RIWAYAIK RASUL-RASUL 22

1”Bapak-bapak, sarato jo Sudaro-sudaro kasadonyo! Ambo ka manyampaikan pambelaan ambo kabake angku-angku. Cubolah dangakan!” 2Kutiko urang-urang tu mandanga Paulus mangecekjo bahaso Ibrani, mako, urang-urang tu batambah anok. Sudah tu, Paulus manaruihkan katarangannyo. 3Paulus bakato, ”Nan ambo ko adolah urang Yahudi, ambo layie di Tarsus di nagari Kilikia, tapi, ambo digadangkan di siko, di Yerusalem ko, sarato dididik jo sacaro taliti dek guru gadang angku Gamaliel, manuruik paratuaran nan di-ajakan dek Musa kabake niniak muyang kito. Samo pulo jo kasadonyo angku-angku nan di siko kiniko, ambo pun sabana gigiah bakarajo untuak Allah. 4Ambo ma-aniayo pangikuik-pangikuik ajaran baru tu sampai mati. Kasadonyo urang-urang tu, biya laki-laki, atau pun padusi, ambo tangkok-i, sudah tu ambo masuakkan ka pinjaro. 5Imam basa sandiri, sarato jo kasadonyo anggota Mahkamah Ugamo, bisa manjadi sasi, baraso ambo ko indak baduto. Dek karano, inyo tu lah nan mambari ambo surek, nan ditujukan kabake urang-urang Yahudi nan di Damsyik. Jo surek tu, ambo mandapek kuwaso untuak manangkok-i urang-urang nan di sinan tu, nan bi picayo kabake ajaran tu, sarato mambawok inyo tu ka Yerusalem, untuak ka di-ukun.” 6”Kutiko ambo sadang dalam pajalanan, lah ampia dakek ka kota Damsyik, kutiko tu tangah ari badantang, indak disangko-sangko ado cahayo nan sangaik tarang mamanca dari langik ka sakuliliang ambo. 7Ambo rabah ka tanah, sudah tu ambo mandanga suwaro nan bakato kabake ambo, ’Oih Saulus, Saulus! Baa mangko angkau ma-aniayo Ambo?' 8Sudah tu ambo batanyo, ’Siyakoh Angkau, oih suwaro nan mangecek?' Ado suwaro nan manjawauk, ’Ambo-lah Isa Almasih urang Nazaret, nan angkau aniayo,' 9Urang-urang nan ado di sinan tu, nan samo-samo jo ambo, bi manampak cahayo tu, tapi, inyo tu indak bi mandanga suwaro Baliau nan mangecek kabake ambo tu. 10Sudah tu, ambo batanyo pulo, ’Apo nan musti ambo pabuwek, Tuhan?' Tuhan manjawauk, ’Tagaklah, payilah ka Damsyik. Tibo di sinan tu, angkau ka di-agiah tawu tantang kasadonyo, apo nan kahandak Allah, nan musti angkau karajokan.’ 11Mato ambo lah manjadi buto, dek karano cahayo nan manyilaukan tu. Mako kanti-kanti ambolah nan mambimbiang ambo, untuak taruih ka Damsyik. 12Di sinan tu, ado surang urang nan banamo Ananias. Inyo adolah urang saliah, nan patuah manjalankan paratuaran Musa. Kasadonyo urang Yahudi nan tingga di Damsyik, sangaik ma-aromaik-inyo. 13Kutiko inyo tibo maliyek ambo, inyo tagak di dakek ambo sambia bakato, ’Angku Saulus, andaklah mato angkau bisa maliyek baliak!' Sakutiko tu juwo, kutiko ambo mancingowak, mato ambo lah bisa maliyek inyo. 14Kamudian, inyo bakato kabake ambo, ’Allah niniak muyang kito, lah mamiliah angkau, supayo angkau mangatawui apo nan kahandak Baliau, sarato maliyek kabake Isa Almasih, Pisuruah Allah, nan lah mangarajokan kahandak Allah, sarato iyokanlah kecek Isa Almasih. 15Angkau ka manjadi pisuruah Baliau, untuak ka mangabakan kabake sadonyo umaik mukaluak, apo nan lah angkau liyek, sarato apo nan lah angkau danga. 16Nan kiniko, jan lai ditunggu balamo-lamo. Tagaklah, sarato sarahkanlah diri angkau untuak ka dipamandikan. Ba-imbaulah mamintak tolong kabake Tuhan, supayo angkau dilapehkan dari sagalo doso-doso angkau.’ ” 17”Ambo babaliak ka Yerusalem, di kutiko ambo sadang badowa di Baithullah, ambo dikuwasoi dek Roh Allah. 18Ambo manampak Tuhan; Baliau bakato kabake ambo, ’Capeklah tinggakan Yerusalem ko, dek karano urang-urang nan di siko, indak ka niyo doh manarimo kaba nan ka angkau baritokan tantang diri Ambo.’ 19Ambo bakato, ’Tuhan, urang-urang ko lah bi tawu, baraso ambo lah masuak ka rumah-rumah ibadaik untuak manangkok-inyo, sarato manangani urang-urang nan picayo kabake Angkau. 20Baitu pulo kutiko pisuruah Angkau Stefanus dibunuah, ambo sandiri ado di sinan tu, sarato satuju pulo jikok inyo dibunuah. Malah ambo sandirilah nan manunggui pakaian urang-urang nan mambunuah inyo.’ 21Tapi, Tuhan bakato pulo baliak kabake ambo, ’Payi sajolah, dek karano Ambo ka manyuruah angkau payi ka tampaik nan jauah, kabake urang nan indak urang Yahudi.’ ” 22Urang-urang tu taruih juwo bi mandangakan Paulus babicaro, tapi, tibo di kalimaik nan tarakir, urang-urang tu bi ma-ariakkan sakuwaikkuwaiknyo, ”Bunuah sajo urang nan bakcando iko. Inyo ko indak patuik doh ko iduik!” 23Sambia ma-ariak, urang-urang tu bi mangipehkan jubahnyo, sarato ma-ambuangkan abu ka udaro. 24Dek karano itu, kumandan pasukan Roma tu manyuruah mambawok Paulus ka markas, supayo inyo dipareso di sinan tu, sarato ditangani, untuak mangatawui apo sabauknyo mangko urang-urang Yahudi bi ma-ariakkan kato-kato nan bakcando itu taradok inyo. 25Tapi, kutiko Paulus lah dikabek, untuak ka dicambuik, mako, Paulus bakato kabake kumandan nan tagak di sinan tu, ”Apokoh layi dibuliahkan, mancambuik urang warga karajaan Roma, sabalun inyo disidangkan?” 26Dek mandanga nan baitu, kumandan tu payi kabake kapalo pasukan, sarato jo bakato, ”Apo nan ka apak pabuwek? Urang ko adolah warga karajaan Roma!” 27Mako, kumandan tu payi kabake Paulus, sarato batanyo, ”Cubolah agiah tawu, apokoh iyo angkau warga karajaan Roma?” ”Iyo, ” kecek Paulus, ”ambo iyo warga karajaan Roma.” 28Kumandan tu bakato pulo, ”Ambo banyak sangaik tabayie, untuak ka manjadi warga karajaan Roma!” Paulus bakato, ”Nan ambo sajak dari layie, lah warga karajaan Roma.” 29Di sakutiko tu juwo, saradadu-saradadu nan ka mamareso Paulus, bi tasuruik, nan kumandan tu pun tabik takuik, dek karano inyo lah mampilanggu-i Paulus, padohal Paulus warga karajaan Roma. 30Kumandan pasukan Roma tu, niyo sangaik nak mangatawui, apo bana sabauknyo, mangko urang-urang Yahudi mampasalahkan Paulus. Dek karano itu, bisuaknyo, inyo panggie imam-imam kapalo, sarato jo Mahkamah Ugamo, supayo bi bakumpua. Sudah tu pilanggu Paulus dibukak, kamudian inyo dibawok mangadauk ka adok-an imam-imam kapalo sarato jo Mahkamah Ugamo. RIWAYAIK RASUL-RASUL

will be added

X\