ROMA 11

1Ambo niyo batanyo: Apokoh Allah mambuwang umaik-Nyo sandiri? Tantu indak! Ambo sandiri adolah urang Israel, katurunan Ibrahim, dari suku Benyamin. 2Indak! Allah indak mambuwang doh, umaik Baliau nan lah Baliau piliah dari sajak samulo. Angkau kan lah bi tawu, apo nan tatulih di Alkitauk tantang Elia, kutiko inyo mangadukan umaik Israel kabake Allah. Elia bakato, 3”Tuhan, urang-urang Israel lah bi mambunuahi nabi-nabi Angkau, sarato lah mambinasokan tampaik-tampaik mampasambahkan karoban untuak Angkau. Tingga ambo surang sajonyo lai, nan inyo tu nak ka mambunuah ambo pulo.” 4Apokoh jawaukban Allah kabake Elia? Allah bakato, ”Aden lah manyisiahkan tujuah ribu urang, untuak diri-Den sandiri. Inyo tu alun panah lai manyambah dewa Baal.” 5Baitu pulo kiniko: Ado sakalompok ketek, urang-urang nan lah dipiliah dek Allah dek karano rahmaik Baliau. 6Baliau mamiliah inyo tu dek karano rahmaik Baliau, sarato indak doh dek karano pabuatan baiak inyo tu. Dek karano, jikok piliahan Allah tu badasarkan pabuatan baiak inyo tu, mako, rahmaik Allah tu, indak doh lai rahmaik nan sajati tu namonyo. 7Jadi, baa nan sabananyo? Umaik Israel indak mandapekkan apo nan inyo cari. Nan mandapek hanyolah sakalompok ketek, urang-urang nan lah dipiliah dek Allah. Nan lain kasadonyo bi kareh kapalo taradok panggielan Allah. 8Dek karano, di Alkitauk ado tatulih bakcando iko, ”Allah mambuwek ati sarato jo pikieran urang-urang tu, bi manjadi mada; nan sampai kiniko, mato inyo tu indak dapek maliyek, nan talingo inyo tu indak dapek mandanga.” 9Daud lah bakato pulo, ”Biyalah alek baralek inyo tu, manjadi parangkok untuak inyo sandiri, nan ka manjadi lubang, tampaik inyo tu bi jatuah, sarato jo binaso! 10Biyalah pancaliak-an inyo tu manjadi kalam, supayo inyo tu indak dapek maliyek; sarato biyalah inyo tu manjadi bungkuak salamo-lamonyo.” 11Ambo nak batanyo pulo: Kutiko urang Yahudi bi jatuah, apokoh itu tajadi supayo inyo tu binaso? Tantu indak baitu doh nan sabananyo! Tapi, dek karano inyo tu bi badoso, mako, banso lain malah disalamaikkan, sainggo manyabaukkan urang Yahudi bingik taradok banso lain tu. 12Dek karano banso Yahudi bi badoso, sarato indak namuah mamatuahi kahandak Allah, mako, banso-banso lain dibarakaik-i dek Allah. Apo lai, jikok ubuangan banso Yahudi jo Allah lah elok baliak; tantu labiah gadang lai barakaik, nan ka dibarikan dek Allah! 13Tapi kiniko, eloklah ambo mangecek kabake sudaro-sudaro, nan indak urang Yahudi! Salamo ko, sabagai rasul untuak banso-banso nan indak urang Yahudi, ambo ma-aragowi sangaik tugeh ambo tu. 14Ambo ma-arokkan, kok dapek ambo bisa manimbuakan bingik, di ati banso ambo tu sandiri, supayo jo caro nan bakcando itu, ambo dapek manyalamaikkan sabagian dari inyo tu. 15Dek karano inyo tu indak ditarimo dek Allah, mako, ubuangan sa-isi dunia, manjadi elok baliak jo Allah; apo lai jikok inyo tu ditarimo dek Allah! Tantu inyo tu samo jo bakcando urang mati, nan lah iduik baliak! 16Jikok sakarek roti nan partamu, lah dipasambahkan kabake Allah, mako, itu ba-arati kaciyek-annyo roti tu dipasambahkan pulo kabake Allah. Nan jikok urek batang kayu, adolah miliak Allah, mako, itu ba-arati sangkak-sangkaknyo adolah miliak Allah pulo. 17Sabagian dari sangkak-sangkak batang jaitun - iyolah urang-urang Yahudi - lah dikarek. Nan dibakeh pangarek-an tu, ditempekan sangkak batang jaitun rimbo, iyolah sudaro-sudaro nan indak urang Yahudi. Angkau ditempekan di sinan tu, supayo angkau dapek marasokan nan lamak, dari sagalo nan elok, dari kahidupan rohani urang-urang Yahudi. 18Dek karano itu, janlah angkau ma-anggauk enteng inyo tu, nan lah dikarek nan bak ibaraik sangkak tu. Angkau musti tatauk mangana, baraso angkau hanyolah sangkak. Sarato indak doh sangkak nan ma-agiah makan untuak urek, tapi, ureklah nan ma-agiah makan untuak sangkak. 19Tapi, angkau ka bi bakato, ”Iyo, batua tu, tapi, sangkak-sangkak tu dikarek, supayo ambo ditempekan di batang tu!” 20Batua, iyo baitu. Tapi, inyo tu dibuwang, dek karano inyo tu indak bi picayo, sadangkan angkau ditarimo, dek karano angkau picayo. Jadi, janlah angkau bi tabik uju dek karano di itu; tapi, musti sabaliaknyo, angkau musti bi maraso takuik. 21Dek karano, jikok Allah indak maraso ibo untuak mambuwang urang Yahudi, nan inyo tu adolah ibaraik sangkak-sangkak dari jaitun nan usali, mako, angkau jan bi manyangko Allah ka maraso ibo untuak mambuwang angkau! 22Dek karano itu paratikanlah, baralah ka-eloknyo Allah, sarato bara pulolah ka karehnyo Baliau. Baliau batindak kareh taradok urang-urang nan badoso, tapi, Baliau elok ati taradok angkau - asakan angkau layi tatauk iduik manuruik kabaiakkan Baliau. Jikok indak, mako, angkau pun ka dibuwang pulo. 23Tapi, tantang parkaro urang-urang Yahudi tu, jikok inyo tu lah baranti mangarehkan kapalo, mako, inyo tu ka ditarimo baliak; dek karano, Allah bakuwaso untuak manarimo inyo tu baliak. 24Angkau nan indak doh barasa dari banso Yahudi, adolah ibaraik sangkak dari batang jaitun rimbo. Jikok angkau nan batantangan jo sipaik angkau, bisa ditempekan di batang jaitun nan usali, apo lai urang-urang Yahudi, nan di-ibaraikkan sangkak-sangkak batang jaitun nan usali. Tantu labiah mudah lai dek Allah, untuak manempekan inyo tu baliak, ka batang jaitun inyo tu sandiri. 25Oih sudaro-sudaro! Pintak ambo supayo angkau jan maraso lah bi tawu sagalo-galonyo. Dek karano, ado sasuatu parkaro nan dikahandaki dek Allah, tapi nan alun dikatawui urang. Nan ambo niyo angkau mangatawu-inyo; iyolah bakcando iko: Sabagian dari urang Yahudi basikareh kapalo, tapi, sikauk inyo nan baitu, hanyo sampai lah langkok bilangan urang-urang nan indak urang Yahudi, bi datang kabake Allah. 26Dek nan baitu, kasadonyo urang Yahudi ka bi salamaik. Dek karano, di Alkitauk tatulih bakcando iko, ”Rajo Panyalamaik ka datang dari Sion; Inyo ka mambuwang sagalo karajo nan jahek dari katurunan Yakub. 27Aden ka mambuwek pajanjian jo inyo tu, pado wakatu Waden ma-ampuni doso-doso inyo tu.” 28Dek karano urang Yahudi indak namuah manarimo Injil nan dari Allah, mako, inyo tu bi manjadi urang nan mandurako kabake Allah; sarato malah itu manjadi ka-untuangan, dek angkau nan indak urang Yahudi. Tapi, dek karano piliahan Allah, mako, urang-urang Yahudi tu tatauk dikasiahi dek Allah, karano dek niniak muyang inyo tu. 29Dek karano, jikok Allah mamiliah urang, sarato mambarakaik-i urang tu, mako, Allah indak panah doh ma-elo baliak, apo nan lah Baliau pabuwek. 30Dawulu angkau bi durako kabake Allah. Tapi, nan kiniko Allah lah manyatokan, baraso doso angkau lah di-ampuni, dek karano di urang-urang Yahudi nan bi mandurako. 31Baitu pulo jo urang-urang Yahudi tu. Kiniko inyo tu indak bi patuah kabake Allah, supayo angkau dinyatokan indak lai bi badoso. Tapi, isuak inyo tu ka dinyatokan pulo, baraso inyo tu indak lai bi badoso. 32Dek karano, Allah lah mampadiyakan kasadonyo umaik mukaluak dikuwasoi dek kadurakoan, supayo Baliau dapek manyatokan raso ibo Baliau, kabake umaik manusia kasadonyo. 33Sungguah dalam kakayoan Allah! Sabana luwa biaso, kabijaksanoan, sarato jo pangatawuan Baliau! Siyakoh nan ka bisa manyalidiak-i sagalo kaputusan Baliau? Siyakoh nan ka bisa mangarati, baa caro-caro Baliau bakarajo? 34Di Alkitauk tatulih bakcando iko, ”Siyakoh nan mangatawui pikieran Tuhan? Siyakoh nan ka bisa mambari nasiyaik kabake Baliau? 35Siyakoh nan panah mambari sasuatu kabake Tuhan, sainggo bisa manuntuik baleh dari Baliau?" 36Allah nan manjadikan sagalo sasuatu. Kasadonyo barasa dari Allah, sarato adolah untuak Allah. Tapujilah Allah untuak salamo-lamonyo! Amin. ROMA

will be added

X\