RIWAYAIK RASUL-RASUL 6

1Pangikuik-pangikuik Isa Almasih batambah lamo batambah banyak. Pado kutiko itu, urang-urang Yahudi nan babahaso Yunani, manjadi indak suko taradok urang-urang Yahudi nan usali. Nan babahaso Yunani tu bi mangatokan, ”Urang-urang padusi nan lah bi marando nan ado di tampaik kami, inyo tu indak bi mandapek doh bantuan balanjo sa-ari-ari, nan dibagi-bagikan kabake urang nan banyak.” 2Dek karano itu, kaduwo baleh urang rasul-rasul tu mangumpuakan kasadonyo pangikuik, sarato bakato kabake inyo tu, ”Indak elok doh jikok kami baranti mambaritokan kato-kato Allah, hanyo dek karano musti ma-uruih parkaro-parkaro nan ka dimakan. 3Dek karano itu, eloklah Sudaro-sudaro piliah agak tujuah urang di antaro angkau, nan layi punyo namo baiak, sarato nan dikuwasoi dek Roh Allah, sarato jo arih bijaksano, nan ka bisa kami tugehkan untuak ma-uruih sagalo karajo ko; 4dek karano, kami hanyo nak badowa, sarato jo mambaritokan kato-kato Allah sajo.” 5Kasadonyo urang tu layi bi satuju, jo apo nan di-usulkan dek rasul-rasul tu. Mako, inyo tu bi mamiliah Stefanus, nan adolah surang urang nan sangaik ba-iman kabake Isa Almasih, sarato dikuwasoi dek Roh Allah. Tapiliah pulo: Filipus, Prokhorus, Nikanor, Timon, Parmenas, sarato jo Nikolaus dari Antiokhia; inyo ko indak urang Yahudi doh, tapi, inyo lah masuak ugamo Yahudi. 6Katujuah urang tu di-usulkan kabake rasul-rasul, mako, rasul-rasul tu badowa, sarato mamintakkan barakaik kabake Tuhan untuak inyo tu. 7Jo caro nan baitulah kato-kato Allah batambah tasebar, nan pangikuik-pangikuik Isa Almasih di Yerusalem samakin batambah banyak. Sarato banyak pulo imam-imam nan bi picayo kabake Isa Almasih. 8Stefanus sabana dibarakaik-i dek Allah, sainggo inyo banyak mampabuwek mukjizat, sarato jo sagalo parkaro nan luwa biaso di tangah-tangah masarakaik. 9Tapi, ado urang-urang nan malawan inyo; urang-urang tu adolah jamaat rumah ibadaik, nan dinamokan Rumah ibadaik Urang-urang Maradeka. Jamaat rumah ibadaik tu, adolah urang-urang Yahudi dari Kirene, sarato dari Aleksandria. Inyo tu, sarato jo urang-urang Yahudi nan dari Kilikia, sarato jo Asia, bi badebaik jo Stefanus. 10Tapi, inyo tu indak bisa doh mambantah apo nan dikatokan dek Stefanus, dek karano Roh Allah mambari kabijaksanoan untuak mangecek kabake Stefanus. 11Dek karano itu, inyo tu bi ma-asuang babarapo urang nan lain, untuak mangatokan, ”Kami lah mandanga urang tu ma-ino Musa, sarato jo ma-ino Allah!” 12Bakcando itulah urang-urang tu ma-asuang urang-urang nan lain, sarato jo pamimpin-pamimpin Yahudi, sarato jo guru-guru ugamo. Mako, bi payilah inyo tu untuak ka manangkok Stefanus, kamudian, inyo bawok mangadauk ka Mahkamah Ugamo Yahudi. 13Inyo tu bi mambawok pulo, sasi-sasi nan mambari katarangan-katarangan nan indak batua, tantang diri Stefanus. Sasi-sasi tu bi bakato, ”Urang ko satiyok inyo mangecek, inyo ma-ino Baithulmukadis, sarato ma-ino sagalo parentah Allah nan lah disampaikan dek Musa. 14Kami lah mandanga pulo inyo mangatokan, baraso Isa Almasih dari Nazaret tu ka maruntuah-i Baithulmukadis ko, sudah tu, ka ma-ubah kasadonyo adaik istiadaik, nan lah diturunkan dek Musa kabake kito!” 15Kasadonyo urang nan ado di sidang Mahkamah Ugamo tu, bi mancaliak kabake Stefanus. Nan pado wakatu itu, rono muko Stefanus kaliyatan bakcando muko malekaik. RIWAYAIK RASUL-RASUL

will be added

X\