ROMA 16

1Ambo niyo nak mampitaruah-kan kabake angkau, Febe, sanak kito nan padusi tu. Inyo lah mambantu jamaat di Kengkrea. 2Tarimolah inyo sabagai salah surang dari umaik Tuhan. Dek karano, baitulah andaknyo urang-urang nan ba-iman kabake Allah, musti manarimo sudaronyo nan lain. Tolonglah inyo, jikok inyo mamaralukan bantuan dari angkau, dek karano inyo sandiri lah banyak mambantu urang - tamasuak ambo. 3Sampaikanlah salam ambo kabake kanti-kanti ambo, Priskila jo Akwila, nan lah samo-samo bakarajo jo ambo untuak Isa Almasih. 4Inyo tu ampia mati, dek karano nak manyalamaikkan ambo. Ambo sabana batarimo kasih kabake inyo tu - sarato indak doh ambo sajo, tapi, kasadonyo jamaat banso lain, nan indak urang Yahudi, bi batarimo kasih pulo kabake inyo tu. 5Sampaikan pulolah salam ambo, kabake jamaat nan bakumpua di rumah inyo tu. Salam kabake Epenetus nan ambo kasiahi. Inyolah urang di daerah Asia, nan partamu-tamu ba-iman kabake Isa Almasih. 6Salam pulo kabake Maryam. Inyo lah bakarajo kareh untuak angkau. 7Sampaikan pulo salam ambo, kabake Andronikus, sarato jo Yunias. Inyo tu sasuku banso jo ambo, sarato panah masuak pinjaro samo-samo jo ambo. Sabalun ambo ba-iman kabake Isa Almasih, nan inyo tu lah labiah dulu ba-iman. Inyo tu bi tamusawua di antaro rasul-rasul. 8Salam kabake Ampliatus nan ambo kasiahi, dek karano inyo samo-samo jo ambo, lah basatu jo Tuhan. 9Sampaikan aromaik ambo kabake Urbanus, kanti kito nan lah samo-samo bakarajo jo kito untuak Isa Almasih. Sampaikan pulo aromaik ambo, kabake Stakhis nan ambo kasiahi. 10Salam kabake Apeles. Inyo nan lah tahan bantiang dalam Isa Almasih, lah tabukti. Salam pulo kabake kaluarga Aristobulus, 11sarato kabake Herodion. Inyo sasuku banso jo ambo. Salam pulo kabake sudaro-sudaro sa-iman dalam kaluarga Narkisus. 12Salam ambo kabake Trifena, sarato jo Trifosa, nan lah bakarajo kareh malayani Tuhan, sarato kabake Persis nan ambo kasiahi. Inyo lah bakarajo kareh pulo untuak Tuhan. 13Salam kabake Rufus, sarato jo mandehnyo, nan dek ambo, lah ambo anggauk mandeh ambo pulo. Rufus adolah urang piliahan Tuhan nan tapuji. 14Sampaikanlah salam ambo, kabake Asinkritus, ka Flegon, ka Hermes, ka Patrobas, ka Hermas, sarato kabake sadonyo sudaro sa-iman, nan samo-samo jo inyo tu. 15Salam kabake Filologus, sarato jo Yulia; kabake Nereus, sarato jo karek-annyo nan padusi; kabake Olimpas, sarato jo kasadonyo sudaro sa-iman nan samo-samo jo inyo tu. 16Basalam-salamanlah bakcando urang nan badunsanak di ugamo Kristen. Kasadonyo jamaat Isa Almasih, bi mangirinkan salamnyo untuak sudaro-sudaro. 17Sudaro-sudaro! Ambo sabana mamintak: Ingek-ingeklah taradok urang-urang nan manimbuakan papacahan, sarato nan mangacaukan iman urang kabake Tuhan. Parkaro itu batantangan jo apo nan lah di-ajakan kabake angkau. Jauahilah urang-urang nan bakcando itu. 18Dek karano, urang-urang nan mampabuwek bakcando itu, ba-arati inyo tu, indak doh bakarajo untuak Isa Almasih Tuhan kito, tapi, untuak kaparaluan inyo sandiri. Jo umbuak-umbainyo, sarato jo muluik manihnyo, inyo tu bi mangicuahi urang-urang nan tuluih ati. 19Kasadonyo urang lah bi tawu, baraso angkau indak bi barubah ati kabake pangajaran Injil nan dari Allah. Sanang bana ati ambo mandanga, dek angkau layi bakcando itu. Ambo niyo, supayo angkau bijaksano tantang sagalo parkaro nan elok, sarato biyalah pandie tantang sagalo parkaro nan jahek. 20Allah nan mambarikan tanang santoso kabake manusia, ka sacapeknyo manampaikkan Ubilih di bawah kakuwasoan angkau, sarato ka mambinasokannyo. Mudah-mudahan, angkau tatauk dibarakaik-i dek Isa Almasih Tuhan kito! 21Timotius kanti ambo, bakirin salam pulo untuak angkau. Baitu pulo Lukius, Yason sarato jo Sosipater, nan sasuku banso jo ambo. 22Nan mambuwek surek ko adolah ambo, Tertius. Ambo mangucaukkan salam badunsanak pulo kabake angkau. 23Gayus bakirin salam kabake angkau. Ambo manompang di rumah inyo, nan jamaat kami ba-ibadaik di sinan tu pulo. Erastus, kapalo ka-uwangan kota, inyo bakirin salam untuak angkau. Baitu pulo Kwartus sudaro kito. 24Mudah-mudahan, Tuhan kito Isa Almasih mambarakaik-i angkau kasadonyo. Amin! 25Tapujilah Allah! Baliau bakuwaso manguwaikkan iman angkau, sasuwai jo Injil nan dari Allah, nan ambo baritokan tantang Isa Almasih. Ambo mambaritokan Injil tu sasuwai jo apo nan dinyatokan dek Allah; iyolah tantang rancana Allah, nan lah ba-abaik-abaik lamonyo indak dikatawui dek urang. 26Tapi nan kiniko, dek karano parentah dari Allah nan kaka, mako, rancana tu lah dinyatokan, sarato lah dibaritawukan kabake sadonyo banso, malalui kitauk-kitauk nabi, supayo kasadonyo urang-urang tu bi picayo, sarato bi patuah kabake Allah. 27Hanyo Baliau sajolah nan Allah, Baliau sangaik bijaksano. Baliau dijunjuang tenggi salamo-lamonyo, malalui Isa Almasih! Amin! Salam aromaik dari kami, Paulus, pisuruah Isa Almasih

will be added

X\