ROMA 10

1Oih sudaro-sudaro! Ambo niyo sangaik, supayo banso ambo disalamaikkan. Nan ambo sabana-bana badowa kabake Allah untuak inyo tu. 2Ambo barani mangatokan, baraso inyo tu sabana bi basumangaik untuak Allah. Tapi, sumangaik inyo tu, indak badasarkan pangatawuan nan dari Allah. 3Inyo tu indak bi mangatawui, baa caronyo Allah mambuwek ubuangan manusia jo Baliau, manjadi elok baliak. Dek karano, inyo tu niyo bi manuruikkan caro inyo tu sandiri, mako, inyo tu indak bi tunduak, kabake caro nan lah ditunjuakkan dek Allah. 4Sagalo paratuaran ugamo, lah langkok ganok dalam diri Isa Almasih. Jadi, satiyok urang nan layi ba-iman kabake Isa Almasih, mako, ubuangannyo jo Allah manjadi elok baliak. 5Musa lah manulihkan, baraso urang nan ba-elok jo Allah badasarkan paratuaran ugamo, mako, urang tu ka iduik, dek karano patuah kabake paratuaran ugamo tu. 6Tapi, tantang baa caro urang ba-elok baliak jo Allah, badasarkan iman kabake Allah, nan Alkitauk lah mangatokan bakcando iko, ”Indak usahlah angkau bakato di dalam ati angkau, ’Siyakoh nan ka nayiak ka sarugo?' (mukasuiknyo, untuak mambawok Isa Almasih turun), 7atau, ’Siyakoh nan ka turun ka dunia urang mati?' (mukasuiknyo, untuak ma-angkek Isa Almasih nayiak dari alam mauik).” 8Nan dimukasuikkan adolah bakcando iko, ”Kato-kato Allah tu dakek sangaik kabake angkau; iyolah di muluik angkau, sarato di dalam ati angkau.” Itulah kato-kato iman nan kami baritokan; iyolah barito, baraso urang musti bi ba-iman. 9Dek karano, jikok angkau mangaku jo muluik angkau, baraso, ”Isa Almasih tu, adolah Tuhan", sarato angkau picayo pulo di dalam ati angkau, baraso Allah lah ma-iduikkan Isa Almasih baliak, sasudah mati, mako, angkau ka salamaik masuak sarugo. 10Dek karano, urang ba-iman jo atinyo, sainggo Allah manarimo inyo, sabagai urang nan lah ba-elok baliak jo Allah. Sarato jo muluiknyo urang mangaku, sainggo inyo disalamaikkan masuak sarugo. 11Di Alkitauk ado tatulih, ”Urang nan ba-iman indak ka dikucawaikan.” 12Itu balaku taradok kasadonyo urang, dek karano, indak ado doh lainnyo, antaro urang Yahudi jo urang-urang banso lain. Allah nan satu tu, adolah Tuhan untuak kasadonyo urang. Baliau mambarikan barakaik nan balimpah-limpah, kabake sadonyo urang nan bi mamintak tolong kabake Baliau. 13Di Alkitauk ado tatulih, ”Kasadonyo urang nan ba-imbau mamintak tolong kabake Tuhan, ka salamaik masuak sarugo.” 14Tapi, baa pulo urang ka ba-imbau kabake Tuhan, jikok inyo tu alun bi picayo? Sarato baa pulo inyo tu bisa bi picayo kabake Tuhan, jikok inyo tu alun bi mandanga tantang Tuhan? Sarato baa pulo inyo tu ka bisa mandanga tantang Tuhan, jikok indak ado urang nan mambaritokan? 15Sarato baa pulo urang ka payi mambaritokan, jikok inyo tu indak di-utuih? Di Alkitauk ado tatulih nan bakcando iko, ”Baralah ka eloknyo, kadatangan urang-urang nan mambaritokan Injil nan dari Allah!” 16Tapi, indak kasadonyo urang doh, nan lai namuah manarimo Injil tu. Dek karano, Yesaya lah mangatokan, ”Tuhan, siyakoh nan lai ka namuah picayo, kabake barito nan kami baritokan?” 17Itu sabauknyo, mangkonyo urang-urang tu bi picayo, dek karano inyo tu lah bi mandanga barito, nan barito didanga, dek karano ado urang nan mambaritokan tantang Isa Almasih. 18Tapi, ambo nak batanyo: Apokoh iyo, urang-urang tu alun bi mandanga barito tu? Lah musti, inyo tu lah bi mandanga! Dek karano, di Alkitauk ado tatulih bakcando iko, ”Suwaro urang-urang tu, lah mansipongang di muko bumi, kato-kato inyo tu lah sampai ka ujuang dunia.” 19Ambo nak batanyo pulo: Apokoh iyo, umaik Israel alun bi tawu? Biyalah tanyo tu partamu-tamu dijawauk dek Musa. Musa bakato, ”Bakcando ikolah Allah bakato, Aden ka mambuwek angkau bingik, taradok suatu banso nan indak umaik, nan Aden ka mambuwek angkau bangih, taradok suatu banso nan pandie.’ ” 20Yesaya labiah barani pulo lai. Inyo bakato, ”Bakcando ikolah kato-kato Allah, ’Urang-urang nan indak mancari Den, lah bi manamukan Den; nan Aden mampaliyekkan diri-Den, kabake urang-urang nan indak bi mananyokan tantang Waden.’ ” 21Tapi, tantang umaik Israel, Yesaya bakato, ”Bakcando ikolah kato-kato Allah, ’Sapanjang ari, Waden ma-oncongkan tangan-Den, kabake suatu banso nan kareh kapalo, sarato nan indak patuah.’ ” ROMA

will be added

X\