RIWAYAIK RASUL-RASUL 8

1Sanang ati Saulus, dek karano urang lah mambunuah Stefanus. Di ari tu juwo, mako, muloilah jamaat nan di Yerusalem di-aniayo, sainggo kasadonyo urang ba-iman, salain daripado rasul-rasul, lah bakecai-kecai kian kumari di kaciyek-annyo daerah di Yudea sarato jo di Samaria. 2Urang-urang nan takuik kabake Allah, bi payi mangubuakan Stefanus, sarato maratok-inyo jo ati nan sangaik ibo. 3Tapi, Saulus taruih juwo ba-usawo, nak ka mambinasokan jamaat. Inyo payi dari rumah ka rumah, untuak mancari urang-urang nan ba-iman, sudah tu, inyo masuakkan ka pinjaro. 4Urang-urang ba-iman nan lah bakecai-kecai tu, inyo tu bi payi kian kumari untuak mambaritokan Injil nan dari Allah tu. 5Filipus payi ka suatu kota di Samaria, untuak mangabakan kabake urang-urang nan di sinan tu, tantang Rajo Panyalamaik nan dijanjikan dek Allah. 6Kutiko urang-urang tu mandanga Filipus mangecek, nan inyo tu lah bi maliyek pulo mukjizat-mukjizat nan dipabuwek dek Filipus, mako, banyaklah dari inyo tu nan layi bi mamparatikan apo nan dikatokan dek Filipus. 7Dek karano, lah sambuah roh-roh jahek nan mamakiak-makiak, kaluwa dari urang-urang nan kamasuak-an setan. Banyak pulo urang-urang nan lumpuah, sarato jo urang-urang nan pincang nan dicegakkan. 8Mako, urang-urang di kota tu sangaik bi basukocito. 9Di kota tu ado surang laki-laki nan banamo Simon, nan lah babarapo wakatu lamonyo, mambuwek urang-urang Samaria bi tapukau jo ale-mu sihienyo. Inyo mangatokan ka-bake urang-urang tu, baraso inyo adolah urang nan santiang. 10Mako, kasadonyo urang di kota tu, dari nan gadang sampai ka nan ketek, bi manuruikkan inyo, sarato bi bakato, ”Urang ko adolah kakuatan Allah, nan tamusawua sabagai ’Kakuatan Nan Gadang.’ ” 11Lah sangaik lamonyo, inyo mamukau urang jo kakuatan sihienyo, sainggo urang-urang tu sangaik ma-aromaik-inyo. 12Tapi, Filipus tibo mambaritokan kabake urang-urang tu, tantang Injil Karajaan Allah, sarato tantang Isa Almasih, nan adolah Rajo Panyalamaik. Mako, urang-urang tu bi picayo kabake barito nan dibaritokan dek Filipus, sudah tu, inyo tu bi dipamandikan, biya laki-laki atau pun padusi. 13Nan Simon sandiri lah picayo pulo. Sasudah inyo dipamandikan, inyo taruih payi manuruikkan Filipus. Dek maliyek mukjizat-mukjizat nan tajadi, mambuwek Simon tacangang-cangang. 14Rasul-rasul nan di Yerusalem lah mandanga kaba, baraso urang-urang Samaria lah bi manarimo kato-kato Allah. Dek karano itu, inyo tu bi ma-utuih Petrus, sarato jo Yahya ka sinan tu. 15Kutiko Petrus jo Yahya tibo di sinan tu, inyo tu bi badowa untuak urang-urang Samaria tu, supayo urang-urang tu mandapek Roh Allah, 16dek karano, alun surang juwo lai inyo tu, nan lah dikuwasoi dek Roh Allah; sabauk inyo tu dipamandikan, baru ateh namo Tuhan Isa Almasih sajo. 17Sudah tu, Petrus jo Yahya, bi malatakkan tangannyo kabake urang-urang Samaria tu; mako, urang-urang Samaria tu bi manarimo Roh Allah. 18Kutiko Simon maliyek, baraso, dek karano tangan rasul-rasul dilatakkan kabake urang-urang tu, mako, Roh Allah dibarikan kabake urang tu. Mako, Simon mambawok pitih kabake Petrus jo Yahya, 19sudah tu, inyo bakato, ”Barikan pulolah kabake ambo kuwaso nan bakcando itu, supayo, jikok tangan ambo, ambo latakkan kabake siya-siyanyo, mako, urang tu ka manarimo Roh Allah pulo.” 20Tapi, Petrus manjawauk, ”Cilako-lah angkau jo pitih angkau tu! Angkau sangko pambarian Allah tu dapek dibali jo pitih? 21Angkau indak punyo hak untuak sato di satiyok karajo kami, dek karano, ati angkau indak batua taradok Allah. 22Dek karano itu, buwanglah mukasuik angkau nan jahek tu, sarato mintaklah kabake Tuhan, supayo Baliau ma-ampuni pikieran angkau nan jahek tu! 23Dek karano ambo tawu, baraso ati angkau panuah jo parasaan bingik, sarato dipabudak dek karajo nan jahek.” 24Sudah tu, Simon bakato kabake Petrus jo Yahya, ”Tolonglah mintak kabake Tuhan, supayo jan sampai tajadi andaknyo di diri ambo, apo nan angku-angku katokan tu.” 25Sasudah Petrus jo Yahya man-curitokan pangalamannyo, sarato mambaritokan kato-kato Tuhan, mako, inyo tu bi babaliak ka Yerusalem. Nan di pajalanan, inyo tu bi mambaritokan Injil, di banyak kampuang-kampuang di daerah Samaria. 26Kamudian, surang malekaik Tuhan bakato kabake Filipus, ”Tagaklah, sarato barangkeklah! Payilah ka arah nan ka Baruah, ka jalan nan maubuangkan Yerusalem jo Gaza.” Jalan tu, jalan nan langang. 27- 28Mako, Filipus barangkek. Pado wakatu itu ado surang pagawai istano Etiopia, nan sadang dalam pajalanan babaliak ka nagarinyo. Urang tu adolah surang pagawai tenggi, nan batangguang jawauk jo kasadonyo arato bando Kandake, ratu nagari Etiopia. Urang tu lah babaliak dari Yerusalem untuak ba-ibadaik kabake Allah, kiniko inyo sadang di ateh bendinyo dalam pajalanan. Samantaro inyo di ateh bendi, inyo mambaco Kitauk Nabi Yesaya. 29Roh Allah bakato kabake Filipus, ”Payilah mandakek ka bendi tu.” 30Mako, mandakeklah Filipus ka bendi tu, sarato tadangalah dek inyo urang tu sadang mambaco Kitauk Yesaya. Filipus batanyo kabake urang tu, ”Apokoh angku layi mangarati, tantang apo nan angku baco tu?” 31Urang tu manjawauk, ”Dima pulo ambo ka mangarati, jikok indak ado urang nan ka manarangkannyo kabake ambo?” Mako, inyo ma-ajak Filipus nayiak ka ateh bendinyo, sarato duduak samo-samo jo inyo. 32Ikolah ayaik-ayaik nan dibaconyo tu, ”Inyo ibaraik domba nan di-alau untuak ka didabiah, Inyo nan bak anak domba, nan indak mambebek, jikok bulunyo diguntiang, bakcando itulah, Inyo indak ka bakato agak sapatah. 33Inyo di-ino sarato dipabuwek jo sacaro indak adie. Nyawo-Nyo dicabuik dari muko bumi, sainggo indak surang juwo doh urang, nan dapek mancuritokan tantang asa-usua-Nyo.” 34Pagawai tenggi dari Etiopia tu bakato kabake Filipus, ”Cubolah agiah tawu kabake ambo, siya tu nan dimukasuikkan dek nabi nan manulihkan ayaik ko? Dirinyo sandiri atau urang lain?” 35Mako, Filipus muloi manarangkan; inyo mamakai ayaik-ayaik nan cako tu, untuak pamangka-i, mambaritokan Injil Isa Almasih kabake pagawai tenggi tu. 36Di tangah pajalanan, inyo tu sampai ka suatu tampaik nan ado ayie. Pagawai tu bakato, ”Liyeklah tu, kan ado tu ayie! Apo kurang juwo lai tu, untuak ka mampamandikan ambo?” 37Filipus bakato, ”Jikok angku layi picayo jo sapanuah ati, angku buliah dipamandikan.” Pagawai tenggi dari Etiopia tu, bakato, ”Ambo picayo, Isa Almasih adolah Anak Allah.” 38Mako, inyo manyuruah bendinyo tu baranti; kamudian, inyo tu baduwo, Filipus jo pagawai tu, bi turun masuak ayie, mako, Filipus mampamandikan pagawai tenggi tu. 39Kutiko inyo tu bi kaluwa dari ayie, mako, Roh Allah mambawok Filipus dari tampaik tu. Pagawai tenggi dari Etiopia tu, indak manampak Filipus lai. Jo ati nan basukocito, pagawai tenggi tu manaruihkan pajalanannyo. 40Indak disangko-sangko, Filipus lah sampai sajo di Asdod. Kutiko inyo manaruihkan pajalanannyo, inyo tatauk mambaritokan Injil tantang Isa Almasih, di kasadonyo kota sampai inyo tibo di Kaisarea. RIWAYAIK RASUL-RASUL

will be added

X\