RIWAYAIK RASUL-RASUL 24

1Limo ari kamudian, Imam Basa Ananias, sarato jo pamimpin-pamimpin urang Yahudi, bi payi ka Kaisarea, samo-samo jo surang pangacara nan banamo Tertulus. Urang-urang tu payi mangadauk ka Gubenur Feliks, untuak manyampaikan pangaduannyo tantang diri Paulus. 2Kutiko Tertulus dipanggie ka muko, inyo manuduah Paulus bakcando iko, ”Pak Gubenur nan mulie! Salamo apak mamimpin, nagari kami lah tanang santoso. Dek karano kabijaksanoan apak, lah banyak sagalo sasuatu nan dipaelok-i di banso kami. 3Kasadonyo tu, dima punjuwo, tatauk kami sambuik jo tarimo kasih, sarato jo raso aromaik nan satenggi-tengginyo. 4Tapi, supayo jan banyak mambuwang wakatu apak, ambo mambana, kok dapek basadiyolah andaknyo apak untuak mandangakan, pangaduan kami nan singkek ko. 5Lah jaleh bana di kami, nan urang ko, adolah urang pangacau nan babahayo. Dima-dimanyo inyo mambuwek kacau di antaro urang-urang Yahudi, nan inyo adolah pamimpin garakkan urang-urang Nazaret. 6Malah inyo lah mangumuahi Baithullah, dek karano itulah mangko kami tangkok. Kami bamukasuik nak ka ma-adieli inyo manuruik paratuaran ugamo kami. 7Tapi, pak kumandan Lisias, marabuik inyo dari tangan kami, 8sarato mamarentahkan, urang-urang nan mangadukan inyo, supayo mangadauk ka pak Gubenur. Jikok apak mamareso urang ko, mako, apak ka mandanga sandiri dari inyo, iyo atau indaknyo, sagalo apo nan lah kami kadukan, tantang diri inyo.” 9Urang-urang Yahudi nan di sinan tu, sato pulo manuduah Paulus, sarato ma-iyokan pulo sagalo apo nan lah dikatokan dek Tertulus. 10Sudah tu, gubenur tu mambari kode kabake Paulus, baraso inyo buliah mangecek. Mako, Paulus bakato, ”Ambo tawu, apak lah batawun-tawun lamonyo manjadi hakim di nagari ko. Itulah sabauknyo, mangko ambo labiah suko manyampaikan pambelaan ambo ko, di adok-an apak. 11Apak bisa manyalidiak-i sandiri, baraso indak labiah dari duwo baleh ari nan lapeh, ambo payi ka Yerusalem untuak ba-ibadaik. 12Indak ado doh urang-urang Yahudi tu, nan mandapati ambo sadang batangka kok jo siya-siyanyo, atau nan mandapati ambo mangumpuakan urang untuak mambuwek kacau, biya di Baithullah, atau di rumah-rumah ibadaik, atau pun kok dima-dimanyo dalam kota. 13Inyo tu pun indak bisa doh mambuktikan, sagalo tuduahan inyo tu taradok ambo, nan inyo kadukan kabake apak. 14Ambo iyo musti ma-akui kabake apak, baraso ambo iyo manyambah Allah nan disambah dek niniak muyang kami, manuruik ajaran Isa Almasih, nan di-anggauk salah dek urang-urang Yahudi. Tapi, nan ambo layi picayo juwo lai, kabake sadonyo nan tatulih di Kitauk Musa, sarato jo nan tatulih di Kitauk Nabi-nabi nan lain. 15Samo jo bakcando urang-urang tu, ambo mampunyoi arapan pulo kabake Allah, baraso kasadonyo urang, ka bi iduik baliak sasudah mati — biya urang-urang nan elok, atau pun urang-urang nan jahek! 16Itulah sabauknyo mangko ambo taruih ba-usawo sa-elok-eloknyo, supayo ati ketek ambo tatauk barasiah taradok Allah, sarato barasiah pulo taradok manusia. 17Sasudah babarapo tawun lamonyo, ambo indak lai di Yerusalem, mako, ambo babaliak ka sinan tu untuak ma-antakan bantuan pitih untuak banso ambo, sarato untuak mampasambahkan karoban kabake Allah. 18Pado wakatu ambo sadang mangarajokan kasadonyo tu, mako, urang-urang tu mandapati ambo di Baithullah, sasudah ambo lah salasai jo upacara panyucian diri. Indak ado doh urang banyak nan samo-samo jo ambo, sarato indak ado pulo doh kakacauan di sinan tu, kutiko tu. 19Hanyo ado babarapo urang Yahudi dari propinsi Asia di sinan tu. Inyo tu lah nan samustinyo ado di siko, untuak mangadukan ambo kabake apak, jikok iyo ado sasuatu dek inyo tu, nan ka inyo tuduahkan taradok diri ambo. 20Atau biyalah urang-urang nan ado di siko kiniko, nan ka manyatokan karajo jahek apo, nan lah tasuwo dek inyo tu di diri ambo, kutiko ambo dibawok ka Mahkamah Ugamo. 21Inyo tu bi mandapati hanyo kalimaik sapatah, nan ambo katokan di adok-an inyo tu, iyolah kalimaik: Ambo di-adieli ari ko, dek karano ambo picayo, baraso urang-urang nan mati ka di-iduikkan baliak.” 22Kamudian, Feliks nan lah banyak mangatawui tantang ajaran Isa Almasih, manutuik sidang parkaro tu. Inyo bakato, ”Ambo ka mamutuihkan parkaro ko, jikok kumandan Lisias lah tibo.” 23Mako, inyo mamarentahkan kumandan nan batangguang jawauk taradok diri Paulus, supayo tatauk manahan Paulus, tapi, jo sacaro nan agak lungga, sarato ma-ijinkan kanti-kantinyo mambarikan apo nan inyo paralukan. 24Babarapo ari kamudian, Feliks datang samo-samo jo bininyo nan banamo Drusila; bininyo tu urang Yahudi. Mako, Feliks manyuruah urang untuak manjapuik Paulus, kamudian, Feliks mandangakan Paulus mangecek, tantang parkaro ba-iman kabake Isa Almasih. 25Tapi, kutiko Paulus mangecek tantang parkaro kabanaran, sarato jo manguwasoi diri, sarato tantang parkaro ukunan di Ari Kiyamaik, Feliks tabik takuik, sudah tu inyo bakato, ”Cukuik sakitu lah dulu, kiniko angkau buliah pulang. Ambo ka mamanggie angkau baliak, jikok layi ado wakatu.” 26Samantaro itu, Feliks ma-arokkan ka mandapek pitih dari Paulus. Itulah sabauknyo, mangko inyo acok-acok manyuruah urang untuak manjapuik Paulus, untuak ka mangecek-ngecek jo inyo. 27Sasudah duwo tawun, Perkius Festus, manggantikan Feliks sabagai gubenur. Dek karano Feliks nak ka ma-ambiak ati urang-urang Yahudi, mako, inyo mampadiyakan sajo Paulus di dalam pinjaro. RIWAYAIK RASUL-RASUL

will be added

X\