RIWAYAIK RASUL-RASUL 2

1Kutiko lah tibo ari Pentakosta, kasadonyo urang ba-iman bi bakumpua di suatu tampaik. 2Indak disangko-sangko tadangalah bunyi dari langik, bakcando bunyi limbubu nan mambuso. Rumah tampaik urang-urang tu sadang bi duduak, kaciyek-annyo panuah dek bunyi limbubu tu. 3Sudah tu, inyo tu bi manampak lidah-lidah, bakcando nyalo api, manjala kian kumari, sarato inggok kabake satiyok-tiyok inyo tu. 4Inyo tu kasadonyo dikuwasoi dek Roh Allah, sarato muloi bi mangecek jo babagai-bagai bahaso lain. Inyo tu mangecek manuruik apo nan dibarikan dek Roh tu kabake inyo, untuak dikatokan. 5Pado wakatu itu, banyak urang Yahudi, dari babagai-bagai nagari di dunia ko, nan bi tingga di Yerusalem. Inyo tu adolah urang-urang nan patuah kabake Allah. 6Kutiko tadanga bunyi tu, banyak urang nan tibo ba-uruang. Inyo tu kasadonyo bi takajuik, dek mandanga urang-urang ba-iman tu, bi mangecek jo bahaso dari babagai-bagai nagari, tampaik urang Yahudi tu bi marantau. 7Inyo tu kasadonyo bi tacangang-cangang, sarato bi eran, mako, inyo tu bi bakato, ”Urang-urang nan bi mangecek ko, kasadonyo urang-urang Galilea, iyo ndak? 8Tapi, baa mangko tadanga dek kito, inyo tu bi mangecek jo bahaso dari babagai-bagai nagari tampaik kito bi marantau? 9Kito ko urang dari Partia, Media, Elam; dari Mesopotamia, Yudea sarato jo Kapadokia; dari Pontus sarato jo Asia, 10dari Frigia sarato jo Pamfilia, dari Mesir sarato jo daerah-daerah Libia dakek Kirene; ado pulo di antaro kito nan datang dari Roma, 11ado urang-urang Yahudi, sarato ado pulo urang-urang banso lain, nan lah bi masuak ugamo Yahudi; ado pulo nan datang dari Kreta, sarato jo dari Arab. Kito kasadonyo bi mandanga, inyo tu bi mangecek jo bahaso dari babagai-bagai nagari, tampaik kito bi marantau, tantang parkaro-parkaro nan ajaib nan lah dipabuwek dek Allah!” 12Dek sangaik tacangang, sarato dek sangaik eran, inyo tu bi batanyo sasamo inyo, ”Apokoh aratinyo kasadonyo ko?” 13Tapi, ado pulo urang-urang nan bi mancimeehkan. Inyo tu bi bakato, ”Jan di-iyokan pulo, urang-urang tu sadang bi mabuak tu!” 14Mako, Petrus tagak, samo-samo jo sabaleh rasul nan lain, kamudian, bakato kabake urang nan banyak tu. Jo suwaro nan lantang inyo bakato, ”Sudaro-sudaro urang-urang Yahudi, sarato jo kasadonyo nan tingga di Yerusalem! Dangakanlah elok-elok, dek karano, iko adolah parkaro nan sangaik paralu, nan ka ambo tarangkan kabake angku-angku. 15Urang-urang nan mangecek jo babagai-bagai bahaso cako, jan angkau sangko inyo tu bi mabuak, inyo tu indak mabuak doh; dek karano kiniko, ari baru pukua sambilan pagi. 16Sabananyo apo nan tajadi kiniko, sa-isuak lah di-agiah tawu dek Allah, malalui Nabi Yoel. 17Allah bakato, ’Isuak di akie jaman, Aden ka mancurahkan Roh-Den, taradok kasadonyo urang. Anak-anak angkau nan laki-laki, sarato jo anak-anak angkau nan padusi, ka bi ma-agiah tawu kabake angkau, sagalo parkaro nan lah Den baritawu kabake inyo tu. Anak-anak mudo angkau, ka bi manampak sagalo parkaro, nan ka Den paliyekkan kabake inyo tu. Urang-urang angkau nan lah tuwo, ka bi barasiyan, iyolah rasiyan nan ka Den barikan kabake inyo tu. 18Kabake pisuruah-pisuruah-Den pun — biya laki-laki atau pun padusi —, ka Den curahkan Roh-Den di maso itu. Inyo tu ka bi ma-agiah tawu, sagalo parkaro nan ka Den agiah tawu kabake inyo tu. 19Aden ka mampabuwek sasuatu nan ganjie di ateh langik, sarato jo parkaro-parkaro nan luwa biaso di bumi ko; ka ado darah, sarato jo api, ado asok nan bagumpa-gumpa. 20Matoari ka manjadi galok, bulan ka manjadi sirah bakcando darah, sabalun tibo Ari Tuhan, ari gadang nan mulie tu. 21Di kutiko itu, urang nan lai ba-imbau mamintak tolong kabake Tuhan, mako, inyo ka disalamaikkan.’ 22Oih sudaro-sudaro urang Israel! Dangakanlah apo nan ambo katokan ko. Isa Almasih urang Nazaret tu, lah di-agiah tugeh dek Allah untuak sudaro. Tandonyo Baliau lah mandapek tugeh, kito dapek maliyek sacaro jaleh, malalui sagalo mukjizat, sarato malalui sagalo parkaro luwa biaso, nan lah dipabuwek dek Allah di adok-an angkau, malalui Isa Almasih tu. Kasadonyo tu angkau sandiri lah bi tawu. 23Sasuwai jo rancana-Nyo sandiri, Allah lah ma-ambiak kaputusan untuak manyarahkan Isa Almasih kabake angkau. Kutiko Baliau lah disarahkan, angkau mambunuah Baliau, jo sacaro mampadiyakan sajo, Baliau disalibkan dek urang-urang nan durako kabake Allah. 24Tapi Allah ma-iduikkan Baliau baliak, di antaro urang-urang nan lah mati. Baliau dilulua dek mauik, tapi, Allah malapehkan Baliau, dek karano indak mungkin doh Baliau ka sataruihnyo dikuwasoi dek mauik. 25Tantang diri Isa Almasih ko, Daud panah bakato, ’Ambo manampak Tuhan tatauk di adok-an ambo; Baliau mangawani ambo, supayo ambo jan digaduah dek siapo pun juwo. 26Itu mangkonyo ati ambo basukocito, muluik ambo mandendangkan puji-pujian: nan tubuah ambo ko tanang mananti, jo raso tanang di dalam kubuaran. 27Dek karano, Angkau indak mampadiyakan jiwa ambo dilulua dek alam mauik. Angkau pun indak mampadiyakan pisuruah Angkau nan tuluih, tandeh dek binaso. 28Angkau lah manunjuakkan kabake ambo, jalan nan manuju iduik nan sajati. Sukocito ambo maruwah-ruwah dek karano Angkau tatauk ado samo-samo jo ambo.’ 29Oih sudaro-sudaro, ijinkanlah ambo mangecek jo sacaro bataruih tarang, tantang Daud niniak muyang kito. Inyo lah mati, lah dikubuakan; kubuarannyo dapek juwo lai kito liyek sampai kiniko. 30Allah lah bajanji kabake inyo jo sacaro basumpah, baraso salah surang dari katurunannyo ka di-angkek dek Allah manjadi Rajo. Dek karano inyo lah mangatawui janji tu, inyopun adolah surang nabi, 31inyo tawu pulo apo nan ka dipabuwek dek Allah. Dek karano itu inyo lah banubuwaik, baraso Rajo Panyalamaik nan dijanjikan dek Allah tu, ka iduik baliak sasudah mati. Daud lah mangatokan, ’Baliau indak ka dipadiyakan doh tatauk di alam mauik; tubuah-Nyo indak ka binaso, sarato indak ka baa-baa.’ 32Itulah Inyo Baliau, Isa Almasih nan lah di-iduikkan baliak dek Allah, sasudah Baliau mati. Kasadonyo kami lah bi maliyek sandiri kajadian tu. 33Baliau di-angkek ka tampaik nan sangaik tenggi, dibari kakuwasoan dek Allah, Baliau manarimo Roh Allah nan lah dijanjikan dek Bapak. Nan angkau danga, sarato jo nan angkau liyek kiniko, adolah Roh nan itu juwo, nan lah Baliau curahkan kabake kami. 34Daud sandiri indak nayiak doh ka sarugo, tapi, inyo mangatokan, ’Tuhan bakato, kabake Tuhan ambo: 35Duduaklah di subalah suwok Den, sampai Den pabuwek musuah-musuah Angkau tunduak kabake Angkau!' 36Itulah sabauknyo, kasadonyo urang Israel musti sabana-bana tawu andaknyo, baraso Isa Almasih nan angkau salibkan tu, Baliau tu pulolah nan lah dijadikan dek Allah, manjadi Tuhan sarato Rajo Panyalamaik!” 37Kutiko urang-urang tu man-dangakan apo nan dikatokan dek Petrus tu, atinyo bi rasah sangaik. Mako, inyo tu bi batanyo kabake Petrus, sarato kabake rasul-rasul nan lain, ”Oih sudaro-sudaro, apo nan musti kami pabuwek?” 38Petrus manjawauk, ”Batobaiklah dari doso-doso angkau. Andaklah satiyok angkau dipamandikan ateh namo Isa Almasih, supayo doso angkau di-ampuni. Mako, angkau ka manarimo adiyah Roh Suci dari Allah. 39Dek karano, nan dijanjikan dek Allah tu, adolah untuak angkau, sarato jo katurunan angkau, sarato untuak urang-urang nan barado di tampaik-tampaik nan jauah — iyolah kasadonyo urang nan dipanggie dek Allah Tuhan kito, supayo bi datang kabake Baliau.” 40Bakcando itulah Petrus mana-rangkan kabake urang-urang tu. Sambuah lai kato-katonyo nan lain, nan inyo usawokan pulo, supayo urang-urang tu malapehkan diri dari banso nan jahek ko, banso nan ka di-ukun dek Allah. 41Sambuah urang nan bi picayo kabake apo nan dikatokan dek Petrus, mako, urang-urang tu bi dipamandikan. Di ari nan sa-ari tu, mako batambahlah urang nan ba-iman, sabanyak tigo ribu urang lai. 42Urang-urang tu bi takun taruih baraja jo rasul-rasul, sarato tatauk bakumpua basamo-samo. Inyo tu bi makan basamo-samo, sarato badowa basamo-samo. 43Sabana sambuah mukjizat nan lah dipabuwek dek rasul-rasul tu, sainggo kasadonyo urang bi tacangang, sarato bi tabik takuik. 44Kasadonyo urang-urang ba-iman tu tatauk saiyo sakato, apo nan inyo punyoi, inyo pakai basamo-samo. 45Inyo tu bi manjuwa-i barangbarang, sarato arato miliaknyo, sudah tu pitihnyo dibagi-bagikan di antaro inyo kasadonyo, manuruik kaparaluan inyo surang-surang. 46Satiyok ari inyo tu tatauk bi bakumpua di Baithullah; jo sacaro balega-lega disatiyok rumahnyo, inyo ma-adokan makan basamo-samo basukocito, inyo tu bi randah ati. 47Inyo tu taruih bi mamuji-muji Allah, inyo tu disuko-i dek kasadonyo urang. Satiyok ari bilangannyo taruih batambah, dek karano, Tuhan ma-antakan kabake inyo tu urang-urang nan sadang disalamaikkan. RIWAYAIK RASUL-RASUL

will be added

X\