RIWAYAIK RASUL-RASUL 25

1Tigo ari sasudah Festus tibo di daerah tu, inyo payi ka Yerusalem dari Kaisarea. 2Di sinan tu, imam-imam kapalo sarato jo pamimpin-pamimpin Yahudi, bi mangadukan Paulus kabake inyo. Urang-urang tu ba-usawo mambujuak Festus, 3supayo dek kabaiakkan atinyo kabake urang-urang tu, inyo namuah manyuruah urang untuak mambawok Paulus ka Yerusalem; dek karano urang-urang tu lah supakaik, untuak ka mambunuah Paulus di tangah jalan. 4Tapi Festus manjawauk, ”Paulus sadang ditahan di Kaisarea; nan ambo sandiri, indak ka lamo lai babaliak ka sinan tu. 5Jadi, biyalah urang-urang nan takamuko di antaro angku-angku sajo, nan ka payi samo-samo jo ambo ka Kaisarea, nan ka mamparkarokan Paulus di sinan tu, jikok iyo inyo lah mampabuwek suatu kasalahan.” 6Sasudah Festus barado di Yerusalem, kiro-kiro salapan atau sapuluah ari lai, mako, inyo babaliak ka Kaisarea. Bisuak arinyo, inyo ma-adokan sidang pangadielan, sarato mamarentahkan supayo Paulus dijapuik untuak mangadauk. 7Kutiko Paulus lah tibo, mako, urang-urang Yahudi nan datang dari Yerusalem, bi tagak di sakuliliang Paulus, sarato muloilah mangamukokan tuduahan-tuduahan nan barek taradok inyo. Tapi, urang-urang tu indak dapek doh mambuktikan sagalo tuduahan tu. 8Dalam pambelaannyo Paulus bakato, ”Ambo indak ado doh mampabuwek sasuatu nan salah, taradok paratuaran ugamo nan di-ajakan dek Musa, atau taradok Baithullah, atau pun taradok Kaisar Roma.” 9Tapi, dek karano Festus nak ka ma-ambiak ati urang Yahudi. Mako, inyo batanyo kabake Paulus, ”Layi namuah angkau payi ka Yerusalem, untuak di-adieli di sinan tu di adok-an ambo, tantang sagalo tuduahan tu?” 10Paulus manjawauk, ”Kiniko ambo sadang tagak di adok-an mahkamah Kaisar Roma; sarato di tampaik ikolah ambo samustinyo di-adieli. Apak sandiri lah tawu, baraso ambo indak basalah taradok urang Yahudi. 11Jikok ambo lah malangga paratuaran, sarato mampabuwek sasuatu nan patuik di-ukun jo ukunan mati, nan ambo rilah untuak mati. Tapi, jikok sagalo tuduahan urang-urang tu indak batua, mako, indak surang juwo doh urang nan bahak, manyarahkan ambo kabake urang-urang tu. Ambo mintak di-adieli dipangadielan Kaisar!” 12Sasudah barundiang jo urang-urang panasiyaik inyo, Festus bakato, ”Jikok angkau mintak di-adieli dipangadielan Kaisar, nan angkau musti payi mangadauk Kaisar.” 13Indak bara lamo kamudian, Rajo Agripa sarato jo Bernike datang ka Kaisarea, untuak mangucaukkan salamaik kabake Festus. 14Sasudah inyo tu lah babarapo ari di sinan tu, mako, Festus manarangkan tantang parkaro Paulus kabake Rajo Agripa. Festus bakato, ”Kiniko di siko ado surang urang tahanan nan ditinggakan dek Feliks. 15Kutiko ambo sadang di Yerusalem, imam-imam kapalo, sarato jo pamimpin-pamimpin Yahudi, bi mangamukokan pangaduan taradok urang nan ditahan ko, sarato bi mamintak, supayo ambo manjatuahkan ukunan kabake inyo. 16Tapi, ambo manjawauk, urang Roma indak bisa doh manyarahkan baitu sajo, urang nan tatuduah untuak di-ukun, jikok inyo alun ba-adok-an jo urang-urang nan manuduah inyo, sarato dibari kasampatan untuak mambela diri. 17Jadi, kutiko urang-urang tu bi datang ka mari, ambo indak manunggu lamo-lamo doh. Bisuaknyo lansuang ambo adokan sidang pangadielan, sarato mamarentahkan, supayo urang nan ditahan tu dijapuik untuak mangadauk. 18Tapi, kutiko urang-urang nan manuduah tu, bi tagak di sakuliliang urang nan ditahan tu, mako, indak ado ciyek juwo doh inyo tu, bi mangamukokan suatu tuduahan tantang pabuatan jahek, bakcando nan lah ambo sangko. 19Urang-urang tu hanyo basalisiah pandapek jo urang nan ditahan tu, tantang parkaro ugamo inyo tu, sarato tantang parkaro surang urang, nan banamo Isa Almasih. Nan Isa Almasih tu lah mati, tapi, Paulus nan dikadukan tu, basikareh mangatokan baraso Isa Almasih tu iduik. 20Dek karano ambo lah pana mamikiekan, baa caronyo ambo ka bisa mandapek sagalo katarangan, tantang duduak parkaro tu, mako, ambo batanyo kabake Paulus, apokoh inyo layi namuah payi ka Yerusalem, untuak ma-adieli parkaronyo tu. 21Tapi, Paulus mintak nayiak bandiang; inyo mintak supayo inyo tatauk sajo di tahanan, sampai parkaronyo diputuihkan dek Kaisar. Dek karano itu, ambo parentahkan supayo inyo tatauk ditahan, sampai ambo dapek kasampatan untuak mangirin inyo kabake Kaisar.” 22Sudah tu, Agripa bakato kabake Festus, ”Ambo niyo pulo tu nak mandangakan curito urang tu.” Festus manjawauk, ”Bisuaklah, apak bisa mandangakannyo.” 23Bisuak arinyo, Agripa sarato jo Bernike, datang jo upacara kabasaran. Inyo tu mamasuak-i ruwang sidang samo-samo jo kumandan-kumandan saradadu parang, sarato jo urang-urang nan takamuko di kota tu. Festus mamarentahkan, supayo Paulus dibawok masuak. 24Sudah tu, Festus bakato, ”Tuanku Agripa, sarato jo kasadonyo urang nan datang! Urang ko lah dikadukan dek kasadonyo urang Yahudi kabake ambo, biya urang Yahudi nan tingga di Yerusalem, atau pun nan di siko. Inyo tu bi manuntuik sambia ma-ariak-ariak, baraso urang ko indak patuik doh dipadiyakan iduik. 25Tapi, ambo indak manamukan doh sasuatu nan lah dipabuwek dek urang ko, nan mamungkinkan inyo di-ukun jo ukunan mati. Nan dek karano inyo sandiri lah mamintak, supayo parkaronyo di-adieli dipangadielan Kaisar, ambo lah mamutuihkan untuak ka mangirin inyo kabake Kaisar. 26Tapi, ambo alun mandapek katarangan nan jaleh tantang dirinyo, nan ka untuak ambo tulihkan dalam surek kabake Kaisar. Itulah sabauknyo, mangko ambo mambawok inyo ka adok-an angku-angku kasadonyo, nan tarutamu sakali, kabake nan mulie, Rajo Agripa! Mukasuik ambo iyolah, sasudah inyo dipareso, mako, ambo lah mandapek katarangan, apo nan samustinyo nan ka ambo tulihkan di dalam surek. 27Dek karano manuruik parasaan ambo, indaklah pado tampaiknyo, jikok mangirin urang tahanan, tapi indak mambari tawu, tantang apo tuduahan nan dituduahkan kabake inyo.” RIWAYAIK RASUL-RASUL

will be added

X\