RIWAYAIK RASUL-RASUL 9

1Samantaro itu, Saulus tatauk juwo mampatakuik-takuik-i, sarato nak mambunuah pangikuik-pangikuik Tuhan Isa Almasih. Inyo payi kabake imam basa, 2sarato mintak surek kuwaso, untuak payi kabake pamimpin-pamimpin rumah ibadaik urang Yahudi di Damsyik, supayo, jikok tibo di sinan tu inyo basuwo jo urang-urang nan ba-iman kabake Isa Almasih, mako, inyo dapek manangkok urang-urang tu, untuak ka dibawok ka Yerusalem. 3Samantaro inyo sadang manuju ka Damsyik, kutiko lah dakek jo kota tu, indak disangko-sangko ado cahayo dari langik nan mamanca di sakuliliang Saulus. 4Inyo jatuah ka tanah, sudah tu, mandanga suatu suwaro nan bakato kabake inyo, ”Oih Saulus, Saulus! Baa mangko angkau ma-aniayo Ambo?” 5Saulus batanyo, ”Siyakoh Angkau, Tuhan?” Suwaro tu manjawauk ’Ambo-lah Isa Almasih, nan angkau aniayo tu. 6Tapi, nan kiniko tagaklah, sarato masuaklah ka kota. Tibo di sinan tu, ka di-agiah tawu kabake angkau, apo nan musti angkau pabuwek.” 7Urang nan samo-samo jo Saulus tu bi takajuik, sainggo indak talok lai mangecek; dek karano, inyo tu layi bi mandanga pulo suwaro tu, tapi, inyo indak manampak doh urang nan punyo suwaro. 8Mako, Saulus tagak, inyo cubo manyalangkan matonyo, tapi matonyo indak dapek lai untuak maliyek. Mako, tapasolah urang nan samo-samo jo inyo mamacikkan tangan Saulus, sambia mambimbiang inyo masuak ka Damsyik. 9Salamo tigo ari, matonyo indak dapek maliyek, salamo itu pulo, inyo indak saketek juwo doh makan, atau pun minun. 10Di Damsyik, ado surang pangikuik Tuhan Isa Almasih, nan banamo Ananias. Dalam suatu pangliyatan, Tuhan mangecek kabake inyo. Tuhan bakato, ”Oih Ananias!” Ananias manjawauk, ”Iyo, ambo Tuhan.” 11Tuhan bakato, ”Capeklah ba-rangkek kiniko juwo. Payilah ka rumah Yudas di Jalan Luruih. Tibo di sinan, tanyokanlah urang nan banamo Saulus, nan barasa dari kota Tarsus. Urang tu sadang badowa, 12sarato dalam suatu pangliyatan, inyo manampak surang laki-laki, nan banamo Ananias, tibo kabake inyo sambia malatakkan tangan ka inyo, supayo matonyo dapek maliyek baliak.” 13Ananias manjawauk, ”Tuhan, lah banyak ambo mandanga kaba, nan mancuritokan tantang urang tu, nan tarutamu bana tantang karajonyo nan ma-aniayo, sarato jo ma-ajauk umaik Angkau di Yerusalem. 14Kiniko inyo lah tibo pulo di siko, inyo lah mandapek ijin dari imam-imam kapalo, untuak ka manangkok kasadonyo urang nan ba-iman kabake Angkau.” 15Tapi, Tuhan bakato kabake Ananias, ”Payi sajolah! Dek karano, Ambo lah mamiliah inyo, untuak ka malayani Ambo, supayo inyo mambaritokan tantang diri Ambo, kabake banso-banso lain nan indak ba-ugamo Yahudi, sarato kabake rajo-rajo, sarato kabake umaik Israel. 16Ambo sandiri ka ma-agiah tawu kabake inyo, tantang sagalo kasansaroan nan musti inyo tangguangkan, dek karano di Ambo.” 17Mako, Ananias payi ka rumah tu, sarato malatakkan tangannyo kabake Saulus. Ananias bakato, ”Oih Saulus sudaro ambo, Tuhan Isa Almasih nan angkau liyek di tangah jalan, kutiko angkau sadang manuju ka siko, Baliau-lah nan manyuruah ambo ka mari, supayo mato angkau bisa maliyek baliak, sarato dikuwasoi dek Roh Allah.” 18Sakutiko tu juwo, ado sasuatu nan bakcando sisiak ikan, nan jatuah dari mato Saulus, sudah tu, matonyo lah bisa maliyek baliak. Mako, inyo tagak, sudah tu inyo dipamandikan. 19Sasudah makan, mako, timbualah kudaraiknyo baliak. Saulus di Damsyik salamo babarapo ari, samo-samo jo pangikuik-pangikuik Isa Almasih. 20Inyo lansuang payi ka rumah-rumah ibadaik, sarato muloi mambaritokan, baraso Isa Almasih tu adolah Anak Allah. 21Kasadonyo urang bi tacangang mandanga tantang Saulus. Urang tu bi bakato, ”Indakkoh inyo nan lah bi mambunuahi kasadonyo urang nan picayo kabake Isa Almasih di Yerusalem? Mukasuik inyo datang ka siko, untuak ka manangkok, sarato ka mambawok pangikuik Isa Almasih kabake imam-imam kapalo!” 22Tapi, Saulus batambah kuwaik pangaruahnyo. Kasadonyo bukti nan inyo kamukokan tantang Isa Almasih, sabana mayakinkan, baraso Isa Almasih itulah Rajo Panyalamaik, sainggo urang-urang Yahudi nan di Damsyik tu, indak dapek lai mambantah. 23Babarapo ari kamudian, urang-urang Yahudi bi mambicarokan suatu rancana, untuak ka mambunuah Saulus. 24Tapi, rancana inyo tu katawuan dek Saulus. Siang malam inyo tu bi manantikan di pintu kaporo kota, untuak ka mambunuah Saulus. 25Tapi, pado suatu malam, pangikuik-pangikuik Saulus ma-imbau inyo, sudah tu, Saulus diturunkan jo sabuwah karanjang ka subaliak tembok dindiang kota. 26Saulus payi ka Yerusalem, tibo di sinan tu, inyo ba-usawo nak bagabuang jo pangikuik-pangikuik Isa Almasih nan lain. Tapi, urang-urang tu bi takuik kabake inyo, dek karano urang-urang tu indak picayo, baraso inyo lah sabana-bana manjadi pangikuik Isa Almasih. 27Kamudian, Barnabas datang kabake Saulus, sudah tu mambawoknyo kabake rasul-rasul. Barnabas mancuritokan kabake rasul-rasul tu, tantang baa caro Saulus manampak Tuhan di tangah jalan, sarato baa caro Tuhan mangecek kabake inyo. Barnabas mancuritokan pulo, tantang baa bana baraninyo Saulus ma-aja di Damsyik, jo namo Isa Almasih. 28Mako, Saulus tingga samo-samo jo rasul-rasul tu, sarato indak takuik-takuik bakatubah dalam namo Tuhan, di kaciyek-annyo kota Yerusalem. 29Inyo mangecek, sarato badebaik pulo jo urang-urang Yahudi nan babahaso Yunani, tapi, urang-urang tu ba-usawo nak ka mambunuah inyo. 30Kutiko urang-urang ba-iman nan lainnyo tawu, tantang kajadian tu, mako, inyo tu mambawok Saulus ka Kaisarea, kamudian, inyo suruah taruih ka Tarsus. 31Mako, kasadonyo jamaat di Yudea, di Galilea, sarato jo di Samaria, manjadi bi tanang santoso. Ditolong dek Roh Allah, disaratoi raso takuik kabake Tuhan, mako, jamaat-jamaat tu batambah kuwaik, sarato batambah banyak. 32Petrus payi kian kumari ma-ngunjuangi jamaat-jamaat. Pado suatu ari inyo mangunjuangi umaik Tuhan nan tingga di Lida. 33Tibo di sinan tu, inyo basuwo jo surang laki-laki, nan banamo Eneas, nan lah lumpuah, sarato indak jago-jago lai dari tampaik tiduanyo, lah salapan tawun lamonyo. 34Petrus bakato kabake Eneas, ”Oih Eneas, Isa Almasih mancegakkan angkau. Jagolah, kamehilah tampaik lalok angkau.” Sakutiko itu juwo, Eneas lansuang tagak. 35Kasadonyo panduduak di Lida, sarato jo di Saron, bi maliyek Eneas nan lah cegak, mako, inyo tu kasadonyo bi picayo kabake Tuhan 36Di Yope ado pulo surang padusi nan banamo Tabita. Inyo adolah surang urang nan picayo kabake Isa Almasih. (Namonyo dalam bahaso Yunani iyolah Dorkas, nan aratinyo adolah ruso.) Inyo taruih mampabuwek karajo-karajo nan baiak, sarato suko manolong urang-urang nan bansaik. 37Pado wakatu itu inyo sakik, sudah tu maningga. Sasudah mayiknyo dimandikan, mayiknyo tu dilatakkan di biliak nan di ateh. 38Nagari Yope tu indak bara jauah doh dari Lida. Jadi, di kutiko pangikuik-pangikuik Isa Almasih nan di Yope mandanga kaba, baraso Petrus ado di Lida, mako, inyo tu bi ma-utuih urang duwo urang, untuak payi kabake Petrus, jo pasan nan bakcando iko, ”Capek-capeklah datang kamari.” 39Petrus bagageh tagak, mako, inyo payi manuruikkan urang nan manjapuiknyo. Satibo inyo di Yope, inyo dibawok ka biliak nan di ateh. Kasadonyo urang-urang marando nan ado di sinan tu, bi ma-uruangi Petrus sambia manangih, sarato mampaliyekkan kabake inyo, baju-baju, sarato jo jubah-jubah nan dijayik dek Dorkas, untuak urang-urang tu samaso inyo iduik. 40Petrus manyuruah kasadonyo urang tu bi kaluwa, sudah tu, inyo basilutuik sarato jo badowa. Sasudah itu inyo ma-adok ka mayik tu, sarato jo bakato, ”Oih Tabita, jagolah!” Mako, Tabita manyalangkan matonyo, nan kutiko inyo manampak Petrus, inyo duduak. 41Sudah tu, Petrus mamacikkan tangan Tabita, sambia manolong inyo tagak. Kamudian, Petrus ma-imbaui urang-urang ba-iman nan ado di sinan tu, sarato jo urang-urang marando tu, sudah tu, manyarahkan Tabita nan lah iduik baliak tu, kabake urang-urang tu. 42Mako pacahlah kaba tantang kajadian tu di kaciyek-annyo nagari Yope, sainggo sambuah urang nan bi picayo kabake Isa Almasih, sabagai Rajo Panyalamaik inyo tu. 43Petrus, di sinan tu juwo lai babarapo ari lai, di rumah urang tukang panyamak kulik nan banamo Simon. RIWAYAIK RASUL-RASUL

will be added

X\