ROMA 14

1Urang nan indak yakin kabake apo nan inyo picayo-i, musti ditarimo jo sacaro elok di antaro angkau. Jan batangka jo inyo, tantang parkaro apo pandapek inyo. 2Ado urang nan bapandapek, baraso inyo buliah mamakan apo sajo. Tapi, ado urang lain nan lamah kayakinannyo; inyo bapandapek, baraso inyo hanyo buliah mamakan sayua-sayua sajo. 3Urang nan mamakan apo sajo, janlah ma-anggauk randah urang nan hanyo mamakan, makanan nan bapiliah; baitu pulo, urang nan hanyo mamakan makanan nan bapiliah, jan pulolah manyalahkan urang nan mamakan apo sajo, dek karano, Allah lah manarimo inyo. 4Siyakoh angkau, sainggo angkau musti ma-adieli budak urang lain? Antah budak tu jatuah, atau tagak, itu adolah urusan induak samangnyo. Iyo, batua, budak tu ka tagak badiri, dek karano Tuhan bisa mambuwek inyo tagak badiri. 5Ado urang nan ma-anggauk, suatu ari tatantu, labiah pantiang daripado ari-ari nan lain, sadangkan ado pulo urang lain nan ma-anggauk, baraso kasadonyo ari tu samo sajo. Padiyakan sajolah tiyok-tiyok urang manantukan pandapek inyo sandiri. 6Urang nan mamantiangkan suatu ari nan tatantu, urang tu mampabuwek nan baitu, untuak mamuliekan Tuhan. Urang nan mamakan apo sajo, mampabuwek nan baitu, untuak mamuliekan Tuhan, dek karano, inyo basyukur kabake Allah dek mandapek makanan tu. Baitu pulo, jo urang nan mamakan hanyo makanan nan bapiliah; urang tu mamuliekan Tuhan pulo, sarato basyukur kabake Allah. 7lndak surang juwo doh kito ko, nan iduik untuak diri kito sandiri; sarato indak surang juwo doh kito ko, nan mati untuak dirinyo sandiri. 8Jikok kito iduik, kito iduik untuak Tuhan. Nan jikok kito mati, kito pun mati untuak Tuhan. Jadi, iduik atau mati, kito adolah miliak Tuhan. 9Isa Almasih lah mati, sarato lah iduik baliak. Supayo Baliau mamarentah, manjadi Tuhan taradok urang-urang nan iduik, sarato taradok urang-urang nan lah mati. 10Jadi sudaro-sudaro! Baa mangko angkau manyalahkan sudaro angkau nan sa-iman? Sarato baa mangko angkau ma-anggauk inyo randah? Kasadonyo kito ka mangadauk Allah untuak di-adieli. 11Di Alkitauk ado tatulih, Tuhan bakato, ”Nan sasungguahnyo, tiyok-tiyok urang ka bi manyambah sujuik di adok-an Den; sarato satiyok urang ka bi mangaku, baraso Aden-lah Allah.” 12Jadi, satiyok-tiyok kito musti mampatangguang jawaukkan sagalo pabuatan kito kabake Allah. 13Dek karano itu, janlah kito salah manyalahkan. Sabaliaknyo, ba-usawolah supayo angkau jan mampabuwek sasuatu, nan manyabaukkan sudaro sa-iman tadayo, sarato jo badoso. 14Dek karano ambo basatu jo Tuhan Isa Almasih, mako, ambo yakin sangaik, baraso nan sabananyo, indak ciyek juwo doh nan najih; tapi, ado sasuatu nan najih dek surang urang, jikok urang tu ma-anggauknyo najih. 15Tapi, jikok apo nan angkau makan, mambuwek surang sudaro sa-iman rusak atinyo, mako, angkau lah mampabuwek sasuatu nan indak manyatokan kasiah. Jikok Isa Almasih lah mati untuak surang urang, mako, janlah dipadiyakan urang tu dirusak dek apo nan angkau makan. 16Itulah sabauknyo, janlah ma-anggauk elok manuruik angkau sajo, tapi, buruak manuruik pandapek urang lain. 17Dek karano, jikok Allah mamarentahi iduik surang urang, mako, apo nan buliah inyo makan, atau nan buliah inyo minun, itu indak paralu lai. Nan pantiang iyolah, apokoh urang tu layi ma-ikuik-i kahandak Allah, sarato mangalami katanangan ati, sarato manarimo sukocito nan dibarikan dek Roh Allah? 18Urang nan malayani Isa Almasih jo caro nan baitu, mako, urang tu manyanangkan ati Allah, sarato di-aragowi dek urang lain. 19Dek karano itu, tujuan kito mustilah tatauk untuak sagalo parkaro nan mambuwek kito saiyo sakato, sarato samo-samo mambangun. 20Janlah dek karano parkaro makanan, angkau marusak apo nan lah dikarajokan dek Allah. Sagalo makanan buliah untuak dimakan; tapi, jikok apo nan angkau makan, manyabaukkan urang lain badoso, mako, angkau pun basalah. 21Labiah elok jan lai makan dagiang, atau minun anggur, atau mampabuwek apo sajo, jikok pabuatan angkau tu manyabaukkan surang sudaro sa-iman, manjadi badoso. 22Biyalah apo nan angkau yakini tu, angkau pabuwek di adok-an Allah sajo, untuak angkau sandiri. Basukocitolah urang nan indak ma-ukun dirinyo sandiri, dalam apo nan di-anggauknyo elok untuak dipabuwek. 23Tapi, urang nan ba-uweh-uweh ka mamakan sasuatu, tapi, kamudian dimakannyo juwo, mako, urang tu disalahkan dek Allah; dek karano urang tu batindak indak manuruik kayakinannyo, tantang apo nan bana, sarato nan salah. Apo sajo nan dipabuwek, jikok indak dek kayakinan, adolah doso. ROMA

will be added

X\