RIWAYAIK RASUL-RASUL 27

1Sasudah diputuihkan, baraso kami musti balayie ka Italia, mako, Paulus sarato jo babarapo urang tahanan nan lain, disarahkan kabake Yulius, kumandan pasukan saradadu Roma, nan dinamokan ”Pasukan Kaisar”. 2Kami nayiak ka kapa nan datang dari Adramitium, mako, kami barangkek jo kapa tu, nan lah siyauk balayie ka palabuahan-palabuahan di propinsi Asia. Aristarkhus, urang Makedonia nan datang dari Tesalonika, balayie pulo samo-samo jo kami. 3Bisuak arinyo kami lah tibo di Sidon. Paulus dipabuwek jo sacaro nan elok sangaik dek Yulius. Inyo dipabuliahkan untuak manamui kanti-kantinyo, supayo kanti-kantinyo tu dapek mambarikan apo nan inyo paralukan. 4Dari sinan tu, kami manaruihkan palayieran. Dek karano angin balawanan jo arah kapa, mako, kami tapaso balayie manyisi pantai pulau Siprus, nan layi agak talinduang dari angin. 5Kamudian, kami balayie di lauik nan ba-adok-an jo nagari Kilikia, sarato jo nagari Pamfilia, sudah tu, kami sampai di Mira, di nagari Likia. 6Di sinan tu, kumandan saradadu tu basuwo jo sabuwah kapa nan dari Aleksandria, nan nak balayie ka Italia. Mako, inyo mamindahkan kami ka kapa tu. 7Babarapo ari lamonyo, kami balayie lambek sangaik, jo caro nan sangaik sulik, akienyo sampai juwolah kami dakek kota Knidus. Kamudian, dek karano angin nan alun elok untuak balayie, mako, kami indak dapek doh manaruihkan palayieran ka tujuan nan samulo. Mako, kami balayie arah nan ka Baruah pulau Kreta, malalui Tanjuang Salmone, supayo di sinan tu kami talinduang dari angin. 8Jo caro nan sangaik sulik, kapa kami balayie manyisi pantai pulau tu, sampai akienyo kami tibo di suatu tampaik nan banamo Palabuahan Rancak, indak bara jauah dari kota Lasea. 9Pado wakatu itu, Ari Rayo Pandamaian urang Yahudi, lah talampau. Lah banyak ari nan tabuwang dek kami, sainggo indak ado lai wakatu nan elok untuak balayie. Dek karano itu, Paulus mambari nasiyaik nan bakcando iko kabake urang-urang tu, 10”Oih sudaro-sudaro, manuruik pandapek ambo, sangaik babahayo rasonyo jikok kito taruihkan juwo balayie. Kito ka rugi gadang, kito indak hanyo ka rugi barang, atau ka rugi kapa kito ko sajo, tapi, angok kito pun bisa malayang.” 11Tapi, kumandan saradadu tu, labiah picayo kabake jurumudi, sarato jo nangkodo kapa, daripado kabake nasiyaik Paulus. 12Palabuahan nan di sinan tu, iyo indak elok doh untuak tampaik kapa-kapa balabuah di musin dingin. Dek karano itu, kabanyakkan anak kapa bi satuju untuak manaruihkan palayieran, barangkek dari palabuahan tu, dek karano inyo tu nak bi ma-usawokan supayo sampai di Feniks, sarato balabuah di sinan salamo musin dingin. Feniks adolah palabuahan di pulau Kreta, nan ma-adok ka Baraik Daya, sarato jo Baraik Lauik. 13Pado wakatu itu, angin nan dari Baruah barambuih lambek. Mako, anak kapa bi manyangko, inyo tu lah ka dapek balayie baliak. Dek karano itu, inyo tu bi mambongka sauah, sudah tu kapa balayie manyisi pantai pulau Kreta. 14Tapi, indak lamo kamudian, tibolah angin limbubu — iyolah angin nan dinamokan angin Ujuang Lauik — mambadai dari darek, 15sarato ma-ampeh ka kapa kami. Dek karano indak mungkin lai kapa taruih balayie malawan angin, mako, kami manyarah sajo, sarato mampadiyakan kapa anyuik dibawok angin. 16Kami agak talinduang saketek, di kutiko kami lalu di sabalah nan ka Baruah pulau Kauda nan ketek tu. Di sinan tu, jo bakarajo kareh kami barasil manguwasoi sikoci kapa kami. 17Sasudah sikoci tu dinayiakkan ka kapa, mako, kapa tu dikabek, dilingka sabalik jo tali untuak mampakuwaik. Dek karano takuik ka ta-ampeh ka kasiak Sirtis nan dangka, layie diturunkan, sudah tu kapa dipadiyakan manuruikkan angin. 18Angin taruih juwo manggilo, sainggo bisuak arinyo, tapasolah muatan kapa dibuwang masuak lauik. 19Bisuak ciyek lai, jo tangan inyo sandiri, anak-anak kapa tu bi mancampakkan pulo alaik-paragaik kapa masuak lauik. 20Antah bara ari lamonyo, kami indak manampak matoari, sarato jo bintang, nan angin pun taruih manaruih manggilo. Akienyo, indak ado lai arapan kami untuak ka salamaik. 21Ado babarapo wakatu lamonyo, urang-urang tu indak bi makan. Mako, Paulus payi tagak di adokan urang-urang tu sambia bakato, ”Oih sudaro-sudaro! Santano angku-angku layi ma-iyokan nasiyaik ambo, sarato indak balayie dari pulau Kreta, tantu kito indak ka mangalami doh karusakkan, sarato jo karugian nan bakcando kiniko. 22Tapi, nan kiniko ambo sabana mamintak, supayo angku-angku tatauk bi basukocito. Indak surang juwo doh dari angku-angku nan ka binaso; hanyo kapa ko sajonyo nan ka cayie. 23Dek karano tadi malam, malekaik nan dari Allah nan ambo sambah, iyolah Allah nan bakuwaso taradok diri ambo, datang kabake ambo. 24Malekaik tu bakato, ’Jan takuik Paulus! Angkau ka dapek juwonyo untuak mangadauk kabake Kaisar. Sarato dek kabaiakkan ati Allah kabake angkau, kasadonyo urang nan balayie samo-samo jo angkau, ka bi salamaik dek karano di angkau.’ 25Dek karano itu Sudaro-sudaro, andaklah Sudaro basukocito! Dek karano ambo sabana yakin kabake Allah, baraso kasadonyo nan lah Baliau katokan kabake ambo, iyo bakcando itulah nan ka tajadi. 26Tapi, sasudah ko kito ka tadampa di pantai suatu pulau.” 27Di malam nan ka ampek baleh, kami sadang ta-apuang-apuang di Lauik Adria. Di tangah malam, anak kapa bi marasokan, baraso kapa tu sadang mandakek-i darek. 28Mako, inyo tu ma-uluakan batu jo tali, untuak pa-ajuak dalamnyo lauik. Tanyato di tampaik tu, ayie ampia duwo puluah dapo dalamnyo. Indak lamo kamudian, inyo ajuak pulo baliak, ruponyo ayie batambah dangka, kurang saketek limo baleh dapo dalamnyo. 29Inyo tu bi takuik kapa tu ka tasakek di batu karang, mako, inyo tu manurunkan ampek buwah sauah, dari sabalah ka ikua kapa, sarato bi ma-arokkan, kok dapek capeklah ari siang. 30Anak-anak kapa tu, bi mancubo nak ka mancilukuih lari dari kapa tu. Inyo tu bi manurunkan sikoci, bakcando icak-icak nak ka manurunkan sauah, di sabalah nan ka kapalo kapa. 31Untuang Paulus capek bakato kabake kumandan, sarato jo saradadu-saradadu nan ado di kapa tu, ”Jikok anak-anak kapa ko, indak tatauk batahan di kapa, mako, kasadonyo sudaro-sudaro indak ado doh nan ka salamaik.” 32Dek karano itu, saradadu-saradadu tu mamutuihi tali sikoci tu, sainggo sikoci tu anyuik. 33Kutiko ari manjalang siang, Paulus ma-ajak urang-urang tu supayo bi makan kasadonyo. Paulus bakato, ”Lah ampek baleh ari lamonyo, kasadonyo angku-angku hanyo mananti-nanti sajo dalam ka-adaan cameh, sarato indak mamakan sabuwah alah juwo. 34Dek karano itu ambo mintak, supayo bi makanlah agak saketek. Itu labiah elok di angku-angku, supayo angku-angku bakudaraik baliak. Dek karano kasadonyo angku-angku layi ka salamaik, sarato indak ka kurang sabuwah alahjuwo.” 35Sasudah bakato bakcando itu, Paulus ma-ambiak roti, sudah tu, badowa batarimo kasih kabake Tuhan, di adok-an kasadonyo urang-urang tu. Kamudian, inyo mambagi-bagi roti tu, sudah tu inyo tu bi makan. 36Mako, inyo tu kasadonyo bi basumangaik baliak, sarato bi sato pulo makan. 37Kasadonyo urang nan ado di kapa kutiko itu, ado duwo ratuih tujuah puluah anam urang banyaknyo. 38Sasudah kasadonyo urang-urang tu bi makan sacukuiknyo, mako, inyo tu muloi bi mambuwang gandun muatan kapa tu masuak lauik, supayo kapa tu bakurang bareknyo. 39Kutiko ari lah siang, anak-anak kapa tu bi manampak daratan, tapi, inyo tu indak bi tawu, daratan apo tu nan nampak. Inyo tu bi maliyek sabuwah taluak sarato jo pantainyo. Jadi, inyo tu bamukasuik, kok dapek nak malabuahkan kapa tu di taluak tu. 40Mako, inyo tu bi mamutuihi tali-tali sauah, nan sauah tu inyo padiyakan sajo karam di lauik. Sarangkek jo itu, inyo tu mambukak pulo tali-tali nan mangabek kamudi. Kamudian, inyo tu manayiakkan layie nan sabalah ka muko, supayo angin manulakkan kapa tu manuju pantai. 41Tapi, kapa tu ta-antuak ka pungguang kasiak. Nan bagian ka muko kapa tu lah tasakek, sarato indak dapek lai manggarik, sadangkan nan bagian balakangnyo, lah cayie di-ampai dek ombak gadang. 42Saradadu-saradadu nan di kapa tu, baniyaik nak ka mambunuah kasadonyo urang tahanan, dek karano inyo tu takuik, jan sampai ado urang tahanan tu nan baranang ka darek, sudah tu bi lari. 43Tapi, kumandan tu managah mukasuik saradadu-saradadu tu, dek karano inyo nak ka manyalamaikkan Paulus. Inyo manyuruah kasadonyo urang nan pandai baranang, bi tajun labiah dawulu, sarato taruih baranang ka pantai; 44nan lain-lainnyo baru ma-iriang di balakang, sambia bapacik ka papan, atau ka kayu pacahan kapa tu. Jo caro nan bakcando itulah, kasadonyo kami salamaik sampai ka darek. RIWAYAIK RASUL-RASUL

will be added

X\