RIWAYAIK RASUL-RASUL 5

1Tapi, ado pulo surang laki-laki nan banamo Ananias. Inyo sarato jo bininyo nan banamo Safira, manjuwa pulo sabidang tanah miliak inyo. 2Sabagian dari pitih panjuwalan tu, inyo andokkan untuak inyo, nan salabiahnyo baru inyo sarahkan kabake rasul-rasul. Inyo mampabuwek nan bakcando itu, sapangatawuan bininyo. 3Mako, Petrus bakato kabake inyo, ”Ananias, baa mangko angkau padiyakan Ubilih manguwasoi ati angkau, sampai angkau baduto kabake Roh Allah, jo sacaro ba-anok-anok, angkau lah manyisiahkan sabagian dari pitih panjuwalan tanah tu, untuak diri angkau sandiri? 4Sabalun tanah tu angkau juwa, kan angkau nan punyo. Sasudah tanah tu dijuwa pun, pitihnyo kan angkau juwo nan punyo. Jadi, baa mangko ado mukasuik di ati angkau untuak mampabuwek nan bakcando itu? Indak manusia doh tu nan angkau kicuah, tapi Allah!” 5Baitu Ananias mandanga kecek Petrus tu, inyo tajarongkang, lansuang mati. Kasadonyo urang nan bi mandanga tantang kajadian tu, bi tabik takuik. 6Mako, tibolah urang-urang mudo nan ka mangapani mayik Ananias, sudah tu, inyo bawok kaluwa untuak ka dikubuakan. 7Kiro-kiro tigo jam kamudian, bini Ananias tibo. Inyo indak tawu doh, apo nan lah tajadi. 8Petrus bakato kabake inyo, ”Cubolah agiah tawu kabake ambo: Apokoh iyo sakiko aragonyo, tanah nan angkau juwa jo apak anak angkau tu?” Bini Ananias tu manjawauk, ”Iyo, iyo sakitulah aragonyo.” 9Mako, Petrus bakato kabake inyo, ”Baa mangko angkau supakaik jo apak anak angkau, untuak mancubo-i Roh Tuhan? Dangakanlah nak ambo katokan! Urang-urang nan payi mangubuakan apak anak angkau lah babaliak. Kiniko inyo tu ka mambawok angkau pulo kaluwa.” 10Sakutiko tu juwo bini Ananias tajarongkang pulo, inyo mati di adok-an Petrus. Di kutiko urang-urang mudo tu bi masuak, inyo tu bi manampak Safira lah mati. Mako, inyo tu mambawok mayik Safira tu ka luwa, untuak ka dikubuakan dakek pusaro lakinyo. 11Mako, bi tabik takuiklah kasadonyo urang-urang ba-iman tu, baitu pulo urang-urang nan lain bagai, nan bi mandanga tantang kajadian tu. 12Dek karano di palayanan rasul-rasul tu, mako, sambuahlah mukjizat sarato jo sagalo parkaro nan luwa biaso, nan tajadi di tangah-tangah masarakaik. Jo sa-ati kasadonyo urang ba-iman tu, bi bakumpua di Barando Sulaiman di Baithullah. 13Nan urang luwa, indak ado doh nan barani sato bakumpua jo urang-urang ba-iman tu. Tapi, urang-urang nan ba-iman tu, sangaik di-aromaik-i dek masarakaik. 14Batambah lamo, batambah sambuah urang-urang nan bi ba-iman kabake Tuhan — biya laki-laki atau pun padusi. 15Malah ka-adaannyo sampai bakcando iko; urang-urang nan sakik dilatakkan di ateh tampaik tidua, atau di ateh lapiak, sudah tu, dibawok ka tapi labuah, supayo urang-urang nan sakik tu, sapaliang-paliang tidak, dapek kanai bayang-bayang Petrus, jikok inyo lalu di sinan tu. 16Bi babondong-bondonglah urang nan bi tibo dari kota-kota nan di sakuliliang Yerusalem. Inyo tu bi mambawok-i urang-urang nan sakik, sarato jo urang-urang nan kamasuak-an roh jahek. Urang-urang tu dicegakkan kasadonyo. 17Akienyo imam basa, sarato jo kasadonyo pangikuik-pangikuiknyo, iyolah golongan urang-urang Saduki, muloi bi batindak, dek karano inyo tu bingik. 18Rasul-rasul tu ditangkok, sudah tu dimasuakkan ka dalam pinjaro kota. 19Tapi, malamnyo tibolah surang malekaik Tuhan mambukakkan pintu pinjaro tu, mako, inyo bawok rasul-rasul tu ka luwa. Malekaik tu bakato kabake rasul-rasul tu, 20”Payilah tagak ka Baithullah, tibo di sinan agiah tawulah kabake urang nan banyak, tantang parkaro iduik nan baru ko.” 21Mako, rasul-rasul tu pun mamatuahi parentah malekaik tu. Subuah-subuah buto, inyo tu lah bi payi ka Baithullah, untuak mambari pangajaran di sinan tu. Samantaro itu, imam basa sarato jo pangikuik-pangikuiknyo bi tibo, mako, inyo tu ma-adokan sidang mahkamah jo pamimpin-pamimpin urang Yahudi. Kamudian, inyo tu bi manyuruah urang, untuak manjapuik rasul-rasul tu ka pinjaro, untuak dibawok mangadauk kabake inyo tu. 22Tapi, kutiko urang-urang nan disuruah tu tibo di pinjaro, nan rasul-rasul tu indak ado lai di sinan tu. Dek karano itu inyo tu bi babaliak, sarato mancuritokan kajadian tu kabake mahkamah. 23Inyo tu bi bakato, ”Kutiko kami tibo di pinjaro, kami dapati pintu pinjaro tu takunci elok, panjago-panjago ado di tampaiknyo di muko pintu. Tapi, baru lah kami bukak pintu tu, ruponyo indak ba-urang lai di dalam.” 24Kutiko kumandan panjago Baithullah, sarato jo imam-imam kapalo bi mandanga curito tu, inyo tu bi tapana mamikiekan tantang rasul-rasul tu, sarato bi tabik takuik, apo nan ka tajadi sasudah ko. 25Kamudian, tibolah surang laki-laki nan mambawok kaba nan bakcando iko, ”Dangakanlah oih angku-angku! Urang-urang nan angku-angku tahan di pinjaro tu, kiniko inyo tu sadang ma-aja urang banyak di Baithullah!” 26Mako, kumandan panjago Baithullah tu, samo-samo jo anak buwahnyo bagai, bi payi untuak manjapuik rasul-rasul tu. Tapi, indak jo sacaro paso doh, dek karano, inyo tu bi takuik kabake urang nan banyak; jan sampai tajadi baiko, urang nan banyak tu nan ka mamungkangi inyo tu jo batu. 27Rasul-rasul tu dibawok masuak, untuak mangadauk ka mahkamah. Mako, mulo-ilah imam basa mamareso inyo tu. 28Imam basa bakato, ”Kami lah sabana sangaik managah, supayo kalian jan ma-ajakan juwo tantang Urang (Isa Almasih) tu. Tapi, kiniko cubolah caliak, apo ko nan kalian pabuwek! Kalian paleyak-leyakkan pangajaran kalian tu di kaciyek-annyo Yerusalem ko, kalian malah nak manuduah kami pulo, baraso dek karano di kamilah nan manyabaukkan Urang (Isa Almasih) tu mangko-Nyo mati.” 29Petrus sarato jo rasul-rasul nan lainnyo tu bi manjawauk, ”Kami musti patuah kabake Allah, sarato indak ka mampaturuikkan kandak manusia doh. 30Isa Almasih, nan lah angku-angku salibkan tu, Baliau lah di-iduikkan baliak dek Allah niniak muyang kito, sasudah Baliau mati. 31Allah lah mambarikan kabake Baliau kaduduakkan, sarato jo kuwaso nan sangaik tenggi sabagai Pamimpin, sarato jo Panyalamaik; supayo banso Israel dibari kasampatan, untuak batobaik dari doso-dosonyo, sarato bi mandapek ampun. 32Kami ko lah sasi-sasinyo tantang kasadonyo tu — kami sarato jo Roh Allah, iyolah Roh nan di barikan dek Allah, kabake satiyok urang nan layi bi manuruikkan parentah Baliau.” 33Kutiko anggota-anggota Mah-kamah Ugamo tu, bi mandanga nan bakcando itu, inyo tu bi bangih sangaik, nan inyo tu bi supakaik untuak ka mambunuah rasul-rasul tu. 34Tapi, di antaro anggota-anggota mahkamah tu, ado surang urang Farisi nan banamo Gamaliel. Inyo adolah guru ugamo nan sangaik di aromaik-i dek kasadonyo urang. Inyo bae tagak, sudah tu, inyo suruah urang mambawok rasul-rasul tu ka luwa agak sabanta. 35Kamudian, inyo bakato kabake sidang Mahkamah Ugamo tu, ”Sudaro-sudaro urang-urang Israel! Pikiekanlah elok-elok tantang apo nan ka Sudaro-sudaro pabuwek kabake urang-urang ko. 36Dek karano, dulu panah ado urang nan banamo si Teudas, nan ma-anggauk dirinyo urang gadang, sainggo ado kiro-kiro ampek ratuih urang, urang nan ma-ikuik inyo. Tapi, akienyo inyo dibunuah urang, kasadonyo pangikuiknyo bakecai-kecai, nan garakkannyo ilang lanyok. 37Sasudah itu, di kutiko urang ma-etong panduduak, ado pulo nan mancogok surang lai, nan banamo Yudas, urang dari Galilea. Dek karano dipangaruah-inyo, sambuah pulo urang nan manuruikkan inyo. Tapi, akienyo inyo dibunuah urang pulo, kasadonyo pangikuik-pangikuiknyo bi bakecai-kecai. 38Jadi kiniko, jo kajadian nan sarupo iko, nasiyaik ambo iyolah: janlah dipanga-pangakan urang-urang ko, padiyakan sajolah inyo tu. Dek karano, jikok ajaran sarato jo garakkan inyo ko, barasa dari manusia, mako, ajaran sarato jo garakkan tu, ka ilang lanyok. 39Tapi, jikok itu datang dari Allah, mako, Sudaro-sudaro indak ka dapek doh mangalahkan inyo tu. Malah mungkin sajo isuak, tanyato Sudaro-sudaro malawan Allah.” Nasiyaik Gamaliel tu ditarimo dek sidang mahkamah. 40Mako, rasul-rasul tu di-imbau, sudah tu dicambuik, kamudian, ditagah mambari ajaran tantang Isa Almasih. Sasudah tu, barulah inyo tu dilapehkan. 41Rasul-rasul tu, bi barangkek dari Mahkamah Ugamo tu jo sukocito, dek karano, Allah lah ma-anggauk inyo tu patuik untuak manarimo ino-an, dek karano di Isa Almasih. 42Satiyok ari di Baithullah, sarato jo di rumah-rumah urang, rasul-rasul tu tatauk mambari ajaran, sarato jo mambaritokan Injil tantang Isa Almasih, baraso Baliau-lah Rajo Panyalamaik nan dijanjikan dek Allah tu. RIWAYAIK RASUL-RASUL

will be added

X\