RIWAYAIK RASUL-RASUL 3

1Pado suatu ari, kiro-kiro pukua tigo sanjo, Petrus sarato jo Yahya bi payi ka Baithullah, iyolah, pado wakatu untuak badowa. 2Tibo di sinan, di pintu kaporo nan dinamokan ”Pintu Rancak, ” ado surang laki-laki nan lumpuah sajak dari layie. Satiyok ari inyo dibawok ka sinan tu, untuak mintak sidakah kabake urang-urang nan bi masuak ka Baithullah. 3Kutiko inyo manampak Petrus, sarato jo Yahya nan sadang bi masuak ka Baithullah, mako, inyo mamintak kabake kaduwo urang rasul tu, supayo inyo dibari sasuatu. 4Mako, Petrus jo Yahya mancaliak kabake urang tu, kamudian, Petrus bakato, ”Mancaliaklah ka kami!” 5Mako, urang tu mamparatikan inyo tu, jo caliak nan manganduang arok, saraso ka mandapek sasuatu dari inyo tu. 6Mako, Petrus bakato kabake urang tu, ”Ambo sadang sabana indak bapitih. Tapi, apo nan ado di ambo, itu nan ka ambo barikan kabake angkau: Jo kuwaso Isa Almasih urang Nazaret tu, bajalanlah!” 7Sudah tu, Petrus mamacikkan tangan suwok urang nan lumpuah tu, sambia manolong inyo untuak tagak. Sakutiko itu juwo kakinyo lansuang cegak, mato kakinyo manjadi kuwaik. 8Mako, inyo malompek tagak, inyo muloi bajalan kian kumari. Kamudian inyo masuak ka Baithullah, samo-samo jo Petrus sarato jo Yahya bagai, sambia bajalan jo malompek-lompek inyo mamuji Allah. 9Kasadonyo urang nan manampak inyo bajalan, bi sato pulo mamuji-muji Allah. 10Sudah tu, barulah urang-urang tu bi tawu, baraso inyolah urang nan mintak sidakah, nan biasonyo duduak di ”Pintu Rancak” di Baithullah. Urang-urang tu bi eran sangaik, sarato bi tacangang, dek maliyek apo nan lah tajadi taradok urang nan lumpuah tu. 11Urang lumpuah nan lah cegak tu, taruih juwo manuruikkan Petrus, sarato jo Yahya. Kutiko katigo urang tu sampai di barando nan dinamokan ”Barando Sulaiman”, kasadonyo urang bi tibo ba-uruang kabake inyo tu, dek karano, urang-urang tu bi tacangang sangaik. 12Kutiko Petrus manampak urang-urang nan ba-uruang tu, mako, inyo bakato kabake urang nan banyak tu, ”Oih urang-urang Israel, baa mangko angkau bi tacangang maliyek kajadian ko? Baa mangko angkau taruih juwo bi mancaliak kabake kami? Apokoh angkau bi manyangko, dek karano ado kuwaso di kami, atau dek karano kami patuah kabake Allah, mangkonyo urang ko dapek bajalan? 13Allah nan disambah dek Ibrahim, dek Ishak, dek Yakub, Allah niniak muyang kito, Allah itu pulolah, nan lah mamuliekan Pisuruah-Nyo, iyolah Isa Almasih. Isa Almasih itu pulolah nan angkau sarahkan kabake piyak panguwaso, sarato angkau lawan di adok-an Pilatus, di kutiko Pilatus baniyaik nak ka malapehkan Baliau. 14Baliau suci, sarato jo elok ati, tapi, angkau manantang Baliau, sarato mandasak Pilatus, supayo inyo namuah malapehkan surang pambunuah, untuak mampalakukan kandak angkau. 15Angku-angku bunuah Baliau, padohal nan sabananyo, Baliau-lah nan tampaik asa iduik kasadonyo urang. Allah lah ma-iduikkan Baliau baliak sasudah mati. Kami lah mancaliak sandiri kajadian tu. 16Angku-angku lah maliyek, sarato lah mancaliak sandiri, apo nan lah tajadi di urang lumpuah ko. Inyo lah manjadi kuwaik, lah siyaik baliak, dek karano inyo picayo kabake Isa Almasih sarato jo kuwaso Baliau. Dek karano picayo kabake Isa Almasih, mako urang ko lah siyaik baliak di adok-an angku-angku kasadonyo. 17Sudaro-sudaro! Kiniko ambo lah tawu, baraso, apo nan angkau pabuwek jo sagalo pamimpin angkau, taradok kabake Isa Almasih, adolah dek karano angkau indak bi mangarati, apo nan dipabuwek, itu mangkonyo angkau karajokan nan bakcando itu. 18Dek karano itu, mako basuwoanlah apo nan lah di-agiah tawu dek Allah sa-isuak, malalui kasadonyo nabi-nabi-Nyo, baraso Rajo Panyalamaik nan dijanjikan tu, musti manangguangkan sansaro. 19Dek karano itu sudaro-sudaro, batobaiklah dari doso-doso angkau, babaliaklah kabake Allah, supayo Baliau apuihkan sagalo doso angkau. 20Tuhan ka datang kabake angkau, sarato angkau ka marasokan rohani nan dipabarui. Tuhan ka manyuruah Isa Almasih datang kabake angkau, dek karano Baliau lah ditantukan dek Allah manjadi Rajo Panyalamaik untuak angkau. 21Baliau musti tingga di sarugo dulu, sampai Allah manjadikan sagalo sasuatu baru, samo jo bakcando nan lah dikatokan dek Allah malalui nabi-nabi-Nyo di jaman sa-isuak. 22Musa panah mangatokan, ’Allah, Tuhan angkau tu, Baliau ka ma-utuih kabake angkau, surang nabi dari banso angkau sandiri, samo jo bakcando Baliau ma-utuih ambo. Angkau musti bi ma-iyokan sagalo sasuatu nan dikatokan dek nabi tu. 23Urang nan indak mamparatikan apo nan dikatokan dek nabi tu, mako, urang tu ka disisiahkan dari umaik Allah, sarato ka dibinasokan.’ 24Nabi-nabi nan lah panah manyampaikan barito dari Allah, muloi dari Nabi Samuel, sarato jo nabi-nabi lainnyo nan tibo kamudian, kasadonyo tu mambaritokan tantang jaman nan kiniko. 25Sagalo janji Allah nan disampaikan dek nabi-nabi tu, adolah untuak angkau. Dalam pajanjian nan dipabuwek dek Allah jo niniak muyang angkau, Allah mangatokan kabake Ibrahim bakcando iko, ’Dari katurunan angkau, Aden ka mambarakaik-i sagalo banso di muko bumi.’ Pajanjian tu adolah untuak angkau juwo. 26Itulah sabauknyo Allah mamiliah Pisuruah-Nyo, sudah tu, manyuruah Pisuruah Baliau tu datang kabake angkau talabiah dulu, supayo Baliau mambarakaik-i angkau. Caro Baliau mambarakaik-i iyolah, jo sacaro mambuwek angkau bi batobaik dari caro iduik angkau nan jahek.” RIWAYAIK RASUL-RASUL

will be added

X\