apokoh nan dapek kito katokan tantang Ibrahim, niniak muyang banso kito? Baa koh pangalamannyo? 2Jikok sagalo parkaro nan dikarajokannyo, manyabaukkan Allah manarimo inyo, sabagai urang nan manyanangkan ati Allah, mako, ado juwo alasan dek inyo, untuak mamanggak-manggak. Tapi, inyo indak dapek doh mamanggak di adok-an Allah. 3Di Alkitauk ado tatulih, ”Ibrahim ba-iman kabake Allah, sarato dek karano di imannyo tu, inyo ditarimo dek Allah sabagai urang nan manyanangkan ati Allah.” 4Urang nan bakarajo, manarimo upah; nan upahnyo tu, indak doh di-anggauk sabagai pambarian, dek karano itu adolah haknyo. 5Tapi, ado urang nan indak bagantuang kabake usawonyo sandiri; inyo mampicayokan dirinyo kabake Allah, nan manyatokan urang badoso, lapeh dari kasalahan. Dek karano imannyo tu lah, Allah manarimo urang tu sabagai urang nan manyanangkan ati Allah. 6Baitu pulolah pandapek Daud; itu sabauknyo mangko inyo mangucaukkan salamaik basukocito, kabake urang nan dek Allah lah ditarimo sabagai urang nan manyanangkan ati Baliau, Allah manarimo urang tu, indak tarago maliyek sagalo pabuatan urang tu. Daud bakato bakcando iko, 7”Basukocitolah, urang nan sagalo kasalahannyo dimaohkan, sarato jo sagalo dosonyo di-ampuni dek Allah! 8Basukocitolah, urang nan doso-dosonyo indak dituntuik dek Tuhan!” 9Apokoh ucapan basukocito tu, ditujukan hanyo kabake urang-urang nan ma-ikuik-i paratuaran basunaik sajo? Atau layi pulokoh kabake urang-urang nan indak ma-ikuik-i paratuaran basunaik? Lah kami katokan sabalunnyo, baraso, Ibrahim ditarimo dek Allah sabagai urang nan manyanangkan ati Baliau, dek karano Ibrahim ba-iman kabake Allah. 10Jadi, pabilokoh Allah manyatokan manarimo tu? Sabalun Ibrahim basunaik, atau sasudah basunaik? Batua, sabalun inyo basunaik, indak doh sasudah basunaik. 11Inyo basunaik kamudian, nan sunaiknyo tu hanyo sabagai tando, baraso Allah lah manarimo inyo sabagai urang nan manyanangkan ati Allah, dek karano inyo ba-iman kabake Allah. Inyo ditarimo dek Allah, pado wakatu inyo alun lai ma-ikuik-i paratuaran basunaik. Nan Ibrahim manjadi bapak sacaro rohani, dek kasadonyo urang nan ba-iman kabake Allah, sarato nan dek karanonyo lah ditarimo dek Allah, sabagai urang nan manyanangkan ati Baliau, biyapun inyo tu indak bi ma-ikuik-i paratuaran basunaik. 12Ibrahim adolah bapak rohani pulo, dek kasadonyo urang nan ma-ikuik-i paratuaran basunaik. Inyo manjadi bapak rohani urang-urang tu, indak doh hanyo dek karano, urang-urang tu ma-ikuik-i paratuaran basunaik, tapi, dek karano urang-urang tu, iduiknyo ba-iman pulo kabake Allah, samo jo bakcando Ibrahim, pado wakatu inyo alun ma-ikuik-i paratuaran basunaik. 13Allah bajanji kabake Ibrahim sarato jo katurunannyo, baraso dunia ko ka manjadi miliak Ibrahim. Allah bajanji bakcando itu, indak doh dek karano Ibrahim patuah kabake paratuaran ugamo Yahudi, tapi, dek karano inyo ba-iman kabake Allah, sainggo inyo ditarimo dek Allah sabagai urang nan manyanangkan ati Baliau. 14Dek karano, jikok hanyo urang-urang nan patuah kabake sagalo paratuaran ugamo Yahudi sajo, nan ka manarimo apo nan dijanjikan dek Allah, mako, iman kabake Allah indak paguno saketek juwo doh, nan janji Allah pun indak barisi. 15Paratuaran ugamo Yahudi mandatangkan ukunan Allah. Tapi, jikok paratuaran indak ado, mako, palanggaran pun indak ado pulo doh. 16Jadi, janji Allah tu badasarkan iman urang kabake Allah. Itu manjadi suatu jaminan kabake sadonyo katurunan Ibrahim, baraso janji tu dibarikan kabake urang-urang tu, sabagai suatu pambarian dari Allah, nan indak tarago mambayie; indak doh hanyo kabake urang-urang nan patuah, kabake paratuaran ugamo Yahudi sajo, tapi, iyo pulo kabake urang-urang nan ba-iman kabake Allah, samo jo bakcando Ibrahim ba-iman kabake Baliau. Dek karano, Ibrahim adolah bapak kito kasadonyo sacaro rohani. 17Dek karano, Allah lah bakato bakcando iko kabake Ibrahim, ”Aden lah manjadikan angkau bapak, untuak banyak banso.” Bakcando itulah Allah mambarikan janji tu kabake Ibrahim. Nan Ibrahim ba-iman kabake Baliau. Baliau-lah Allah, nan ma-iduikkan urang nan mati; Baliau pulolah Allah, nan hanyo jo kato-kato sajo, Baliau mambuwek apo nan indak panah ado, manjadi ado. 18Ibrahim tatauk ma-arokkan, sarato tatauk ba-iman, biyapun indak ado lai arapan. Dek karano itu, inyo manjadi bapak banyak banso. Bakcando nan lah tatulih di Alkitauk, ”Katurunan angkau indak ka ta-etong.” 19Ibrahim pado wakatu itu tawu, baraso inyo lah indak ka mungkin lai mandapek katurunan, dek karano inyo lah gaek sangaik, nan umuanyo lah ampia saratuih tawun; ciyek lai pulo, Sarah induak barehnyo tu, mandua. Tapi, biyapun baitu, nan iman Ibrahim indak bakurang. 20Inyo tatauk picayo, sarato indak ragu-ragu taradok janji Allah. Malah dek imannyo, manjadikan inyo batambah kuwaik, sainggo inyo mamuji-muji Allah. 21Inyo picayo sangaik, baraso Allah bisa mampabuwek apo nan lah Baliau janjikan. 22Itu sabauknyo Ibrahim ditarimo dek Allah, sabagai urang nan manyanangkan ati Allah. 23Kato-kato ”ditarimo sabagai urang nan manyanangkan ati Allah, ” tatulih indak doh hanyo untuak Ibrahim sajo, 24tapi, untuak kito iyo pulo. Kito ka ditarimo pulo, sabagai urang nan lah manyanangkan ati Allah, dek karano kito ba-iman kabake Allah, nan lah ma-iduikkan baliak Isa Almasih Tuhan kito, dari kamatian. 25Isa Almasih tu lah disarahkan untuak dibunuah, dek karano di doso-doso kito; sudah tu, Baliau di-iduikkan baliak dek Allah, untuak mamungkinkan kito ba-elok baliak jo Allah. ROMA

will be added

X\