RIWAYAIK RASUL-RASUL 28

1Sasudah lah bi salamaik kami mandarek, baru lah kami tawu, baraso pulau tu banamo Malta. 2Panduduak di pulau tu ramah sangaik kabake kami. Inyo tu bi manyambuik kami kasadonyo jo sacaro elok, sarato ma-iduikkan api untuak kami, dek karano udaro dingin, nan ujan pun lah muloi pulo turun. 3Paulus mangumpuakan kayu, sudah tu inyo latakkan di ateh api. Samantaro inyo manonggokkan kayu tu, mako, kaluwalah ula sikua dari onggok kayu tu, dek karano angeknyo api, ula tu malilik ka tangan Paulus. 4Kutiko panduduak pulau tu, bi manampak ula tu mambalik di tangan Paulus, mako, inyo tu bi mangecek sasamo inyo, ”Mungkin urang ko adolah urang pambunuah, biya pun inyo lah lapeh dari bahayo di lauik, tapi, Dewi Ka-adielan indak mampadiyakan inyo iduik.” 5Tapi, Paulus mangalatiakkan ula tu masuak api, nan inyo indak saketek juwo doh marasokan sakik. 6Urang-urang tu bi manyangko, tantu sabanta lai tangan Paulus ka sambok, atau jo sacaro nan indak disangko-sangko inyo ka tagolek, sudah tu mati. Tapi, sasudah mananti babarapo lamo, indak ado doh sasuatu nan luwa biaso nan tajadi di dirinyo, sudah tu, lain pulo lai pandapek urang-urang tu, inyo bi mangatokan baraso Paulus ko adolah dewa. 7Indak jauah dari tampaik tu, ado tanah miliak Publius, gubenur di pulau tu. Jo sacaro nan ramah, inyo manyambuik kami sabagai tamunyo salamo tigo ari. 8Di kutiko itu apaknyo sadang sakik, dapek damam sarato jo mancirikkan darah. Paulus payi maliyek urang gaek nan sakik tu, sarato jo badowa, sambia malatakkan tangannyo ka badan gaek tu, sainggo gaek tu cegak. 9Dek karano di kajadian tu, mako, kasadonyo urang nan sakik di pulau tu bi tibo kabake Paulus, sarato bi cegak panyakik inyo tu. 10Urang-urang tu banyak bi mambarikan adiyah untuak kami, kutiko kami nak ka balayie, inyo tu bi mambawok kasadonyo ka ateh kapa, apo nan kami paralukan salamo dipajalanan. 11Sasudah tigo bulan kami di sinan tu, kami barangkek dari pulau tu, nayiak sabuwah kapa nan dari Aleksandria, nan salamo musin dingin balabuah di pulau tu. Kapa tu mamakai lambang ”Dewa Kamba, Kastorjo Poluks”. 12Kami balabuah di kota Sirakusa, sarato baranti di sinan tu salamo tigo ari. 13Dari sinan tu, kami balayie baliak manyisi pantai, mako sampailah kami di kota Regium. Bisuak arinyo angin muloi barambuih dari arah nan di Baruah, sainggo dalam duwo ari, kami lah tibo di kota Putioli. 14Di sinan tu, kami basuwo jo babarapo urang, nan lah ba-iman kabake Isa Almasih, sarato dek undangan inyo tu, kami baranti di sinan tu salamo sapakan. Sudah tu, kami barangkek ka Roma. 15Sudaro-sudaro nan di Roma, nan lah ba-iman kabake Isa Almasih, mandanga kaba tantang parkaro kami, sainggo inyo tu bi datang ka Pasa Apius, sarato ka Pasanggrahan Tigo, untuak manyambuik kami. Kutiko Paulus lah basuwo jo urang-urang tu, inyo batarimo kasih kabake Allah, nan atinyo pun manjadi tabah. 16Kutiko lah tibo di Roma, Paulus di-ijinkan tingga surangnyo, tapi dijago dek surang saradadu. 17Sasudah tigo ari, Paulus ma-imbau tunganai-tunganai urang Yahudi nan ado di tampaik tu. Sasudah inyo tu lah bi bakumpua, mako, Paulus bakato kabake inyo tu, ”Oih angku-angku! Indak ado doh kasalahan ambo taradok banso kito, atau pun malangga adaik kabiasoan, nan lah kito tarimo dari niniak muyang kito. Tapi, biyapun baitu, nan ambo ditangkok juwo di Yerusalem, sudah tu disarahkan kabake urang-urang Roma. 18Sasudah parkaro ambo dipareso, nan inyo tu bamukasuik nak ka malapehkan ambo, dek karano, tanyato indak ciyekjuwo doh kasalahan ambo, nan mamungkinkan ambo di-ukun jo ukunan mati. 19Tapi, dek karano urang-urang Yahudi bi manantang, mako, ambo tapaso manuntuik, supayo parkaro ambo di-adieli dipangadielan Kaisar Roma. Ambo tuntuik nan bakcando itu, indak doh dek karano ado nan ka ambo kadukan, tantang banso ambo sandiri. 20Itulah sabauknyo, mangko ambo mintak nak basuwo jo angku-angku untuak ka mangecek-ngecek; sabauk ambo di pilanggu, dek karano Panyalamaik nan di arok-arokkan dek banso Israel.” 21Mako, inyo tu bi bakato kabake Paulus, ”Alun ciyek juwo lai kami manarimo surek tantang diri angkau, dari Yudea. Indak surang juwo doh sudaro nan dari sinan, nan mambawok kaba tantang diri angkau, atau mangatokan nan buruak tantang diri angkau. 22Tapi, kami niyo pulo nak bi mandangakan, tantang apo nan angkau yakini, dek karano kami kasadonyo lah bi mandanga, baraso urang bi mancacek-i ajaran nan angkau picayo-i tu.” 23Mako, Paulus sarato jo urang-urang tu, bi manantukan suatu ari untuak batamu baliak. Di ari tu banyak urang nan bi tibo ka tampaik tingga Paulus. Dari pagi sampai sanjo, Paulus manarangkan, sarato jo mambaritokan kabake urang-urang tu, barito tantang Karajaan Allah. Jo sacaro mamakai ayaik-ayaik dari Kitauk Musa, sarato jo dari Kitauk Nabi-nabi, Paulus ba-usawo supayo urang-urang tu bi picayo kabake Isa Almasih. 24Ado nan picayo kabake apo nan dikatokan dek Paulus, tapi, ado pulo nan indak. 25Sasudah Paulus mangatokan nubuwaik Nabi Yesaya kabake urang-urang tu, mako, jo pandapek nan balawan-lawanan, inyo tu bi barangkek dari tampaik tu, Paulus bakato, ”Iyo tapek bana, apo nan lah dikatokan dek Roh Allah, malalui Nabi Yesaya kabake niniak muyang angku-angku! 26Allah bakato, ’Payilah katokan kabake banso ko: Kalian layi taruih juwo ka bi mandanga, tapi, kalian indak ka bi mangarati; kalian layi taruih juwo ka bi mamparatikan, tapi, kalian indak bi tawu, apo nan tajadi. 27Dek karano pikieran banso ko lah mada, talingonyo lah pakak, matonyo lah piciang. Tajadi nan bakcando itu, supayo matonyo jan bi maliyek, talingonyo jan bi mandanga, pikierannyo jan bi mangarati, supayo inyo tu jan bi babaliak kabake-Den, sainggo inyo tu Den cegakkan.’ ” 28Akienyo Paulus bakato, ”Angku-angku musti tawu andaknyo, baraso kaba tantang kasalamaiktan nan dari Allah, kiniko lah dibaritokan kabake banso-banso lain, banso nan indak urang Yahudi. Inyo tu ka bi ma-ikuik-inyo!” 29Sasudah Paulus bakato bakcando itu, mako, urang-urang Yahudi tu bi barangkek dari tampaik tu, sambia bi batangka sasamo inyo. 30Duwo tawun lamonyo Paulus tingga di Roma, di rumah nan disewonyo sandiri. Inyo suko manarimo sadonyo urang, nan bi tibo manamu-inyo. 31Jo sacaro taruih tarang, inyo mambaritokan kabake urang-urang tu, tantang Karajaan Allah, sarato tantang Tuhan Isa Almasih. Paulus laluaso mampabuwek nan bakcando itu, sarato indak ado doh nan ma-ambek-ambek.

will be added

X\