ROMA 12

1Oih sudaro-sudaro! Allah sangaik elok kabake kito. Itu sabauknyo ambo sabana mamintak, supayo angkau mampasambahkan diri angkau, sabagai suatu karoban nan iduik, nan disangajokan untuak Allah, sarato nan manyanangkan ati Baliau. Itu adolah ibadaik angkau nan sajati. 2Janlah dituruikkan caro-caro iduik urang dunia ko. Padiyakanlah Allah ma-ubah diri angkau manjadi baru, supayo angkau barubah. Jo caro nan baitu angkau dapek mangatawui kahandak Allah - iyolah apo nan baiak, sarato nan samparono, sarato apo nan manyanangkan ati Baliau. 3Allah lah mambarikan kamampuan kabake ambo. Itu sabauknyo ambo manasiyaik-i angkau kasadonyo: Janlah maraso diri labiah tenggi dari nan sabananyo. Andaklah angkau ma-ukua ka-adaan diri angkau, jo sacaro randah ati; satiyok-tiyok urang ma-ukua dirinyo, manuruik kamampuan nan dibarikan dek Allah kabake inyo, dek karano inyo ba-iman kabake Isa Almasih. 4Tubuah kito mampunyoi banyak angguato. Satiyok angguato ado tugehnyo surang-surang. 5Baitu pulo jo kito ko. Biyapun kito ko banyak, tapi kito ko marupokan ciyek tubuah, dek karano kito basatu jo Isa Almasih. Satiyok-tiyok kito ko ba-ubuangan nan ciyek jo nan lain, sabagai angguato-angguato dari tubuah nan ciyek. 6Satiyok-tiyok kito, mampunyoi kamampuan palayanan nan balain-lain. Sagalo kamampuan tu, dibarikan dek Allah kabake kito manuruik rahmaik-Nyo. Dek karano itu, kito musti mampagunokan sagalo kamampuan tu. Urang nan mampunyoi kamampuan untuak mangabakan barito nan dari Allah, mako, inyo musti mangabakan barito nan dari Allah tu, manuruik kamampuan nan ado dek inyo. 7Urang nan mampunyoi kamampuan untuak manolong urang lain, mako, inyo musti sabana-bana manolong urang lain. Urang nan mampunyoi kamampuan untuak ma-aja, mako, inyo musti sabana-bana ma-aja. 8Urang nan mampunyoi kamampuan untuak mambari sumangaik kabake urang lain, mako, inyo musti sabana-bana mambari sumangaik kabake urang lain. Urang nan mampunyoi kamampuan untuak mambari kabake urang lain, apo nan inyo miliak-i, mako, inyo musti mambari tu jo sacaro sanang ati, sarato jo patuik. Urang nan mampunyoi kamampuan untuak mamimpin, mako, inyo musti sabana-bana mamimpin. Urang nan mampunyoi kamampuan, untuak manyatokan raso ibo kabake urang lain, mako, inyo musti ma-ujuikkannyo jo sacaro sanang ati. 9Andaklah kasiah tu jan ba-icak-icak. Jauah-ilah nan jahek, sarato karajokanlah apo nan elok. 10Andaklah angkau samo-samo mangasiahi jo sacaro nan tuluih, antaro nan surang kabake nan lain, bakcando urang nan badunsanak dalam sabuwah kaluarga, nan andaknyo angkau basigadu labiah dulu mambari aromaik. 11Bakarajolah sungguah-sungguah. Jan pamaleh. Bakarajolah untuak Tuhan jo sumangaik nan dari Roh Allah. 12Andaklah angkau ba-arok kabake Tuhan, jo raso sukocito, saba-lah dalam kasusahan, sarato takunlah badowa. 13Tolonglah mancukuikkan kaparaluan urang-urang Kristen nan lain, sarato tarimolah sudaro-sudaro sa-iman, nan alun bakatawuan jo angkau, jo sacaro sanang ati di rumah angkau. 14Mintaklah kabake Allah, supayo Baliau mambarakaik-i urang-urang nan ma-aniayo angkau. Iyo, mintaklah Allah supayo mambarakaik-i inyo tu, jan mangutuak. 15Satolah basukocito, jo urang-urang nan basukocito, sarato manangihlah jo urang-urang nan manangih. 16Andaklah angkau saiyo sakato dalam iduik angkau basamo. Janlah uju, tapi sasuwaikanlah diri angkau jo urang badarai. Janlah ma-anggauk diri labiah pandai daripado nan sabananyo. 17Jikok urang babuwek jahek kabake angkau, janlah dibaleh pulo jo nan jahek. Pabuweklah apo nan di-anggauk elok dek kasadonyo urang. 18Dari piyak angkau, ba-usawolah sadapek mungkin untuak iduik damai jo kasadonyo urang. 19Oih sudaro-sudaro ambo! Janlah mambaleh dandam, biyalah Allah nan ka ma-ukun. Dek karano, di Alkitauk ado tatulih, ”Tuhan bakato, Aden-lah nan ka mambaleh. Aden-lah nan ka ma-ukun inyo.” 20Tapi, jikok urang-urang nan mamusuahi angkau baparuik litak, barilah inyo makan; nan jikok inyo auih, barilah inyo minun. Dek karano, jo caro nan baitu, angkau ka mambuwek inyo manjadi malu. 21Janlah dipadiyakan diri angkau dikalahkan dek nan jahek, tapi, andaklah angkau mangalahkan nan jahek jo nan elok. ROM A

will be added

X\