ROMA 2

1Dek karano itu sudaro-sudaro, siya koh angkau, sainggo angkau niyo manyalahkan urang lain? Angkau indak mampunyoi sabuwah alah juwo untuak mambela diri! Dek karano, jikok angkau manyalahkan urang lain, padohal angkau sandiri mampabuwek pulo pabuatan, nan samo jo bakcando dipabuwek dek inyo tu, mako, angkau manjatuahkan pulo ukunan taradok diri angkau sandiri. 2Kito tawu, baraso, jikok Allah manjatuahkan ukunan, taradok urang-urang nan mampabuwek sagalo pabuatan nan bakcando itu, nan kaputusan Allah tu, iyo lah tapek. 3Tapi angkau, oih sudaro-sudaro, bi mampabuwek pulo sagalo parkaro nan angkau tuduahkan kabake urang lain! Apokoh angkau bi manyangko, dapek ta-inda dari ukunan Allah? 4Atau angkau indak bi ma-aragowi kasiah sayang Allah, sarato jo kalapangan ati Baliau, sarato jo kasabaran Baliau nan satenggi langik? Lah musti angkau bi tawu, baraso Allah manyatokan kabaiakkan ati Baliau, dek karano, Baliau niyo supayo angkau bi batobaik dari doso-doso angkau. 5Tapi, angkau kareh kapalo, sarato indak namuah barubah. Dek karano itu, angkau sandirilah nan mambuwek ukunan angkau manjadi batambah barek di Ari Kiyamaik, di kutiko Allah manyatokan bangih-Nyo, sarato manjatuahkan ukunan nan adie. 6Dek karano, Allah ka mambalehkan kabake satiyok urang, sabandiang jo apo nan inyo pabuwek. 7Allah ka mambarikan iduik sajati nan kaka, kabake urang-urang nan takun babuwek baiak, untuak mandapekkan nan mulie, nan ta-aromaik sarato nan kaka. 8Tapi, urang-urang nan mamantiangkan dirinyo sorang, sarato indak namuah patuah kabake Allah, malah inyo manuruikkan nan jahek, mako, Allah ka manimpokan ukunan nan sangaik barek kabake inyo. 9Satiyok urang nan suko babuwek jahek, ka bi kasuliktan, sarato jo sansaro; nan partamu-tamu urang Yahudi, baitu pulo banso-banso lain. 10Tapi, kasadonyo urang nan suko babuwek baiak, ka dibari dek Allah, kamuliyaan, sarato ka-aromaiktan, sarato jo tanang santoso; nan partamu-tamu kabake urang Yahudi, baitu pulo kabake urang-urang banso lain. 11Dek karano, Allah indak mampalain-lainkan urang. 12Urang-urang banso lain, bi badoso dek karano indak mangatawui paratuaran ugamo Yahudi. Mako, inyo tu di-ukun di luwa paratuaran tu. Tapi, urang-urang Yahudi, bi badoso sasudah mangatawui paratuaran tu; dek karano itu, inyo tu ka dituntuik pulo manuruik paratuaran tu. 13Dek karano, urang ba-elok baliak jo Allah, indak doh dek karano inyo tu, lah mangatawui paratuaran ugamo Yahudi, tapi, dek karano inyo mangarajokan, apo nan tatulih dalam paratuaran tu. 14Urang-urang banso lain, indak bi tawu doh paratuaran ugamo Yahudi. Tapi, jikok inyo tu, dek kahandak ati inyo sandiri, mangarajokan apo nan diparentahkan dek paratuaran tu, mako, ati inyo sandirilah nan manjadi paratuaran untuak inyo tu, biyapun inyo tu indak bi tawu jo paratuaran ugamo Yahudi. 15Jo caro iduik inyo tu, manyatokan, baraso apo nan diparentahkan dek paratuaran tu, tatulih di ati inyo tu. Ati ketek inyo tu pun mambuktikan ka-adaan tu, dek karano, inyo tu sandiri, adang-adang inyo disalahkan, nan adang-adang inyo dibatuakan dek pikieran inyo tu. 16Bakcando itulah nan ka tajadi isuak, di ari nan lah ditantukan tu. Di ari tu - manuruik Injil nan ambo baritokan - Allah malalui Isa Almasih, ka ma-adieli sagalo rasiyo ati, sarato jo sagalo rasiyo pikieran kasadonyo urang. 17Tapi, kiniko baa jo angkau sandiri? Angkau bi mangaku diri urang Yahudi. Angkau bagantuang kabake paratuaran ugamo Yahudi, nan angkau bi mamanggakkan tantang Allah. 18Angkau bi mandapek pitunjuak-pitunjuak dari paratuaran tu, sainggo angkau mangatawui kahandak Allah, sarato tawu manantukan nama nan elok. 19Angkau bi yakin, baraso angkau adolah pambimbiang urang buto, sarato ka manjadi tarang untuak urang-urang nan iduik di nan kalam. 20Angkau bi ma-aja urang-urang nan indak bataratik, sarato guru dek urang-urang nan pandie. Angkau bi yakin, baraso di dalam paratuaran ugamo Yahudi, angkau mampunyoi sagalo pangatawuan, sarato jo ajaran nan bana. 21Angkau bi ma-aja urang lain; tapi, baa mangko angkau indak ma-aja diri sandiri? Angkau managah urang, supayo jan mancilok, padohal angkau sandiri mancilok! 22Angkau managah urang, supayo jan bajina, padohal angkau sandiri bajina! Angkau bi jajok kabake patuang, padohal angkau sandiri ma-ambiak barang-barang dari rumah barhalo. 23Angkau bi mamanggak-manggakkan, baraso angkau mampunyoi paratuaran Musa, padohal angkau sandiri ma-ino Allah, dek angkau indak bi mamatuahi paratuaran Baliau. 24Di Alkitauk ado tatulih bakcando iko, ”Dek karano di kalian, oih urang-urang Yahudi, mako, namo Allah dikumuahi di antaro banso-banso lain.” 25Jikok angkau layi bi patuah kabake paratuaran ugamo Yahudi, mako, sunaik rasu angkau ado juwo gunonyo. Tapi, jikok angkau indak mamatuahi, sagalo apo nan diparentahkan dek paratuaran tu, mako, sunaik rasu angkau tu, indak ado doh tu aratinyo. 26Jikok ado urang nan indak urang Yahudi, nan indak basunaik, tapi, inyo layi mamatuahi paratuaran ugamo Yahudi, indakkoh Allah ka ma-anggauk inyo sabagai urang nan lah basunaik? 27Jikok baitu, urang-urang nan indak basunaik tu, ka mampasalahkan angkau urang Yahudi, dek karano, angkau mampunyoi paratuaran ugamo Yahudi, sarato layi basunaik, tapi, angkau bi malangga paratuaran tu. Urang-urang tu indak bi basunaik doh, tapi, malah inyo tu, nan layi mamatuahi paratuaran ugamo Yahudi. 28Dek karano, urang Yahudi nan sajati, indaklah urang nan hanyo namonyo sajo urang Yahudi; baitu pulo, urang nan sabana-bana basunaik, indaklah urang nan hanyo basunaik jo sacaro layie sajo. 29Tapi, sabaliaknyo, surang urang Yahudi nan sajati, adolah urang nan atinyo bajiwa Yahudi; sarato sunaik rasu nan sajati, adolah sunaik di ati, nan dikarajokan dek Roh Allah, indak doh nan dicataik dalam buku. Urang nan bakcando itu, manarimo pujian dari Allah, indak doh dari manusia. ROMA

will be added

X\