RIWAYAIK RASUL-RASUL 7

1Imam basa batanyo kabake Stefanus, ”Batua koh kasadonyo nan dikatokan dek urang tu?” 2Stefanus manjawauk, ”Sudaro-sudaro, sarato jo angku-angku! Cubolah danga ambo mangecek! Sabalun niniak muyang kito Ibrahim pindah ka Haran, pado wakatu inyo sadang tingga di Mesopotamia juwo lai, mako, Allah nan mulie, tibo kabake inyo, 3sarato bakato, ’Tinggakanlah nagari angkau, sarato jo sanak sudaro angkau. Payilah ka nagari nan ka Den tunjuakkan kabake angkau.’ 4Mako, Ibrahim barangkek dari nagari Kasdim, pindah ka Haran. Sasudah urang gaek Ibrahim maningga, Allah manyuruah inyo pindah ka nagari ko, iyolah nagari nan kiniko, lah angku-angku diami. 5Pado wakatu itu, indak ado sabagian juwo doh dari nagari ko, nan dibarikan dek Allah kabake Ibrahim, untuak manjadi miliak inyo; agak sajangka tanah pun indak dibari. Tapi, Allah bajanji, baraso Baliau ka mambarikan kabake Ibrahim tanah ko, untuak ka manjadi miliak inyo, sarato jo katurunannyo. Kutiko itu Ibrahim indak mampunyoi anak. 6Tapi, ikolah nan dikatokan dek Allah kabake inyo, ’Katurunan angkau ka manatauk sabagai urang asiang, di nagari lain. Urang-urang nagari tu ka manjajah, sarato ka ma-ajauk inyo tu, salamo ampek ratuih tawun. 7Tapi, Aden ka ma-ukun banso nan mampabudak inyo tu, nan inyo tu ka bi ka luwa dari nagari tu, sarato ka bi manyambah Waden di tampaik ko.’ 8Sasudah bakato bakcando itu, janji nan di-ikek tu, disahkan dek Allah, jo upacara basunaik. Mako, sasudah Ishak, anak Ibrahim layie, nan Ibrahim manyunaikkan inyo pado wakatu inyo ba-umua salapan ari. Kamudian, Ishak manyunaikkan pulo anaknyo, iyolah Yakub. Nan Yakub pun manyunaikkan pulo kaduwo baleh urang anaknyo, iyolah, bapak-bapak niniak muyang urang Yahudi. 9Bapak-bapak niniak muyang kito tu, bingik kabake Yusuf, sainggo inyo tu manjuwa Yusuf manjadi budak di Mesir. Tapi, Allah manyaratoi iduik Yusuf, 10sarato malapehkan inyo dari sagalo kasusahannyo. Allah mambarikan kabake inyo aka budi, sarato jo kabijaksanoan, pado wakatu inyo mangadauk rajo Mesir, sainggo rajo Mesir manjadikan inyo gubenur di nagari Mesir, sarato jadi panguwaso di istano rajo. 11Kamudian, tajadilah musin lapa nan sangaik padiah, di kaciyek-annyo nagari Mesir, sarato di nagari Kanaan, sainggo urang bi sansaro sangaik dibuweknyo. Niniak muyang kito indak bisa doh mandapek nan ka dimakan. 12Kutiko Yakub mandanga kaba, baraso ado gandun di Mesir, mako, inyo manyuruah anak-anaknyo, iyolah, niniak muyang kito, untuak bi payi ka sinan tu, untuak nan partamu kalinyo. 13Kutiko inyo tu payi nan kaduwo, Yusuf ma-agiah tawu kabake dunsanak-dunsanaknyo tu, baraso inyo adolah Yusuf. Baru di kutiko itulah rajo Mesir tawu, tantang asa-usua Yusuf. 14Kamudian, Yusuf mangirin kaba kabake apaknyo, Yakub, untuak manyuruah Yakub sarato jo kasadonyo kaluarganyo, bi pindah ka Mesir — kasadonyo ado tujuah puluah limo urang banyaknyo. 15Mako, Yakub pindah ka Mesir, sarato di sinan tu lah inyo sarato jo niniak muyang kito, bi maningga. 16Kamudian, mayik-mayik inyo tu dibawok babaliak ka Sikhem, sarato dikubuakan di tanah pakubuaran, nan lah dibali dek Ibrahim jo pitih perak dari urang Hemor di Sikhem. 17Kutiko lah ampia ka tibo masonyo, Allah ka mamanuahi janji-Nyo kabake Ibrahim, nan banso kito di Mesir lah batambah banyak. 18Akienyo, ado surang rajo nan lain, nan indak bakatawuan jo Yusuf, mamarentah di Mesir. 19Rajo tu mampamainkan banso kito, sarato ma-aniayo niniak muyang kito. Rajo tu mamaso inyo tu untuak mambuwang anak-anaknyo nan baru layie, supayo banso kito jan batambah banyak. 20Pado maso itulah Musa layie; inyo adolah anak nan rancak sangaik. Salamo tigo bulan, inyo dipaliaro di rumah apaknyo, 21sasudah inyo dibuwang, mako, puti rajo Mesir ma-ambiak inyo, sarato mamaliaro inyo bakcando anaknyo sandiri. 22Sagalo alemu banso Mesir di-ajakan kabake Musa, nan inyo manjadi urang nan sangaik bakuwaso dalam kato-kato, sarato jo pabuatannyo. 23Kutiko Musa lah ba-umua ampek puluah tawun, mako, timbualah pangana di atinyo, untuak payi maliyek ka-adaan bansonyo urang Israel. 24Kutiko itu, inyo manampak surang urang Israel, di-aniayo dek surang urang Mesir; mako, inyo mambela urang nan di-aniayo tu, jo sacaro mambunuah urang Mesir tu. 25Musa manyangko, kok layi ka bi mangarati bansonyo tu, baraso Allah sadang mamakai inyo, untuak ka malapehkan bansonyo tu. Tapi, tanyato urang Israel tu indak bi mangarati. 26Bisuaknyo, inyo manampak pulo duwo urang Israel nan sadang bacakak, sudah tu, inyo ba-usawo untuak mangkatangahi nan bacakak tu. Musa bakato, ’Angkau ko kan basudaro. Baa mangko angkau bi bacakak?' 27Tapi, urang nan manenju kantinyo tu manungokkan Musa ka tapi, sambia bakato, ’Siya urang nan ma-angkek angkau jadi pamimpin kami, sarato manjadi hakim kami? 28Apokoh angkau nak ka mambunuah ambo pulo, bakcando angkau mambunuah urang Mesir nan kapatang?' 29Kutiko Musa mandanga apo nan dikatokan dek urang tu, mako, inyo bantai lari dari Mesir, payilah inyo ka nagari Midian, manatauk di sinan tu. Di sinan tu, inyo mandapek anak duwo urang. 30Ampek puluah tawun kamudian, surang malekaik tibo kabake Musa di padang gurun, dakek Bukik Tursina. Malekaik tu datang di dalam api, di samak baluka nan sadang manyalo. 31Musa tacangang maliyek pangliyatan tu, sainggo inyo payi mandakek, untuak mangatawui apo nan sabananyo. Mako, tadangalah dek inyo suwaro Tuhan nan mangatokan, 32’Aden-lah Allah niniak muyang angkau; Aden adolah Allah Ibrahim, Allah Ishak, Allah Yakub.’ Musa lah manggaretek dek katakuik-an, sainggo indak talok lai dek inyo, mancaliak ka samak baluka tu. 33Kamudian Tuhan bakato pulo, ’Bukaklah tarompa nan angkau kanakkan tu, dek karano, tanah tampaik tagak angkau ko, adolah tanah nan suci. 34Aden lah maliyek, sarato lah mamparatikan payik padiahnyo sansaro umaik-Den di Mesir. Aden lah mandanga kaluah kasah inyo tu, nan Aden turun untuak ka malapehkan inyo tu. Nan kiniko, kamarilah! Aden ka ma-utuih angkau babaliak ka Mesir.’ 35Musa ikolah, Musa nan indak di-akui dek banso Israel, sarato nan ditulak jo kato-kato nan bakcando iko, ’Siya urang nan lah ma-angkek angkau manjadi pamimpin, sarato manjadi hakim kami?' Tapi, kabatualan inyo banalah urang nan di-utuih dek Allah, untuak manjadi pamimpin, sarato jo panyalamaik, jo bantuan dari malekaik nan tibo kabake inyo, dalam samak baluka nan manyalo tu. 36Musa tu lah nan mamimpin banso Israel ka luwa dari Mesir, jo sacaro mampabuwek mukjizat-mukjizat, sarato jo sagalo parkaro nan luwa biaso di Mesir, di lauik Merah, sarato jo di padang gurun, salamo ampek puluah tawun. 37Inyo pulolah Musa, nan bakato kabake banso Israel ’Allah ka ma-utuih kabake angkau, surang nabi nan dipiliah dari antaro angkau sandiri, samo jo bakcando Baliau mamiliah ambo.’ 38Musa ko lah di sidang jamaah banso Israel di padang pasie, nan manjadi parantaro, antaro malekaik nan mangecek kabake inyo di Bukik Tursina, jo niniak muyang kito. Inyo pulolah nan manarimo kato-kato Allah nan mambawok kabake iduik, supayo disampaikan kabake kito. 39Biyapun baitu, niniak muyang kito indak namuah patuah kabake inyo. Niniak muyang kito tu indak niyo manarimo Musa, malah inyo tu nak bi babaliak ka Mesir. 40Inyo tu bi bakato kabake Harun, ’Buwekkanlah patuang dewa-dewa untuak kami, supayo dewa-dewa tu nan ka mamimpin kami. Dek karano kami indak tawu lai, apo nan lah tajadi jo si Musa, nan mambawok kami kaluwa dari Mesir!' 41Mako, pado wakatu itu, niniak muyang kito mambuwek sabuwah patuang anak bantiang, kamudian, inyo tu bi mampasambahkan karoban kabake patuang tu, sarato ma-adokan alek, untuak ma-aromaik-i barang buatan tangan inyo sandiri. 42Mako, Allah maninggakan inyo tu, sarato mampadiyakan inyo tu bi manyambah bintang-bintang nan di langik. Mako basuwoanlah apo nan lah tatulih di kitauk nabi-nabi. Nan bakcando iko, ’Oih urang-urang Israel! Indaknyo untuak Den doh, kalian mandabiah karoban, sarato mangarobankan taranak, salamo ampek puluah tawun kalian di padang gurun. 43Kemah patuang dewa Molokh-lah nan kalian angkuik-angkuik, samo-samo jo patuang Refan, si bintang dewa kalian; itulah patuang nan kalian buwek, nan ka untuak kalian sambah. Dek karano itu, Aden ka mambuwang kalian sajauah-jauahnyo, etan ka subarang nagari Babel.’ 44Kemah tampaik nan manandokan Allah datang kabake manusia, ado di tangan niniak muyang kito di padang gurun. Kemah tu dibuwek, dek karano parentah dari Allah kabake Musa, sasuwai manuruik conto nan dipaliyekkan dek Allah kabake inyo. 45Kamudian, kemah tu dibawok sataruihnyo dek niniak muyang kito, pado wakatu inyo tu jo Yosua payi marabuik nagari kito ko, dari ganggaman banso-banso nan di-usie dek Allah dari adok-an inyo tu. Kemah tu ado di siko sampai ka jaman Daud. 46Daud manyanangkan ati Allah, sarato mamintak kabake Baliau, supayo inyo di-ijinkan mambuwek sabuwah rumah, untuak Allah nan disambah dek Yakub. 47Tapi, Sulaiman-lah nan mambuwek sabuwah rumah untuak Allah tu. 48Biyapun baitu, Allah Nan Mahatenggi indak manatauk di rumah nan dibuwek dek manusia doh; dek karano di kitauk nabi ado tatulih nan bakcando iko, 49’Langik adolah kurisi karajaan-Den, nan bumi aleh kaki-Den. Rumah apokoh nan nak kalian buwek untuak Den? Apokoh tampaik, untuak Waden baranti? 50Indak koh Waden sandiri nan manjadikan sagalo sasuatu?' bakcando itulah Allah bakato. 51Angkau sabana-bana kareh kapalo, sabana sulik dek angkau untuak patuah kabake Allah! Talingo angkau lah bi tasumbek, untuak mandanga kato-kato Allah! Angkau samo jo niniak muyang angkau; tatauk durako kabake Roh Allah! 52Apokoh ado nabi nan indak di-aniayo dek niniak muyang angkau? Inyo tu bi mambunuahi utusan-utusan Allah, nan kutiko sa-isuak lah bi mambaritokan, baraso Pisuruah Allah nan bana tu, ka datang. Nan kiniko angkau lah mangkiyanaik-i, sarato lah mambunuah Pisuruah Allah tu. 53Malekaik-malekaik lah manyampaikan sagalo parentah Allah kabake angkau, tapi, angkau indak namuah doh mamatuahinyo!” 54Baitu anggota-anggota Mahkamah Ugamo tu mandanga, apo nan dikato-kan dek Stefanus, inyo tu bi sakik ati, sarato bangih sangaik kabake Stefanus. 55Tapi, Stefanus nan dikuwasoi dek Roh Allah, mancaliak ka langik. Inyo manampak kamuliyaan Allah, sarato manampak Isa Almasih tagak di tampaik nan bakuwaso, di subalah suwok Allah. 56Stefanus bakato, ”Liyeklah, ambo manampak sarugo tabukak, nan Anak Manusia tagak di subalah suwok Allah!” 57Anggota-anggota mahkamah tu mamakok talingonyo sambia ma-ariak-ariak, sudah tu, sarantak manyarang Stefanus. 58Inyo tu bi manjaranjangkan Stefanus ka luwa kota, kamudian, inyo pungkangi jo batu. Urang-urang nan mancaliak sandiri kajadian tu, bi mampitaruahkan pakaiannyo kabake surang anak mudo, nan banamo Saulus. 59Samantaro inyo tu bi mamungkangi Stefanus, nan Stefanus badowa kabake Tuhan, ”Oih Tuhan Isa Almasih, tarimolah roh ambo!” 60Sudah tu, inyo basilutuik, sarato mamakiak jo suwaro nan kuwaik, ”Oih Tuhan, janlah ditimpokan doso kabake urang-urang ko!” Sasudah bakato nan bakcando itu, inyo pun mati. RIWAYAIK RASUL-RASUL

will be added

X\