ROMA 13

1Satiyok urang mustilah patuah kabake pamarentah, dek karano, indak ado doh pamarentah nan indak mandapek kakuwasoannyo dari Allah. Pamarentah nan ado kiniko, manjalankan kakuwasoannyo dek parentah dari Allah. 2Itu sabauknyo urang nan manantang pamarentah, samo sajo jo manantang apo nan lah ditantukan dek Allah. Urang nan mampabuwek nan bakcando itu, ka manarimo ukunan. 3Dek karano, urang nan babuwek baiak, inyo indak paralu doh takuik kabake pamarentah. Hanyo urang nan mampabuwek nan jahek sajolah nan musti takuik. Jikok angkau niyo, supayo angkau indak maraso takuik taradok pamarentah, mako, angkau pabuwek sajolah nan elok, mako, angkau ka dipuji. 4Dek karano, pamarentah adolah pisuruah Allah, nan bakarajo untuak kabaiakkan angkau. Tapi, jikok angkau babuwek jahek, mako, angkau iyo musti takuik kabake pamarentah, dek karano, indak siyo-siyo sajo doh pamarentah, inyo bakuwaso untuak ma-ukun urang. Pamarentah adolah pisuruah Allah, nan ka manjatuahkan ukunan Allah kabake urang-urang nan babuwek jahek. 5Itulah sabauknyo angkau musti patuah kabake pamarentah-indak doh hanyo dek karano angkau takuik ka kanai ukun, tapi, dek karano ati ketek angkau tu bana, nan manyuruah patuah. 6Itu pulolah sabauknyo, mangko angkau mambayie pajak, dek karano, pamarentah adolah pagawai Allah, nan sangajo ditugehkan untuak itu. 7Jadi, bayielah kabake pamarentah, apo nan musti angkau bayie kabake inyo. Bayielah pajak, jikok angkau musti mambayie pajak; sarato bayielah cukai, jikok angkau musti mambayie cukai. Aragowilah urang-urang nan musti di-aragowi, sarato aromaik-ilah urang-urang nan musti di-aromaik-i. 8Janlah angkau ba-utang apo pun juwo, kabake siapo pun juwo, salain daripado ba-utang kasiah, nan surang taradok nan lain. Dek karano, urang nan layi mangasiahi sasamo manusia, ba-arati inyo lah manjalankan kasadonyo paratuaran Musa. 9Dek karano, paratuaran ugamo Yahudi iyolah: Jan bajina, jan mambunuah, jan mancilok, janlah angkau cangok ka arato; kasadonyo tu, samo-samo jo sagalo paratuaran nan lain, lah dibulekkan manjadi ciyek paratuaran sajo, iyolah, ”Kasiah-ilah sasamo manusia, bakcando angkau mangasiahi diri angkau sandiri.” 10Urang nan layi mangasiahi urang lain, tantu indak ka babuwek jahek doh kabake urang tu. Jadi, urang nan layi mangasiahi sasamo manusia, adolah urang nan lah mangarajokan sapanuahnyo, kasadonyo saraik paratuaran ugamo. 11Salain dari kasadonyo tu, angkau lah bi tawu, baraso kiniko lah masonyo dek angkau, untuak jago dari lalok. Dek karano, wakatunyo untuak kito disalamaikkan, lah samakin dakek kiniko, daripado wakatu kito baru muloi ba-iman. 12Ari lah laruik tangah malam; nan sabanta lai ari lah siang. Jadi, eloklah kito baranti mangarajokan karajo-karajo nan buruak. Kito musti malangkok-i diri kito jo sinjato tarang. 13Kito musti mampabuwek sagalo parkaro nan ta-aromaik, bakcando nan biasonyo dipabuwek urang di siang ari; janlah alek baralek bagadang ati, nan malampaui bateh, atau mabuak-mabuak. Jan mampabuwek nan cabua, atau bakalakuan nan indak bataratik. Jan bi bacakak, atau pambingik. 14Biyalah Tuhan Isa Almasih nan manantukan, apo nan musti angkau pabuwek. Sarato janlah ma-ikuik-i tabiyaik manusia nan badoso, untuak pamuwehkan awa napasu. R OMA

will be added

X\