RIWAYAIK RASUL-RASUL 20

1Sasudah ka-adaan lah tanang baliak di Efesus, mako, Paulus mangumpuakan jamaat untuak mambari sumangaik kabake jamaat tu. Kamudian, inyo mangucaukkan salamaik tingga, sudah tu, inyo manaruihkan pajalanan ka Makedonia. 2Inyo payi mangunjuangi daerah-daerah di Makedonia, sarato banyak mambari nasiyaik, kabake urang-urang nan ba-iman kabake Isa Almasih di sinan tu, untuak mambari sumangaik kabake urang-urang tu. Kamudian inyo payi ka Yunani. 3Tigo bulan lamonyo inyo tingga di sinan tu. Di kutiko inyo sadang basegeh-segeh, untuak balayie ka Siria, tadangalah kaba baraso urang-urang Yahudi, sadang bamupakaik untuak ka mambunuah inyo. Dek karano itu, inyo mamutuihkan untuak babaliak malalui Makedonia. 4Sopater anak Pirus nan barasa dari Berea, payi samo-samo jo inyo; baitu pulo Aristarkhus sarato jo Sekundus urang Tesalonika, sarato jo Gayus urang Derbe. Payi pulo samo jo inyo Timotius, Tikhikus sarato jo Trofimus, urang-urang dari propinsi Asia. 5Urang-urang tu bi mandawului kami, sarato manunggu kami di Troas. 6Sasudah ari rayo Roti Indak Baragi, kami balayie maninggakan Filipi. Limo ari kamudian, kami bakumpua baliak jo urang-urang tu di Troas. Kami di sinan tu salamo sapakan. 7Ari Satu malam, kami bakumpua untuak makan basamo jo sacaro badunsanak. Paulus mangecek-ngecek jo urang-urang nan ado di sinan malam tu, dek karano bisuaknyo inyo bamukasuik nak ka barangkek. Sampai lah laruik tangah malam, nan Paulus mangecek-ngecek juwo lai. 8Dalam biliak di lenggek nan di ateh, di tampaik kami bakumpua tu, ado banyak dama palito. 9Ado surang anak mudo nan banamo Eutikhus, duduak di tingkok. Dek karano Paulus alun baranti juwo lai mangecek, sadangkan mato anak mudo tu lah sangaik takantuak, sampai inyo talalok di tingkok tu, sudah tu, balambin ka bawah dari lenggek nan katigo. Kutiko urang ka ma-angkek inyo, ruponyo inyo lah mati. 10Mako, Paulus turun ka bawah, sudah tu inyo rabahkan badannyo ka badan anak mudo tu, sambia inyo paguik. Paulus bakato, ”Jan cameh, inyo iduik juwo lai ko!” 11Kamudian, Paulus babaliak nayiak ka ateh, sudah tu inyo mambagi-bagikan roti, untuak ka dimakan basamo-samo. Sasudah lah cukuik lamo mangecek jo urang-urang tu, sampai subuah, mako, Paulus barangkek. 12Urang-urang tu mambawok anak mudo, nan lah babaliak iduik tu, pulang ka rumahnyo. Sangaik sanangnyo ati urang-urang tu, atinyo nan ibo raso ta-ubek. 13Kami bi nayiak ka kapa, kami balayie labiah dulu ka Asos, untuak manjapuik Paulus jo kapa di sinan tu. Inyo nan lah ma-atur bakcando itu, dek karano inyo ka sinan malalui jalan darek. 14Baru lah batamu di Asos, Paulus sacapeknyo nayiak ka kapa, sudah tu kami balayie ka Metilene. 15Dari sinan kami balayie pulo, bisuaknyo tibo di tampaik nan ba-adok-an jo nagari Khios. Bisuak ciyek lai kami sampai di nagari Samos, sa-ari kamudian kami tibo di Miletus. 16Paulus lah mamutuihkan, baraso indak ka singgah di Efesus, supayo jan ma-abih-abihkan wakatu di daerah Asia. Sadapek mungkin inyo niyo sacapeknyo tibo di Yerusalem di Ari Rayo Pentakosta. 17Dari Miletus Paulus mangirin kaba ka Efesus, mamintak supayo pamimpin-pamimpin jamaat nan di sinan tu, datang untuak manamu-inyo. 18Kutiko urang-urang tu lah bi tibo, Paulus bakato kabake inyo tu, ”Angku-angku lah mangatawui baa caro iduik ambo salamo ko, kutiko ambo samo-samo jo angku-angku, sajak di ari nan partamu ambo tibo di Asia. 19Jo sacaro jo randah ati, sarato jo ba-urai ayie mato, ambo bakarajo untuak Tuhan, dalam parasaian nan ambo tangguangkan, dek karano ulah jahek urang-urang Yahudi. 20Angku-angku tawu, baraso ambo indak sagan-sagan ma-agiah tawu kabake angku-angku, apo nan ka baguno di angku-angku. Ambo ma-aja angku-angku di patamuan-patamuan urang banyak, sarato jo di rumah-rumah. 21Bakcando kabake urang-urang Yahudi, baitu pulo kabake urang-urang banso lain, ambo taruih mambari paringektan, supayo inyo tu bi batobaik dari doso-dosonyo, sarato bi datanglah kabake Allah, sarato bi ba-imanlah kabake Tuhan Isa Almasih. 22Nan kiniko untuak mamatuahi parentah Roh Allah, mako, ambo ka payi ka Yerusalem. Ambo indak tawu doh, apo nan ka tajadi taradok diri ambo tibo di sinan. 23Nan ambo katawui hanyolah, baraso di satiyok kota, Roh Allah lah ma-agiah tawu kabake ambo jo sacaro nan jaleh, baraso ambo ka masuak pinjaro, sarato ka manangguangkan sansaro. 24Tapi, ambo indak paduli doh jo iduik ambo ko, asakan ambo layi dapek manyalasaikan tugeh, nan lah dipicayokan dek Tuhan Isa Almasih kabake ambo, sarato asakan ambo layi indak barubah ati, untuak mambaritokan Injil rahmaik Allah sampai ka akie iduik ambo. 25Ambo lah mandatangi angku-angku kasadonyo, ambo lah mambaritokan tantang Karajaan Allah. Kiniko ambo marasokan, mungkin ambo indak ka basuwo lai jo angku-angku sasudah ko. 26Dek karano itu, taruih tarang ambo katokan kabake angku-angku kiniko, jikok isuak ado di antaro angku-angku nan binaso, mako, itu indak salah ambo doh tu. 27Alun ado lai ambo ma-ilak dari tugeh ambo, untuak manarangkan jo sacaro nan jaleh kabake angku-angku, tantang kasadonyo rancana Allah. 28Jadi, andaklah angku-angku manjago diri, sarato jago pulolah kasadonyo jamaat, nan lah disarahkan dek Roh Allah kabake angku-angku, untuak ka dijago; dek karano angku-angku lah di-angkek manjadi panjago jamaat tu. Jadi, andaklah angku-angku manjago jamaat Allah tu, nan bak tukang gubalo manjago dombanyo, dek karano Allah lah manjadikan jamaat tu miliak-Nyo, malalui kamatian Anak-Nyo sandiri. 29Sapaningga ambo, lah musti ka bi tibo anjiang-anjiang utan nan buweh ka antaro angku-angku. Mungkin sajo urang nan angku-angku jago tu, ka dimakan dek anjiang utan tu. 30Malahan di antaro angku-angku sandiri, ado nan ka manjadi urang nan mambaritokan kaba nan indak batua. Inyo pabuwek nan bakcando itu, supayo urang-urang nan lah ba-iman kabake Isa Almasih, tatampuah di jalan nan sasek manuruikkan inyo tu. 31Dek karano itu, bajago-jagolah! Cubolah kana, tigo tawun lamonyo ambo ba-urai ayie mato, siang malam ambo indak talakik balapeh panek, untuak ma-aja satiyok urang di antaro angku-angku. 32Kiniko ambo manyarahkan angku-angku kabake Allah, supayo Baliau nan ka mamaliaro angku-angku, sarato supayo angku-angku tatauk bapacik kabake kato-kato rahmaik Allah. Allah bakuwaso manguwaikkan angku-angku, sarato ka mambarikan kabake angku-angku barakaik-barakaik, nan lah Baliau sadiyokan untuak kasadonyo urang nan manjadi umaik-Nyo. 33Alun ado lai ambo ma-arokkan pitih, atau pakaian, dari siapo pun juwo. 34Angku-angku sandiri tawu, baraso jo jariah ambo sandiri ambo bakarajo, untuak mancukuikkan kaparaluan ambo, sarato jo kanti-kanti nan bi payi jo ambo. 35Dalam sagalo parkaro ambo lah mambari conto taladan kabake angku-angku, baraso, jo sacaro bakarajo kareh bakcando iko, kito musti manolong urang-urang nan lamah. Dek karano kito musti tatauk mangana, apo nan lah dikatokan dek Tuhan Isa Almasih, ’Labiah basukocito urang nan mambari daripado urang nan manarimo.’ ” 36Sasudah Paulus salasai mangecek, inyo basilutuik jo urang-urang tu kasadonyo, sudah tu, inyo tu bi badowa. 37Urang-urang tu bi manangih kasadonyo, sambia mamaguik Paulus, inyo tu bi mangucaukkan salamaik jalan. 38Sadiah sangaik ati urang-urang tu, nan ma-ibokan atinyo bana, dek karano Paulus mangatokan, baraso urang-urang tu indak lai ka basuwo jo inyo. Urang-urang tu ma-antakan Paulus sampai ka kapa. RIWAYAIK RASUL-RASUL

will be added

X\