ROMA 3

1Jikok baitu, apokoh untuangnyo manjadi urang Yahudi? Sarato apokoh payidahnyo mamatuahi paratuaran basunaik rasu? 2Tantu sajo banyak payidahnyo! Nan partamu-tamu, dek karano kabake urang Yahudi-lah, Allah mampicayokan kato-kato Baliau. 3Tapi, baa tu jikok sabagian urang Yahudi bi barubah ati? Apokoh dek karano itu, Allah manjadi barubah ati? 4Tantu indak! Dek karano, lah jaleh nan Allah tatauk bana, biyapun satiyok urang bi baduto. Di Alkitauk ado tatulih, ”Andaknyo angkau tabukti batua, dalam apo nan angkau katokan, nan angkau manang di kutiko angkau di-adieli.” 5Tapi, jikok ka-adielan Allah manjadi samakin nyato, dek karano kito mampabuwek nan indak batua, apokoh nan andak kito katokan? Kito katokan Allah indak adie, jikok Baliau ma-ukun kito? (Iyo patuik tanyo nan bakcando itu sacaro manusia.) 6Nan sabananyo indak baitu doh! Santano Allah indak adie, dima pulo ka mungkin Baliau ma-adieli dunia ko? 7Tapi, jikok dek karano pabuatan nan indak batua, mako, apo nan bana tantang Allah samakin nyato, sainggo Baliau dipuji. Baa mangko urang nan babuwek jahek tu, tatauk juwo lai disalahkan sabagai urang nan badoso? 8Baitu pulo, baa mangko kito indak buliah mangatokan, ”Eloklah kito babuwek jahek, supayo timbua kabaiakkan?" Iyo, ado urang-urang nan ma-ino ambo, jo sacaro mangatokan, baraso ambo lah bakato baitu. Urang-urang nan samacam itu, sapatuiknyo di-ukun dek Allah. 9Jadi, baa lai? Apokoh kito sabagai urang Yahudi, labiah elok daripado banso lain? Tantu indak! Kan lah ambo kamukokan, baraso, biya urang Yahudi atau pun banso lain, kasadonyo lah dikuwasoi dek doso. 10Bakcando nan tatulih di Alkitauk, ”Indak surang juwo doh urang nan batua, 11indak surang juwo doh urang nan lai mangarati, sarato indak surang juwo doh nan lai manyambah Allah. 12Kasadonyo urang lah bi manjauahkan diri dari Allah; kasadonyo urang lah bi sasek. Indak surang juwo doh nan layi mampabuwek nan bana; agak surang pun indak! 13Arakuangan inyo tu, nan bak kubuaran nan tangango. Tipu dayo ma-ilie dari lidahnyo, nan bibie inyo tu manyambuakan pitanah, nan bakcando biso ula. 14Muluik inyo tu panuah jo kutuak, sarato jo mancacek. 15Langkah inyo tu capek, jikok nak manangani urang, atau jikok nak mambunuah. 16Karusak-binasoan, sarato jo kasuliktan, inyo serakkan kian kumari. 17Inyo tu buto, taradok jalan nan tanang santoso, 18sarato indak bi ma-aromaik-i Allah.” 19Kiniko kito tawu, baraso kasadonyo nan tatulih dalam paratuaran ugamo Yahudi, adolah untuak urang-urang, nan barado di bawah pamarentahan paratuaran tu. Jo caro nan baitu, indak surang juwo doh urang nan lai dapek mambuwek alasan, sarato kaciyek-annyo dunia bisa dituntuik dek Allah. 20Dek karano, indak surang juwo doh urang nan dimungkinkan ba-elok baliak jo Allah, nan dek karano urang tu mangarajokan sagalo parkaro, nan ado dalam paratuaran ugamo. Malah sabaliaknyo, paratuaran tu hanyo manyatokan kabake manusia, baraso manusia badoso. 21Tapi kiniko, Allah lah manun-juakkan jalan, baa caronyo manusia ba-elok baliak jo Baliau; nan caronyo tu, indak ado doh sangkuik pauiknyo jo paratuaran ugamo Yahudi. Kitauk-kitauk Musa, sarato jo kitauk nabi-nabi, lah manunjuakkan caro nan ka ditampuah, 22baraso Allah mamungkinkan manusia ba-elok baliak jo Baliau, hanyo jikok manusia tu layi ba-iman kabake Isa Almasih. Allah mambukakkan jalan tu, untuak kasadonyo urang nan ba-iman kabake Isa Almasih; dek karano Allah indak mampalainkan urang: 23Kasadonyo urang lah badoso, sarato lah jauah dari Allah, nan andak ka manyalamaikkan inyo. 24Hanyo dek karano rahmaik Allah sajo, nan dibarikan jo sacaro indak mambayie, ubuangan manusia jo Allah manjadi elok baliak; caronyo iyolah: manusia dilapehkan dari kabek doso dek Isa Almasih. 25Allah mangarobankan Isa Almasih, supayo jo kamatian Baliau tu, manusia dinyatokan lapeh dari doso, jikok manusia tu layi ba-iman kabake Baliau. Allah mampabuwek nan bakcando itu, untuak manyatokan ka-adielan-Nyo. Dek karano pado maso nan lampau, Allah lah basaba taradok doso-doso umaik manusia, sainggo Baliau indak ma-ukun inyo tu. 26Tapi, kiniko Baliau batindak taradok doso, untuak manyatokan ka-adielan Baliau. Jo caro nan baitu Baliau manyatokan, baraso Baliau bana; sarato satiyok urang nan layi ba-iman kabake Isa Almasih, ka dinyatokan dek Allah, sabagai urang nan lah ba-elok baliak jo Baliau. 27Dek karano itu, indak ado lai alasan dek kito untuak mamanggak-manggak. Baa dek baitu? Apokoh dek karano kito mangarajokan, apo nan tatulih dalam paratuaran ugamo Yahudi? Indak. Tapi, dek karano kito picayo. 28Dek karano, kasimpualannyo bakcando iko: Urang dinyatokan ba-elok baliak jo Allah, indak doh dek karano inyo mangarajokan, apo nan tatulih dalam paratuaran ugamo Yahudi, tapi, dek karano inyo ba-iman kabake Isa Almasih. 29Ataukoh Allah tu, Allah urang Yahudi sajo? Indakkoh Baliau, Allah pulo dek banso lain? Iyo, batua, Baliau adolah Allah pulo dek banso lain! 30Dek karano, Allah hanyo satu. Baliau-lah nan mamungkinkan urang-urang Yahudi ba-elok baliak jo Baliau, dek karano inyo tu layi ba-iman. Sarato Baliau pulolah nan mamungkinkan, urang-urang banso lain ba-elok baliak jo Baliau; itu juwo dek karano inyo tu layi ba-iman. 31Apokoh dek karano kito ba-iman kabake Isa Almasih, ba-arati kito mambuwang paratuaran ugamo Yahudi? Nan sabananyo indak! Malahan dek karano iman kito tu, kito ma-aragowi paratuaran ugamo Yahudi tu. ROMA

will be added

X\