ROMA 15

1Kito nan sabana-bana yakin, kabake apo nan kito imani, musti basaba taradok sagalo parasaan urang nan lamah kayakinannyo. Janlah kito hanyo niyo nak manyanangkan diri kito sajo. 2Tapi sabaliaknyo, satiyok-tiyok kito, musti manyanangkan ati sasamo sudaro kito, untuak kabaiakkan inyo, supayo kayakinan inyo batambah kuwaik. 3Dek karano, Isa Almasih sandiri, indak doh mamikiekan apo nan ka lamak dek Baliau sorang. Di Alkitauk tatulih bakcando iko, ”Sagalo cacek nan ditujukan kabake Angkau, lah jatuah manimpo ambo.” 4Kasadonyo nan tatulih di Alkitauk, adolah untuak ka pa-aja kito. Dek karano, palajaran nan kito tarimo dari Alkitauk, manjadikan kito tabah, sarato jo kuwaik, sainggo kito dapek ba-arok kabake Allah. 5Mudah-mudahan, Allah nan mambarikan katabahan, sarato jo pangiburan kabake manusia, ka manolong angkau untuak iduik jo sa-ati, manuruik taladan Isa Almasih. 6Sainggo jo sacaro sa-ati, angkau kasadonyo basamo-samo dapek mamuji Allah, Bapak Tuhan kito Isa Almasih. 7Dek karano itu, andaklah angkau dapek samo-samo manarimo jo sacaro sanang ati, samo jo bakcando Isa Almasih manarimo angkau pulo, untuak mamuliekan Allah. 8Dek karano itu, cubolah kana, baraso Isa Almasih lah malayani urang Yahudi, untuak manyatokan baraso Allah indak barubah ati, dalam manapek-i sagalo janji Baliau kabake niniak muyang kito. 9Isa Almasih, manjadikan pulo banso-banso lain bi mamuliekan Allah, dek karano kabaiakkan ati Baliau kabake inyo tu. Di Alkitauk tatulih bakcando iko, ”Dek karano itu, ambo ka mamuji Angkau di antaro sagalo banso, ambo ka mandendangkan pujian untuak namo Angkau.” 10Ado pulo tatulih, ”Oih sagalo banso! Basukocitolah, samo-samo jo umaik piliahan Allah.” 11Sarato ado pulo tatulih, ”Pujilah Allah, oih sagalo banso, andaklah kasadonyo urang bi mamuji Baliau!” 12Sarato iko pulo nan dikatokan dek Yesaya, ”Dari katurunan Isai, isuak ado salah surang, nan ka mamarentahi sagalo banso; kabake Baliau-lah sagalo banso ka bi ba-arok.” 13Allah adolah tampaik angkau bi ba-arok. Mudah-mudahan Baliau ma-isi ati angkau jo sagalo sukocito, sarato jo tanang santoso, dek karano angkau bi ba-iman kabake Baliau, supayo jo kuwaso Roh Allah, angkau samakin ba-arok kabake Allah. 14Oih sudaro-sudaro ambo! Ambo yakin, baraso banyak sangaik sagalo parkaro nan elok nan ado di angkau. Angkau pun bi mangatawui sagalo-galonyo, sarato dapek pulo samo-samo manasiyaik-i. 15Tapi, tantang sagalo parkaro tatantu, ambo mamparingekkan angkau jo sacaro taruih tarang malalui surek ko, dek karano, Allah nan lah mambarikan tugeh tu kabake ambo. 16Baliau lah manjadikan ambo palayan Isa Almasih, untuak di-utuih kabake banso-banso nan indak urang Yahudi. Nan ambo batindak sabagai imam, nan ka mambaritokan Injil nan dari Allah, supayo urang-urang nan indak urang Yahudi, manjadi suatu pasambahan kabake Allah, nan dapek ditarimo dek Baliau. Mudah-mudahan Roh Allah mambuwek inyo tu, manjadi suatu pasambahan nan disangajokan untuak Allah. 17Jadi, dek karano ambo lah basatu jo Isa Almasih, mako, ambo buliah saketek maraso bangga, taradok karajo ambo untuak Allah. 18Ambo barani mangecek baitu, hanyo tantang apo nan lah dipabuwek dek Isa Almasih malalui ambo, untuak manjadikan urang-urang nan indak urang Yahudi, bi patuah kabake Allah. Ambo mangarajokan itu jo kato-kato, atau pun jo pabuatan, 19nan disaratoi jo sagalo mukjizat, sarato jo sagalo parkaro nan luwa biaso; kasadonyo tu dek kuwaso Roh Allah. Injil tantang Isa Almasih, lah ambo baritokan sapanuahnyo kabake urang, muloi dari Yerusalem sampai ka Ilirikum. 20Cito-cito ambo iyolah, mambaritokan Injil nan dari Allah di tampaik-tampaik, nan urangnyo alun bi mandanga tantang Isa Almasih. Dek karano, ambo indak niyo doh mambangun di ateh sandi nan lah dilatakkan dek urang lain. 21Di Alkitauk ado tatulih, ”Urang-urang nan alun panah mandanga barito tantang Baliau, ka bi maliyek; baitu pulo, urang-urang nan alun panah mandanga, ka bi mangarati.” 22Itu sabauknyo lah acok bana ambo ta-alang, untuak mangunjuangi angkau. 23Tapi, nan kiniko karajo ambo di daerah-daerah tu, lah salasai. Lah batawun-tawun lamonyo, ambo niyo nak mangunjuangi angkau. 24Isuak, jikok ambo lalu di kota angkau, dalam pajalanan ambo ka Spanyol, ambo ma-arokkan dapek batamu jo angkau, sarato basukocito agak sabanta jo angkau. Sasudah tu, ambo ma-arokkan angkau dapek mambantu ambo, untuak pajalanan ambo ka Spanyol tu. 25Tapi, kiniko ambo nak ka payi ka Yerusalem, untuak ma-antakan bantuan untuak umaik Allah nan di sinan tu. 26Dek karano, jamaat-jamaat nan di Makedonia, sarato jo nan di Akhaya, lah bi manyatujui untuak mambarikan sumbangan, kabake sudaro-sudaro nan bansaik, di antaro umaik Allah nan di Yerusalem. 27Jo sacaro sanang ati, inyo tu mamutuihkan untuak mambantu. Iyo sabananyo, inyo tu patuik manolong sudaro-sudaro nan bansaik di Yerusalem; dek karano, dari urang-urang Yahudi-lah, urang-urang nan indak urang Yahudi tu, lah manarimo barakaik-barakaik rohani nan dari Allah. Jadi, urang-urang nan indak urang Yahudi tu, patuik pulo manolong urang-urang Yahudi, jo barakaik-barakaik nan barupo arato bando. 28Jikok ambo lah salasai mangarajokan tugeh ambo ko, sarato lah manyarahkan sumbangan nan dikumpuakan tu, kabake sudaro-sudaro nan di Yerusalem, mako, ambo ka barangkek ka nagari Spanyol, malalui kota angkau. 29Jikok ambo singgah ka tampaik angkau, lah musti ambo datang jo sagalo barakaik nan malimpah, dari Isa Almasih untuak angkau. 30Karano dek Tuhan kito Isa Almasih, sarato karano dek kasiah nan dibarikan dek Roh Allah, mako, ambo sabana mamintak kabake angkau, mudah-mudahan, angkau sato badowa kabake Allah untuak ambo, basungguah-sungguah samo-samo jo ambo. 31Badowalah, supayo Allah malapehkan ambo dari tangan urang-urang nan indak bi picayo di Yudea, sarato dowakan pulo, supayo tugeh ambo untuak ma-antakan sumbangan ka Yerusalem, ditarimo jo sacaro sanang ati dek umaik Allah nan di sinan tu. 32Jo caro nan baitu, jikok Allah ma-inginkan, ambo dapek datang ka tampaik angkau jo sukocito. Nan ambo ka maraso tahibur, jikok lah basuwo jo angkau. 33Mudah-mudahan, Allah nan mambarikan tanang santoso kabake manusia, ka tatauk manyaratoi angkau kasadonyo! Amin! ROMA

will be added

X\