ROMA 1

1Sudaro-sudaro kasadonyo nan di Roma, nan dikasiahi dek Allah, sarato nan lah dipanggie dek Allah untuak manjadi umaik-Nyo. Allah lah mamiliah, sarato lah ma-angkek ambo sangajo untuak mambaritokan Injil nan dari Allah. 2Injil tu lah dijanjikan dek Allah, sajak dari jaman sa-isuak malalui nabi-nabi-Nyo, sarato lah tatulih pulo di Alkitauk. 3Injil tu adolah barito tantang Anak Allah, Tuhan kito Isa Almasih. Nan sacaro manusia, Baliau adolah katurunan Daud, 4tapi, sacaro ilahi Baliau tanyato adolah Anak Allah. Itu lah tabukti jo kuwaso nan luwa biaso, Baliau bisa iduik baliak sasudah mati. 5Malalui Baliau pulolah, Allah mambarikan kabake ambo kamampuan untuak manjadi rasul, supayo ambo — untuak ma-aromaik-i Isa Almasih — mambimbiang urang-urang dari sagalo banso, supayo bi picayo sarato bi patuah. 6Nan dimukasuikkan jo sagalo banso, adolah tamasuak jo angkau nan di Roma; angkau pun lah dipanggie untuak manjadi umaik Isa Almasih. 7Itulah sabauknyo, mangko ambo mambuwek surek kabake angkau. Mudah-mudahan Allah Bapak kito, sarato jo Tuhan Isa Almasih mambarikan barakaik, sarato jo tanang santoso kabake angkau. 8Nan partamu-tamu, malalui Isa Almasih ambo batarimo kasih kabake Allah, dek karano di angkau kasadonyo; sabauk kaciyek-annyo dunia ko lah bi mandanga, baraso nan angkau picayo sangaik kabake Isa Almasih. 9Satiyok kali ambo badowa, nan angkau tatauk takana dek ambo. Allah sandirilah nan tawu, baraso apo nan ambo katokan tu, iyo baitulah nan sabananyo. Baliau-lah Allah nan ambo layani jo sapanuah ati, jo sacaro mambaritokan lnjil tantang Anak Baliau. 10Ambo sabana mamohon kabake Allah, mudah-mudahan Baliau ma-ijinkan ambo kiniko, untuak mangunjuangi angkau. 11Dek karano ambo taragak sangaik nak basuwo jo angkau, supayo ambo dapek mambagi jo angkau, kamampuan nan dari Roh Allah, untuak manguwaikkan iman angkau. 12Mukasuik ambo iyolah, dek karano kito lah samo-samo ba-iman kabake Isa Almasih, mako, kito dapek samo-samo manguwaikkan iman kito. 13Sudaro-sudaro! Ambo niyo supayo angkau bi tawu, baraso lah acok kali ambo bamukasuik nak ka mangunjuangi angkau, tapi, ado-ado sajo nan ma-ambek. Ambo niyo, supayo di tangah-tangah angkau pun karajo ambo ado asienyo, bakcando karajo ambo nan lah barasil di antaro urang-urang nan indak urang Yahudi, di tampaik-tampaik nan lain. 14Dek karano, ambo mampunyoi kawajiban taradok sagalo banso: biya nan lah bapangatawuan, atau pun nan alun bapangatawuan, biya nan layi basikola, atau pun nan indak basikola. 15Itulah sabauknyo, mangko ambo niyo sangaik nak mambaritokan pulo Injil tu, kabake angkau nan bi tingga di Roma. 16Ambo picayo sangaik kabake Injil tu, dek karano Injil tu adolah kakuatan Allah, untuak manyalamaikkan kasadonyo urang nan layi picayo; nan partamu-tamu urang Yahudi, sarato jo banso-banso lain iyo pulo. 17Dek karano, jo Injil tu lah, Allah manunjuakkan baa caronyo, mampaelok-i baliak ubuangan manusia jo Allah; caronyo iyolah, jo sacaro sabana-bana ba-iman kabake Allah, dari sajak samulo sampai ka akie. Bakcando nan tatulih di Alkitauk, ”Urang nan sabana-bana ba-iman kabake Allah, mako, ubuangannyo jo Allah manjadi elok baliak, nan urang tu ka iduik, nan sabana iduik!” 18Dari sarugo Allah manyatokan bangih-Nyo taradok sagalo doso, sarato jo karajo jahek umaik manusia, dek karano, karajo jahek tu lah nan ma-alangi manusia, untuak mangatawui ajaran nan batua tantang Allah. 19Apo nan dapek dikatawui dek manusia tantang Allah, lah jaleh ado di dalam ati ketek manusia tu sandiri, dek karano, Allah sandiri nan lah manyatokan itu kabake manusia. 20Sajak dari Allah manjadikan dunia, mako, sipaik-sipaik Allah nan indak kaliyatan tu, iyolah ka-adaan-Nyo nan sabagai Allah, sarato jo kuwaso-Nyo nan kaka, lah dapek dipahami dek manusia, malalui kasadonyo nan lah dijadikan dek Baliau. Jadi, manusia indak dapek doh mangatokan, baraso inyo lah bajalan di nan bana. 21Manusia tawu jo Allah, tapi, manusia indak ma-aromaik-i Baliau sabagai Allah, sarato indak pulo batarimo kasih kabake Baliau. Malah sabaliaknyo, manusia mamikiekan nan indak-indak; ati inyo tu lah bi tatutuik. 22Inyo tu bi maraso diri bijaksano, padohal inyo tu pandie. 23Indak doh Allah nan kaka nan disambah dek inyo tu, tapi, malah patuang-patuang, nan manyarupoi mukaluak nan bisa mati; iyolah manusia, buruang, binatang nan bakaki ampek, sarato jo binatang nan bi manjala. 24Dek karano itu, Allah mampadiyakan inyo tu dikuwasoi dek ka-inginan atinyo, untuak mampabuwek nan buruak, sainggo inyo tu bi mangarajokan karajo-karajo nan manjajokkan taradok sasamo inyo. 25Allah nan bana, inyo ganti jo sasuatu nan palasu. Indak Nan Manjadikan doh nan inyo sambah, malainkan nan dijadikan, itu malah nan disambah, sarato nan dilayani dek inyo tu. Padohal, Nan Manjadikan, itulah nan samustinyo dipuji untuak salamo-lamonyo! Amin! 26Dek karano manusia mampabuwek nan bakcando itu, mako, Allah mampadiyakan inyo tu mampaturuikkan napasu buruaknyo. Nan padusi indak lai manyalero kabake laki-laki, bakcando nan galiknyo di manusia, malah inyo tu manyalero kabake sasamo padusi. 27Nan laki-laki baitu pulo; inyo tu indak lai jo sacaro nan biaso, ma-adokan ubuangan jo padusi, malah inyo tu manyalero kabake sasamo laki-laki. Laki-laki mampabuwek karajo nan mambuwek mariangik, taradok sasamo laki-laki, sainggo inyo tu manarimo pambalasan, nan sabandiang jo karajonyo nan jahek tu. 28Dek karano manusia indak maraso paralu untuak tawu jo Allah, mako, Allah mampadiyakan pikieran inyo tu manjadi rusak, sainggo inyo tu bi mampabuwek sagalo parkaro, nan sapatuiknyo indak buliah doh inyo pabuwek. 29Pangana inyo tu lah panuah jo sagalo sasuatu nan jahek, sarato jo nan indak batua; cangok, busuak ati, sarato jo parasaan dangkih; panuah jo ka-inginan nak mambunuah, bacakak, mangicuah, sarato jo mandandam. Inyo tu suko mampakecekkan urang lain, 30suko mamburuak-buruakkan namo urang lain; inyo tu bi uju, sarato jo kurang aja, inyo banci kabake Allah, sarato suko maruwok. Inyo tu pandai mancari caro-caro nan baru, untuak mampabuwek karajo nan jahek. Inyo tu bi durako kabake urang gaek; 31inyo tu indak mau tawu jo urang lain; inyo tu indak tuluih, sarato indak punyo raso ibo. 32Inyo tu layi bi tawu, baraso manuruik paratuaran Allah, urang nan mampabuwek kasadonyo tu, patuik dimasuakkan ka narako. Tapi, biyapun baitu, inyo tu bi mampabuwek pulo sagalo parkaro nan bakcando itu; sarato malah inyo tu bi satuju pulo urang lain mampabuweknyo. ROMA

will be added

X\